KSEBOA - KSEB Officers' Association

Thursday
Apr 27th
Text size
  • Increase font size
  • Default font size
  • Decrease font size
Home വാര്‍ത്തകള്‍ വൈദ്യുതി നിയമം 2003 ഭേദഗതി - വൈദ്യുതി മേഖലയ്ക്ക് ആപത്ത്

വൈദ്യുതി നിയമം 2003 ഭേദഗതി - വൈദ്യുതി മേഖലയ്ക്ക് ആപത്ത്

PDF
Hits smaller text tool iconmedium text tool iconlarger text tool icon

Electricity Act amendmentകേന്ദ്ര ഊര്‍ജ്ജ മന്ത്രാലയം 2011 ഒക്ടോബര്‍ 17-ന് വൈദ്യുതി നിയമം 2003-ന്റെ ഭേദഗതിക്കായുള്ള ഒരു നിര്‍ദ്ദേശം പുറത്തിറക്കിയിട്ടുണ്ട്. സംസ്ഥാന ഗവണ്മെന്റുകളും വൈദ്യുതി സ്ഥാപനങ്ങളും അവരുടെ അഭിപ്രായങ്ങള്‍ നവംബര്‍ 15-നു മുമ്പായി മന്ത്രാലയത്തെ അറിയിക്കുവാനാണ് ആവശ്യപ്പെട്ടിട്ടുള്ളത്. നമ്മുടെ സംഘടനയുടെ അഭിപ്രായങ്ങള്‍ സംസ്ഥാന ഗവണ്മെന്റിനെയും വൈദ്യുതി ബോര്‍ഡിനെയും അറിയിച്ചിട്ടുണ്ട്.
നിലവിലുള്ള ജനറേഷന്‍, ട്രാന്‍സ്മിഷന്‍, ഡിസ്ട്രിബ്യൂഷന്‍, ട്രേഡിംഗ് ലൈസന്‍സികള്‍ക്കു പുറമെ ഡിസ്ട്രിബ്യൂഷനെ വിഭജിച്ചുകൊണ്ട് ഒരു സപ്ലൈ ലൈസന്‍സി കൂടി നിലവില്‍ വരുന്നു എന്നതാണ് ഭേദഗതിയുടെ കാതല്‍. ഭേദഗതിയില്‍ ഉള്‍പ്പെടുത്തിയിരിക്കുന്ന മറ്റുചില കാര്യങ്ങള്‍ താഴെ കുറിക്കുന്നു.


1. വൈദ്യുത മേഖലയില്‍ നയപരമായ നിര്‍ദ്ദേശങ്ങള്‍ നല്‍കുന്നതുള്‍പ്പെടെയുള്ള സംസ്ഥാന സര്‍ക്കാരുകളുടെ അധികാരങ്ങള്‍ കവര്‍ന്നെടുക്കുന്ന രൂപത്തില്‍ കേന്ദ്ര വൈദ്യുതി നയം താരിഫ് നയം എന്നിവ നിര്‍ബന്ധമാക്കുന്ന നിര്‍ദ്ദേശങ്ങള്‍.
2. വൈദ്യുതി റഗുലേറ്ററി കമ്മീഷന്‍ അംഗങ്ങളുടെ നിയമനത്തില്‍ സംസ്ഥാന സര്‍ക്കാരിന്റെ നിയന്ത്രണം പരിമിതപ്പെടുത്തുന്നതിനുള്ള നിര്‍ദ്ദേശങ്ങള്‍
3. വിതരണ കമ്പനികള്‍ ആവശ്യപ്പെട്ടില്ലെങ്കിലും, വര്‍ഷാവര്‍ഷം താരിഫ് പരിഷ്കരണം നടപ്പാക്കുന്നതിനുള്ള നിര്‍ദ്ദേശങ്ങള്‍.
4. ക്രോസ് സബ്സിഡി ഘട്ടംഘട്ടമായി കുറച്ചുകൊണ്ടു വരുന്നതിനുള്ള കര്‍ശന നിര്‍ദ്ദേശങ്ങള്‍.
5. നിലവിലുള്ള വൈദ്യുതി ട്രേഡിംഗിനു പുറമേ ഫോര്‍വേര്‍ഡ് മാര്‍ക്കറ്റ് കൂടി നടപ്പാക്കികൊണ്ട് ഊഹക്കച്ചവടം കൂടുതല്‍ വ്യാപകമാക്കുന്നതിനുള്ള നിര്‍ദ്ദേശങ്ങള്‍.
ഭേദഗതി നിര്‍ദ്ദേശങ്ങളില്‍ ഏറ്റവും കാതലായത് സപ്ലൈ ലൈസന്‍സി സംബന്ധിച്ച മാറ്റങ്ങളാണെന്ന് മുകളില്‍ സൂചിപ്പിച്ചിരുന്നുവല്ലോ. ഇതിനായി നിര്‍വ്വചനങ്ങള്‍ മുതല്‍ വൈദ്യുതി നിയമത്തിലെ എല്ലാ സെക്‌ഷനുകളിലും സമഗ്രമായ മാറ്റം വരുത്തിയിരിക്കുന്നു. ഭേദഗതിക്കായി പുറത്തിറക്കിയ പതിപ്പ് http://www.powermin.nic.in/whats_new/pdf/Draft_amendments_in_Electricity_Act_2003.pdf  എന്ന ലിങ്കില്‍ നിന്നും ഡൗണ്‍ലോഡ് ചെയ്യാവുന്നതാണ്. നിലവിലുള്ള നിയമത്തില്‍ ഉല്‍പ്പാദനം, പ്രേഷണം, വിതരണം, ട്രേഡിംഗ് എന്നീ ലൈസന്‍സികള്‍ക്കാണ് വ്യവസ്ഥയുലള്ളത്. വിതരണത്തില്‍ ഒരു പ്രദേശത്തു തന്നെ ഒന്നിലധികം ലൈസന്‍സികള്‍ ആവാം. എന്നാല്‍ ഇവയ്ക്കോരോന്നിനും അവരുടേതായ വിതരണ ലൈനുകള്‍ വേണം. ഇതിന് സാമ്പത്തികവും സാങ്കേതികവുമായ ഒട്ടേറെ അപ്രായോഗികതകളുണ്ട്. ആയതിനാല്‍ ഈ ആശയം ഇന്ത്യയില്‍ ഒരിടത്തും നടപ്പായിട്ടില്ല. ഇപ്പോല്‍ പ്രഖ്യാപിച്ചിരിക്കുന്ന സപ്ലൈ ലൈസന്‍സി എന്ന ആശയം നടപ്പാക്കുന്നതു സംബന്ധിച്ച് ഊര്‍ജ്ജമന്ത്രാലയം യാതൊരു വിശദീകരണവും നല്‍കിയിട്ടുള്ളതായി കാണുന്നില്ലെങ്കിലും മേല്‍പ്പറഞ്ഞ പരിമിതി മറികടക്കുന്നതിനും അതുവഴി പുതിയ ഒരു ഇടത്തരക്കാരന് വൈദ്യുതി മേഖലയില്‍ കടന്നുവന്ന് ലാഭം കൊയ്യാന്‍ അവസരമുണ്ടാക്കി കൊടുക്കുന്നതിനും ഉള്ള ലക്ഷ്യമാണ് പുതിയ ഭേദഗതി നിര്‍ദ്ദേശത്തിലുള്ളത് എന്നു വ്യക്തമാണ്.
സപ്ലൈ ലൈസന്‍സി സംബന്ധിച്ച ഭേദഗതികളുടെ ഒരു രത്നച്ചുരുക്കം താഴെ കൊടുക്കുന്നു.
- ഉപഭോക്താക്കള്‍ക്ക് വൈദ്യുതി നല്‍കി പണം വാങ്ങുന്നതിന് നിലവിലുള്ള വിതരണ ലൈസന്‍സികള്‍ക്കുള്ള അധികാരമാണ് സപ്ലൈ ലൈസന്‍സികള്‍ക്കു കൈമാറ്റം ചെയ്യപ്പെടുന്നത്.
- ഒരു പ്രദേശത്ത് ഇനിയും ഒരു വിതരണ ലൈസന്‍സി മാത്രമേ അനുവദിക്കുകയുള്ളൂ. എന്നാല്‍ ഒന്നിലധികം സപ്ലൈ ലൈസന്‍സികള്‍ ആവാം.
- ഉപഭോക്താക്കളില്‍ നിന്ന് അപേക്ഷ സ്വീകരിച്ച് കണക്ഷന്‍ നല്‍കുന്നതിനുള്ള ഉത്തരവാദിത്വം വിതരണ ലൈസന്‍സിക്കാണ്. കണക്ഷന്‍ നല്‍കുക എന്നതിന് ലൈനും മീറ്ററും ഉപഭോക്താവിന് എത്തിച്ചു കൊടുക്കുക എന്നു മാത്രമെ അര്‍ത്ഥമുള്ളൂ. ഉല്‍പാദകരില്‍ നിന്നും ട്രേഡര്‍മാരില്‍ നിന്നും വൈദ്യുതി വാങ്ങി ഉപഭോക്താവിനെത്തിച്ചു കൊടുക്കുക എന്ന ഉത്തരവാദിത്വം സപ്ലൈ ലൈസന്‍സിയുടെതാണ്. അതായത് വിതരണ ലൈസന്‍സിയുടെ കണക്ഷന്‍ കിട്ടിയാലുടന്‍ ഉപഭോക്താവിനു വൈദ്യുതി ലഭിച്ചുതുടങ്ങുകയില്ല എന്നര്‍ത്ഥം. അതിനായി ഉപഭോക്താവ് സപ്ലൈ ലൈസന്‍സിയെ സമീപിക്കണം.
- ട്രാന്‍സ്ഫോര്‍മര്‍ സ്റ്റേഷനുകള്‍, ലൈനുകള്‍, മീറ്റര്‍ എന്നിവ വിതരണ ലൈസന്‍സിയുടെതാണ്. ഇതിനു വേണ്ട ഫിക്സഡ് ചാര്‍ജ്, വേരിയബില്‍ ചാര്‍ജ്, സെക്യൂരിറ്റി എന്നിവ ഉപഭോക്താവില്‍ നിന്നു വാങ്ങാം. ഉപഭോക്താവിനു വൈദ്യുതി നല്‍കുന്നതിനു വേണ്ട പ്രതിഷ്ഠാപനങ്ങളുടെ വിവേചനരഹിതമായ ഓപ്പണ്‍ ആക്സസ് സപ്ലൈ ലൈസന്‍സികള്‍ക്കു നല്‍കാന്‍ വിതരണ ലൈസന്‍സി ബാധ്യസ്ഥമാണ്.
- ലോഡ്ഷെഡ്ഡിംഗോ പവര്‍കട്ടോ കൂടാതെ ഉപഭോക്താവിനാവശ്യമായ വൈദ്യുതി എത്തിക്കുന്നതിനുവേണ്ട വൈദ്യുതി വാങ്ങി ഓപ്പണ്‍ അക്സസ് തരപ്പെടുത്തി വൈദ്യുതി എത്തിക്കുവാന്‍ സപ്ലൈ ലൈസന്‍സിക്കു ഉത്തരവാദിത്വമുണ്ട്. എന്നാല്‍ ഉപഭോക്താവുമായുള്ള കോണ്‍ട്രാക്ട് ഡിമാന്റ് എത്ര തന്നെയായാലും ലഭിക്കുന്ന ഓപ്പണ്‍ അക്സസിന് അനുസരിച്ചുള്ള വൈദ്യുതി നല്‍കുന്നതിനുള്ള ബാധ്യത മാത്രമേ സപ്ലൈ ലൈസന്‍സിക്കുള്ളൂ.
- ഭേദഗതി ചെയ്ത ആക്ട് ബാധകമായി മൂന്നു വര്‍ഷത്തിനകം അല്ലെങ്കില്‍ അതിനപ്പുറം കേന്ദ്ര ഗവണ്മെന്റ് അനുവദിച്ച സമയത്തിനുള്ളില്‍ വൈദ്യുതിയുടെ വിതരണവും സപ്ലൈയും വേര്‍പെടുത്തുന്നതിനുള്ള സംവിധാനം നടപ്പാക്കുവാന്‍ സംസ്ഥാന ഗവണ്മെന്റ് ബാധ്യസ്ഥമാണ്.
- പുതിയ സപ്ലൈ ലൈസന്‍സിക്ക് ഉത്തരവാദിത്വങ്ങള്‍ കൈമാറുന്നതുവരെ നിലവിലുള്ള വിതരണ ലൈസന്‍സി കല്‍പിത (deemed) സപ്ലൈ ലൈസന്‍സിയായി പ്രവര്‍ത്തിക്കണം. ഏതെങ്കിലും വിഭാഗത്തിനോ വിഭാഗങ്ങള്‍ക്കോ ആയി പുതിയ സപ്ലൈ ലൈസന്‍സികള്‍ (subsequent supply licensees) വരുന്നതു വരെ എല്ലാ ഉപഭോക്താക്കള്‍ക്കും വൈദ്യുതി എത്തിച്ചു കൊടുക്കുന്നതിനുള്ള ഉത്തരവാദിത്വം പ്രസ്തുത ലൈസന്‍സിക്കായിരിക്കും (incumbent supply licensee). മാത്രമല്ല പിന്നീടു വന്നിട്ടുള്ള സപ്ലൈ ലൈസന്‍സി ഏതെങ്കിലും ഉപഭോക്താവിന് വൈദ്യുതി എത്തിക്കുന്നതില്‍ വീഴ്ച വരുത്തിയാല്‍ ആ ഉപഭോക്താവിന് വൈദ്യുതി നല്‍കുന്നതിനുള്ള ഉത്തരവാദിത്വം ആദ്യത്തെ (incumbent) സപ്ലൈ ലൈസന്‍സിക്കുണ്ടായിരിക്കും (provider of last resort).
- ഡിസ്ട്രിബ്യൂഷന്‍ ലൈസന്‍സികള്‍ക്കും സപ്ലൈ ലൈസന്‍സികള്‍ക്കും അവരുടെ പരിധിക്കുള്ളില്‍ ആവശ്യാനുസരണം ഫ്രാഞ്ചൈസികളെ ഏര്‍പ്പെടുത്താം. ഈ ഫ്രാഞ്ചൈസികള്‍ക്ക് പ്രത്യേക ലൈസന്‍സുകള്‍ ആവശ്യമില്ല. ഇപ്പോള്‍ പ്രഖ്യാപിച്ചിട്ടുള്ള ഭേദഗതി നിര്‍ദ്ദേശങ്ങളുടെ ഒരു വിശകലനവും അത് വൈദ്യുതി മേഖലയിലുണ്ടാക്കാനിടയുള്ള പ്രത്യാഘാതങ്ങളും താഴെ കുറിക്കുന്നു.
- സപ്ലൈ വിഭാഗത്തെ വിതരണ വിഭാഗത്തില്‍ നിന്ന് അടര്‍ത്തിമാറ്റിയതു കൊണ്ട് ഗുണമേന്‍മയിലോ പ്രവര്‍ത്തനമികവിലോ വൈദ്യുതിയുടെ വിതരണ വിലയിലോ എന്തെങ്കിലും ദോഷഫലമല്ലാതെ മെച്ചമുണ്ടാക്കാന്‍ യാതൊരു സാധ്യതയുമില്ല. നിലവിലുള്ള വിതരണ ശൃംഖലയില്‍ കൂടി തന്നെയാണ് ഉപഭോക്താവിന് വൈദ്യുതി ലഭിക്കുക.
- നിലവില്‍ ഉപഭോക്താക്കള്‍ക്ക് വേണ്ട വൈദ്യുതി എത്തിക്കുന്നതും അതിനു വേണ്ട വിതരണ ശൃംഖല വികസിപ്പിക്കുന്നതും പരിപാലിക്കുന്നതും വിതരണ ലൈസന്‍സി തന്നെയാണ്. ഇതില്‍ വൈദ്യുതി വാങ്ങി അത് വിതരണ ശൃംഖലയിലൂടെ ഒഴുക്കി ഉപഭോക്താവിനെത്തിക്കുന്ന 'സോഫ്റ്റ് ബിസിനസ്സ്' മാത്രം സപ്ലൈ ലൈസന്‍സിക്ക് കൈമാറ്റപ്പെടുന്നു. വിതരണ ശൃംഖലയുടെ വികസനം, അതില്‍ പ്രതീക്ഷിക്കുന്ന വൈദ്യുതിയുടെ അളവിന്റെ വര്‍ദ്ധനവിനനുസരിച്ച് നടക്കേണ്ട ഒരു പ്രക്രിയയാണ്. വിതരണവും സപ്ലൈയും വേര്‍പിരിക്കുന്നതോടെ ഈ മേഖലകള്‍ തമ്മില്‍ നിലവിലുള്ള ഏകോപനം താറുമാറാകും.
- ഭേദഗതി നിര്‍ദ്ദേശങ്ങള്‍ പല പ്രായോഗിക പ്രശ്നങ്ങളും ഉയര്‍ത്തുന്നു. സപ്ലൈ ലൈസന്‍സിയും ഉപഭോക്താവും തമ്മില്‍ ഒപ്പുവച്ചിട്ടുള്ള കോണ്‍ട്രാക്ട് ഡിമാന്റ് അല്ലെങ്കില്‍ കണക്ടഡ് ലോഡ് പ്രകാരമാണ് ഓരോ ഉപഭോക്താവിനും വൈദ്യുതി ലഭ്യമാക്കേണ്ടത്. ഒരു പ്രദേശത്തു തന്നെ നിരവധി സപ്ലൈ ലൈസന്‍സികള്‍ ആകാമെന്നതിനാല്‍ അവര്‍ തമ്മില്‍ വിതരണ ലൈസന്‍സിയുടെ പക്കല്‍ ഓപ്പണ്‍ ആക്സസിന് മല്‍സരിക്കും. വൈദ്യുതി വാങ്ങിയതിന്റേയും ഓപ്പണ്‍ അക്സസ് ലഭിച്ചതിന്റെയും അടിസ്ഥാനത്തിലായിരിക്കും സപ്ലൈ ലൈസന്‍സി ഉപഭോക്താവിന് വൈദ്യുതി എത്തിക്കുക. എന്നാല്‍ യഥാര്‍ത്ഥ വൈദ്യുതി ഉപയോഗം അപ്പപ്പോള്‍ കണക്ട് ചെയ്യപ്പെടുന്ന ലോഡിനനുസരിച്ചായിരിക്കും. ഇത് കണക്കില്‍ കവിഞ്ഞ വൈദ്യുതി പ്രവാഹത്തിനും തന്‍മൂലമുള്ള പ്രശ്നങ്ങള്‍ക്കും കാരണമാകുന്നു. ഇ.എച്ച്.റ്റി ലൈനുകളില്‍ തന്നെ ഇത് ഗ്രിഡ് തകരാറുകലിലേയ്ക്കും കണ്‍ട്രോള്‍, പ്രൊട്ടക്ഷന്‍ പ്രശ്നങ്ങളിലേയ്ക്കും നയിക്കുന്നുവെങ്കില്‍, വേണ്ടത്ര നിയന്ത്രണ സംവിധാനങ്ങളോ മീറ്ററിംഗ് സംവിധാനങ്ങളോ ഇല്ലാത്ത വിതരണ മേഖലയില്‍ ഇത് എന്തെല്ലാം പ്രശ്നങ്ങള്‍ക്ക് കാരണമാകും എന്ന് ഊഹിക്കാവുന്നതേയുള്ളൂ.
- മുന്നോട്ടു വച്ചിട്ടുള്ള ഭേദഗതികള്‍ നിലവില്‍ വരുന്നതോടെ ഉപഭോക്താക്കളുടെ കഷ്ടതകള്‍ ഏറെയായിരിക്കും. കണക്‌ഷന്‍ കിട്ടണമെങ്കില്‍ രണ്ട് ഏജന്‍സികളെ സമീപിക്കണം. രണ്ടു കൂട്ടര്‍ക്കും പണമടയ്ക്കണം. കണക്‌ഷന്‍ ലഭിച്ചു കഴിഞ്ഞാലും സേവനങ്ങള്‍ക്കായി രണ്ടു കൂട്ടരേയും ബന്ധപ്പെടണം. ചില സേവനങ്ങള്‍ ഇരു കൂട്ടരും കൂടി ഏകോപനം നടത്തി നല്‍കേണ്ടവയുമാകാം. ഉദാഹരണത്തിന് വോള്‍ട്ടേജ് ഇല്ലാത്തതിനു കാരണം ഒഴുകുന്ന കറണ്ടിന്റെ ആധിക്യമോ വിതരണ സംവിധാനങ്ങളുടെ അപര്യാപ്തതയോ ആകാം. ആദ്യത്തേതിനുത്തരവാദി സപ്ലൈ ലൈസന്‍സിയും രണ്ടാമത്തേതിനുത്തരവാദി വിതരണ ലൈസന്‍സിയുമാണ്. രണ്ടുപേരും പരസ്പരം പഴിചാരി ഉപഭോക്താവിനെ അക്ഷരാര്‍ത്ഥത്തില്‍ ഇരുട്ടിലാക്കാനിടയുണ്ട്. അഡീഷണല്‍ ലോഡ് ആവശ്യമാണെങ്കില്‍ ഉപഭോക്താവ് ആരെ സമീപിക്കും? സപ്ലൈകോഡും ഡിസ്ട്രിബ്യൂഷന്‍ കോഡും നിലവില്‍ വന്നാലെ ഇക്കാര്യങ്ങളില്‍ വ്യക്തതയുണ്ടാവുകയുള്ളൂ. അവ തയ്യാറാക്കുന്നത് ആക്ടിന്റെ ഭേദഗതി നിയമമായതിനു ശേഷം മാത്രവും. അതായത് ഉപഭോക്താവിന്റെ ഗതിയെന്താകും എന്ന കാര്യം അനിശ്ചിതത്വത്തിലാണ്. ഉപഭോക്താവിനു വേണ്ടിയല്ലല്ലോ, ഇടത്തട്ടുകാര്‍ക്ക് പണമുണ്ടാക്കാനാണല്ലോ ഈ ഭേദഗതി!
- ചെറിപിക്കിംഗ് : പുതിയ സപ്ലൈ ലൈസന്‍സികള്‍ക്ക് ലാഭസാധ്യതയുള്ള ഏതെങ്കിലും ഉപഭോക്തൃ വിഭാഗത്തിന് വൈദ്യുതി നല്‍കുന്നതിനു മാത്രമായി കടന്നുവരാം. ഉദാഹരണത്തിന് തിരുവനന്തപുരം കോര്‍പ്പറേഷനിലെ വാണിജ്യ ഉപഭോക്താക്കള്‍ക്ക് വൈദ്യുതി നല്‍കുന്നതിനു മാത്രമായി ഒരു സ്ഥാപനത്തിന് സപ്ലൈ ലൈസന്‍സെടുക്കാം. നിലവിലുള്ള വിതരണ ലൈസന്‍സി എട്ടു രൂപയ്ക്കു മുകളില്‍ വൈദ്യുതി നല്‍കിയിരുന്ന ഈ വിഭാഗത്തിന് അതില്‍ കുറഞ്ഞ വിലയ്ക്ക് വൈദ്യുതി നല്‍കാന്‍ പുതിയ സ്ഥാപനത്തിനു കഴിയും. കാരണം ഗാര്‍ഹിക ഉപഭോക്താക്കള്‍ക്കും കാര്‍ഷിക ഉപഭോക്താക്കള്‍ക്കും ഒന്നും വൈദ്യുതി നല്‍കുന്ന ഭാരം അവര്‍ക്കില്ലല്ലോ. മാത്രമല്ല വൈദ്യുതി വാങ്ങല്‍ ചിലവ് രണ്ടു കൂട്ടര്‍ക്കും ഒരുപേലെയായിരിക്കും. (നിലവില്‍ കെ.എസ്.ഇ.ബി.ക്ക് ജലവൈദ്യുത നിലയങ്ങളും മറ്റും ഉള്ള അവസ്ഥയില്‍ കാര്യങ്ങള്‍ കുറച്ചു വ്യത്യസ്ഥമായിരിക്കും. എന്നാല്‍ ഉല്‍പാദനവും വിതരണവും വേര്‍തിരിക്കപ്പെട്ടാല്‍ നിലവിലുള്ള വിതരണ സ്ഥാപനത്തിന്റെ സ്ഥിതി പരിതാപകരമായിരിക്കും). ഭേദഗതിയില്‍ പറഞ്ഞിരിക്കുന്ന മറ്റൊരു വ്യവസ്ഥ, പുതിയ സപ്ലൈ ലൈസന്‍സി (subsequent supply licensee) അയാളുടെ ഏതെങ്കിലും ഉപഭോക്താവിന് വൈദ്യുതി നല്‍കുന്നതില്‍ പരാജയപ്പെട്ടാല്‍ പ്രസ്തുത ഉപഭോക്താവിന് വൈദ്യുതി നല്‍കാന്‍ നിലവിലുള്ള സപ്ലൈ ലൈസന്‍സി (incumbent supply licensee) ക്ക് ബാധ്യതയുണ്ടായിരിക്കും എന്നതാണ്. അതായത് സാമ്പത്തികമായി മെച്ചമില്ലാത്ത ഉപഭോക്താക്കളുടെ കാര്യത്തില്‍ പുതിയ സപ്ലൈ ലൈസന്‍സിക്ക് 'സൗകര്യപൂര്‍വ്വം പരാജയപ്പെടാം'. എന്തായാലും നിലവിലുള്ള സപ്ലൈ ലൈസന്‍സി അടച്ചുപൂട്ടപ്പെടുകയും അതോടെ അവരുടെ ഉപഭോക്താക്കളായ പാവപ്പെട്ടവര്‍ വഴിയാധാരമാവുകയും ചെയ്യും. subsequent-ന്റെ പക്കല്‍ നിന്നും വലിയ വിലയ്ക്ക് വൈദ്യുതിയെടുക്കാന്‍ പ്രാപ്തിയുള്ളവര്‍ മാത്രം വെളിച്ചം കാണും.
- ക്രോസ് സബ്സിഡി ഇല്ലാതാക്കുന്നതിനുള്ള കര്‍ശന നിര്‍ദ്ദേശങ്ങള്‍ ഭേദഗതിയിലുണ്ട്. എന്നാല്‍ മേല്‍പറഞ്ഞ രീതിയില്‍ കാര്യങ്ങള്‍ പുരോഗമിക്കുന്നതോടെ പ്രത്യേക ഇടപെടലുകള്‍ ഇല്ലാതെ തന്നെ ക്രോസ് സബ്സിഡി അവസാനിക്കും. ക്രോസ് സബ്സിഡി ആവശ്യമുള്ള ഉപഭോക്താക്കള്‍ തന്നെ ഇല്ലാതാവുന്നതോടെ പിന്നെന്തു ക്രോസ് സബ്സിഡി!
- മേല്‍പ്പറഞ്ഞ പ്രശ്നങ്ങള്‍ ഉണ്ടാവുമ്പോള്‍ നിലവിലുള്ള ആക്ടിലെ വ്യവസ്ഥകള്‍ പ്രകാരം സംസ്ഥാന ഗവണ്മെന്റുകള്‍ക്ക് ഇടപെടാം. എന്നാല്‍ ഭേദഗതികള്‍ പാസ്സാവുന്നതോടെ സംസ്ഥാന ഗവണ്മെന്റുകളുടെ നിയന്ത്രണവും അവസാനിക്കും. ഫെഡറല്‍ സംവിധാനത്തിനേല്‍ക്കുന്ന ഈ തിരിച്ചടിയോടെ എല്ലാം പൂര്‍ത്തിയാവും.
2003-ലെ ഇലക്ട്രിസിറ്റി ആക്ടിനു രൂപം കൊടുത്തത്, നിലവിലുള്ള വൈദ്യുതി ഉല്‍പ്പാദന കമ്മി പരിഹരിക്കുക, വൈദ്യുതി ഇല്ലാത്ത എല്ലാവര്‍ക്കും അത് പ്രാപ്യമാക്കുക, മല്‍സരത്തിലൂടെ ഗുണമേന്‍മയുള്ള വൈദ്യുതി കുറഞ്ഞ വിലയ്ക്ക് ഉപഭോക്താക്കള്‍ക്ക് ലഭ്യമാക്കുക, ഊര്‍ജ്ജ നഷ്ടം കുറയ്ക്കുക, വൈദ്യുതി ബോര്‍ഡുകളെ സംരക്ഷിക്കുന്നതിനുള്ള ഗവണ്മെന്റിന്റെ സാമ്പത്തിക ബാധ്യത ഇല്ലാതാക്കുക തുടങ്ങിയ ലക്ഷ്യങ്ങള്‍ വച്ചുകൊണ്ടാണ്. എന്നാല്‍ നിയമം നടപ്പാക്കി 10 വര്‍ഷം കഴിഞ്ഞപ്പോള്‍, ഈ ലക്ഷ്യങ്ങളില്‍ ഒന്നും കൈവരിച്ചില്ല എന്നു മാത്രമല്ല കാര്യങ്ങള്‍ കൂടുതല്‍ മോശമാവുകയാണുണ്ടായത്. നിയമത്തില്‍ പറഞ്ഞ കാര്യങ്ങള്‍ നടപ്പിലാക്കാത്ത കേരളം പോലുള്ള സംസ്ഥാനങ്ങള്‍ മാത്രമാണ് എന്തെങ്കിലും തരത്തിലുള്ള പുരോഗതി കൈവരിച്ചിട്ടുള്ളത്. എന്നാല്‍ പരിഷ്കാരങ്ങള്‍ നടപ്പാക്കുന്നതിലെ ഊര്‍ജ്ജസ്വലത കുറവാണ് പരാജയങ്ങള്‍ക്കു കാരണം എന്ന് കേന്ദ്ര സര്‍ക്കാര്‍ വാദിക്കുന്നു. അതിനുള്ള വഴിയൊരുക്കുന്നതിനായിരിക്കണം പുതിയ ഭേദഗതികളും അവതിപ്പിച്ചിരിക്കുന്നത്. അനുഭവങ്ങള്‍ പാഠമാക്കി ഇവയെ എതിര്‍ക്കാന്‍ ഇന്ത്യന്‍ ജനസമൂഹത്തിനു കഴിയട്ടെ എന്നു മാത്രം ആശിക്കുന്നു.

 

Add comment


Security code
Refresh

Random Videos

You need Flash player 6+ and JavaScript enabled to view this video.
Title: Power Quiz 2015 Final - Part-1

Latest Comments

Banner

Reference Book

 

Reference Book on Power

Electrical Engineering-- D' 1/4 Size Hard bound-- 1424 Pages-- Just Rs.1000/- only &n...

Visitors Counter

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
mod_vvisit_counterToday4068
mod_vvisit_counterYesterday4572
mod_vvisit_counterThis Month137054
mod_vvisit_counterLast Month142377

Online Visitors: 80
IP: 54.198.245.233
,
Time: 20 : 27 : 52