KSEBOA - KSEB Officers' Association

Friday
Jul 21st
Text size
  • Increase font size
  • Default font size
  • Decrease font size
Home വാര്‍ത്തകള്‍ ചോരുന്ന ബക്കറ്റും കാലിയാവുന്ന ഖജനാവും

ചോരുന്ന ബക്കറ്റും കാലിയാവുന്ന ഖജനാവും

PDF
Hits smaller text tool iconmedium text tool iconlarger text tool icon
Disinvestmentഇന്ത്യന്‍ വൈദ്യുതി മേഖലയുടെ സ്ഥിതിയെക്കുറിച്ച് ഏകദേശം പത്ത് വര്‍ഷം മുന്‍പുള്ള പ്രസ്താവനയാണ് തലക്കെട്ടില്‍ ഉപയോഗിച്ചിരിക്കുന്നത്. വൈദ്യുതി നിയമം 2003 ന്റെ ആദ്യരൂപമായ വൈദ്യുതി ബില്‍ 2000 ന് സ്വീകാര്യത നേടിയെടുക്കാന്‍ കേന്ദ്ര ഗവണ്‍മെന്റ് അന്ന് രാജ്യ വ്യാപകമായി റോഡ് ഷോ ആസൂത്രണം ചെയ്തി—രുന്നു. ഇത്തരത്തില്‍ കേരള സംസ്ഥാന വൈദ്യുതി ബോര്‍ഡിലെ ഉന്നത ഉദ്യോഗസ്ഥര്‍ക്കായി സംഘടിപ്പിച്ച പരിപാടിയില്‍ ബില്ലിന്റെ പ്രചാരകര്‍ ഇന്ത്യന്‍ വൈദ്യുതി മേഖലയ്ക്ക് നല്കിയ വിശേഷണമായിരുന്നു അത്.

 ഇന്ത്യയില്‍ അന്ന് നിലവിലുണ്ടായിരുന്ന വൈദ്യുതി ബോര്‍ഡുകളെല്ലാം പൊട്ടിപ്പൊളിഞ്ഞ് ആകെ ചോരുന്ന ബക്കറ്റുകള്‍ ആണെന്നാണ് അവര്‍ ചിത്രീകരിച്ചത്. ഗവണ്‍മെന്റുകള്‍ വിവിധ ക്ഷേമ പ്രവര്‍ത്തനങ്ങള്‍ക്കായി നീക്കിവെക്കേണ്ട പണമാകെ ഈ പൊളിഞ്ഞ ബക്കറ്റിലേക്ക് പകരുക വഴി പാഴായി പോകുകയാണെന്നാണ് വിവക്ഷ. പണം ചോരുന്നതാകട്ടെ വന്‍തോതിലുള്ള പ്രസരണ വിതരണ വാണിജ്യ നഷ്ടം (വൈദ്യുതി മോഷണമെന്ന് സാരം) വഴിയും. ഇതിനിടയാക്കുന്നത് ബോര്‍ഡുകളുടെ കാര്യക്ഷമതാ രാഹിത്യമാണ് എന്ന് തുടര്‍ന്ന് വിശദീകരണവുമുണ്ട്. ഈ സ്ഥിതിക്കുള്ള സമഗ്ര പരിഹാരമാണ് പുതിയ നിയമ നിര്‍മ്മാണം. പൊളിഞ്ഞ് ചോരുന്ന ബോര്‍ഡുകള്‍ക്ക് പകരം പുത്തന്‍ കാര്യശേഷിയുള്ള കമ്പനികള്‍ നിയമം നിലവില്‍ വരുന്നതോടെ പ്രവര്‍ത്തനക്ഷമമാകും എന്ന് പ്രചാരണത്തിന്റെ സാരം.


നിയമം നിലവില്‍ വരികയും ഒട്ടനവധി പരിഷ്കരണങ്ങള്‍ നടപ്പിലാകുകയും ചെയ്തശേഷമുള്ള അനുഭവം കാണിക്കുന്നത് പ്രശ്ന പരിഹാരത്തിന് പകരം സംഭവിച്ചിരിക്കുന്നത് അവ കൂടുതല്‍ വഷളായിരിക്കുന്നു എന്നാണ്. ഇത് ഒട്ടേറെ ചര്‍ച്ച ചെയ്യപ്പെട്ട വിഷയമാണ്. കേന്ദ്ര ഗവണ്‍മെന്റ് ഏജന്‍സിയായ പവര്‍ ഫിനാന്‍സ് കോര്‍പ്പറേഷന്‍ വര്‍ഷാവര്‍ഷം തയ്യാറാക്കുന്ന പെര്‍ഫോര്‍മന്‍സ് റിപ്പോര്‍ട്ടുകള്‍ പ്രകാരം ഇന്ത്യയൊട്ടാകെ വൈദ്യുതി ബോര്‍ഡുകള്‍ക്ക് സംസ്ഥാന ഗവണ്‍മെന്റുകള്‍ 2003-04 ല്‍ നല്‍കേണ്ടിയിരുന്ന സബ്സിഡി 10,893 കോടി ആയിരുന്നത് 2009-10 ല്‍ 34001 കോടി രൂപയായി വര്‍ദ്ധിച്ചു. പ്രസരണ വിതരണ വാണിജ്യ നഷ്ടത്തില്‍ (AT&C) എന്നാല്‍ നാമമാത്രമായാണെങ്കിലും കുറവ് കാണിക്കുന്നുണ്ട്. 2003 - 04 ലെ 35.5 ശതമാനത്തില്‍ നിന്നും 2009 - 10 ആയപ്പോഴേക്കും 27.15 ശതമാനമായി അത് കുറഞ്ഞു. എന്നാല്‍ വിതരണ സ്ഥാപനങ്ങളുടെ ആകെ നഷ്ടം 2003-04 ല്‍ (സബ്സിഡി ഒഴിവാക്കി) 9,106 കോടിയായിരുന്നത് 2009-10 ല്‍ 63,548 കോടിയായി കുതിച്ചുയര്‍ന്നു.
രണ്ട് കാര്യങ്ങള്‍ ഇതില്‍ നിന്നും വ്യക്തമാണ്. പുതിയ നിയമവും പരിഷ്കരണവും ലക്ഷ്യം വെച്ചതായി പുറമേ പറഞ്ഞവയൊന്നും കൈവരിച്ചിട്ടില്ല, വന്‍തോതില്‍ പുറകോട്ടടി ഉണ്ടാവുകയും ചെയ്തു. ചോര്‍ച്ചയുടെ കാരണം AT&C loss മാത്രവുമല്ല.

ഇക്കാര്യങ്ങള്‍ മുന്‍പ് തന്നെ വ്യക്തമാക്കിയിരുന്നെങ്കിലും പൊടുന്നനവെ ദേശീയ മാധ്യമങ്ങളില്‍ വിതരണ യൂട്ടിലിറ്റികളുടെ നഷ്ടം ചര്‍ച്ചാ വിഷയമാകുവാന്‍ മറ്റ് ചില കാര്യങ്ങള്‍കൂടി ഇടയായിട്ടുണ്ട്. നഷ്ടം പെരുകിയ വിവിധ യൂട്ടിലിറ്റികള്‍ കടം തിരിച്ചടയ്ക്കുന്നതില്‍ വീഴ്ച വരുത്തിയതും വൈദ്യുതി ഉല്‍പാദകരില്‍ നിന്നും വൈദ്യുതി വാങ്ങിയ ഇനത്തില്‍ വലിയ തോതില്‍ കുടിശ്ശിക വരുത്തിയതും സമ്പദ്ഘടനയിലാകെ വലിയ ചലനങ്ങള്‍ സൃഷ്ടിച്ചിട്ടുണ്ട്. വൈദ്യുതി വിതരണ സ്ഥാപനങ്ങളുടെ സാമ്പത്തിക സ്ഥിതിയെക്കുറിച്ച് പഠിക്കുവാന്‍ കംപ്ട്രോളര്‍ ആന്റ് ആഡിറ്റ് ജനറല്‍ ആയിരുന്ന ശ്രീ. വി.കെ.ഷുംഗ്ളുവിന്റെ നേതൃത്വത്തില്‍ ഉന്നതതല സമിതിയെ നിയോഗിക്കുവാനും വികസിച്ചുവന്ന ഈ സാഹചര്യങ്ങള്‍ ഇടയാക്കി. സമിതിയുടെ റിപ്പോര്‍ട്ട് ഇപ്പോള്‍ പ്ളാനിംഗ് കമ്മീഷന് സമര്‍പ്പിച്ചിരിക്കുകയാണ്. റിപ്പോര്‍ട്ട് പുറത്തുവിട്ട കണക്കുകളും മുന്നോട്ടു വെച്ച നിഗമനങ്ങളും ശുപാര്‍ശകളും ഇപ്പോള്‍ വലിയ ചര്‍ച്ചയ്ക്ക് വഴി വച്ചിരിക്കുന്നു.

2004-05നും 2009-10നും ഇടയിലുള്ള കണക്കുകളാണ് ഉന്നതതല സമിതി പരിശോധിക്കുന്നത്. PFC റിപ്പോര്‍ട്ടിലൂടെ പുറത്തുവന്നിട്ടുള്ള കണക്കുകളും സമിതി റിപ്പോര്‍ട്ടില്‍ ലഭ്യമായ കണക്കുകളും തമ്മില്‍ പൂര്‍ണ്ണമായും യോജിക്കുന്നില്ല എന്ന് കാണാന്‍ കഴിയും. PFC റിപ്പോര്‍ട്ടിലെ കണക്കുകള്‍ പ്രകാരമുള്ള നഷ്ടം, സബ്സിഡി, എന്നിവ സമിതിയുടെ കണക്കുകളേക്കാള്‍ അല്പം ഉയര്‍ന്നതാണ്. സമിതി 15 ഇന്ത്യന്‍ സംസ്ഥാനങ്ങളുടെ മാത്രം കണക്കിന്റെ അടിസ്ഥാനത്തിലാണ് റിപ്പോര്‍ട്ട് തയ്യാറാക്കിയിരിക്കുന്നത് എന്നതാണ് ഈ വ്യത്യാസത്തിനു കാരണം. അഥവാ ദേശീയ അടിസ്ഥാനത്തിലുള്ള പൂര്‍ണ്ണമായ കണക്കുകള്‍ക്ക് PFC റിപ്പോര്‍ട്ടിനെ തന്നെ ആശ്രയിക്കുന്നതാണ് ഉചിതം. എന്നാല്‍ സമിതിയുടെ റിപ്പോര്‍ട്ടിന് പ്രാധാന്യം കൈവരുന്നത് കേവലമായ കണക്കുകളുടെ അടിസ്ഥാനത്തിലല്ല, മറിച്ച് അതിലെ നിഗമനങ്ങളുടെയും ശുപാര്‍ശകളുടെയും അടിസ്ഥാനത്തിലാണ്. ഒപ്പം 2017 ഓടെ ഈ 15 സംസ്ഥാനങ്ങളിലെ വൈദ്യുതി വിതരണ സ്ഥാപനങ്ങളുടെ നഷ്ടം എന്താവും എന്ന ചില സൂചനകളും റിപ്പോര്‍ട്ട് നല്കുന്നുണ്ട്. ഗൌരവമേറിയ പല നടപടികള്‍ക്കും റിപ്പോര്‍ട്ട് വഴിവെക്കും എന്നാണ് പൊതുവില്‍ പ്രതീക്ഷിക്കപ്പെടുന്നത്.

സമിതി റിപ്പോര്‍ട്ടിലെ പ്രധാനപ്പെട്ട ചില കണ്ടെത്തലുകളേയും നിഗമനങ്ങളേയും താഴെപ്പറയും പ്രകാരം സംഗ്രഹിക്കാം.

  • ഇന്ത്യയില്‍ വൈദ്യുതി ബോര്‍ഡുകള്‍ നിലവിലുണ്ടായിരുന്ന 3 സംസ്ഥാനങ്ങള്‍ (ബീഹാര്‍, ജാര്‍ഖണ്ഡ്, കേരളം) ഒഴികെ മറ്റെല്ലായിടത്തും നിയമം അനുശാസിക്കും പ്രകാരമുള്ള വിഭജനം പൂര്‍ത്തിയായി കഴിഞ്ഞു.
  • വിഭജനം മെച്ചപ്പെട്ട ഫലങ്ങള്‍ നല്കുമെന്ന് പ്രതീക്ഷിച്ചിരുന്നെങ്കിലും അതുണ്ടായിട്ടില്ല.
  • ചില സംസ്ഥാനങ്ങളില്‍ പ്രസരണ വിതരണ നഷ്ടം കുറഞ്ഞിട്ടുണ്ടെങ്കില്‍ വിഭജനവുമായി അതിനെന്തെങ്കിലും ബന്ധമുള്ളതായി കണക്കാക്കാന്‍ കഴിയില്ല.
  • ഓപ്പണ്‍ അക്സസ് സംവിധാനം ഫലപ്രദമായില്ല
  • വിതരണ യൂട്ടിലിറ്റികളുടെ കണക്കുകള്‍ കൃത്യത ഉള്ളതല്ല - ഗൌരവമേറിയ അപാകതകള്‍ അതില്‍ കടന്ന് കൂടുന്നുണ്ട്.
  • പ്രവര്‍ത്തന ക്ഷമത ഉടമസ്ഥതയുമായി (പൊതു ഉടമസ്ഥത, സ്വകാര്യ ഉടമസ്ഥത, പൊതു സ്വകാര്യ പങ്കാളിത്തം) ബന്ധപ്പെട്ടിരിക്കുന്നു.
  • വിതരണ യൂട്ടിലിറ്റികളുടെ പ്രവര്‍ത്തനപരവും നടത്തിപ്പുമായി ബന്ധപ്പെട്ട പ്രശ്നങ്ങളും റെഗുലേറ്ററി സംവിധാനത്തിന്റെ അപര്യാപ്തതകളും ആണ് നഷ്ടത്തിന് വഴി വെയ്ക്കുന്നത്.
  • പ്രവര്‍ത്തനപരവും നടത്തിപ്പുമായി ബന്ധപ്പെട്ട പ്രശ്നങ്ങള്‍ AT&C Loss മായി നേരിട്ട് ബന്ധപ്പെട്ടതാണ്. റഗുലേറ്ററി സംവിധാനം അതിന്റെ നിയമപരമായ ഉത്തരവാദിത്വങ്ങള്‍ നിറവേറ്റുന്നതില്‍ പരാജയപ്പെട്ടിരിക്കുന്നു.
  • ഏതാനും പൊതുമേഖലാ, സ്ഥാപനങ്ങള്‍ മികച്ച നിലയിലുള്ള പ്രവര്‍ത്തനം കാഴ്ചവെച്ചിട്ടുണ്ട് എന്നാല്‍ രാഷ്ട്രീയ ഇച്ഛാശക്തിയുമായി ഈ പ്രവര്‍ത്തന മികവ് നേരിട്ട് ബന്ധപ്പെട്ടിരിക്കുന്നു. രാഷ്ട്രീയ മാറ്റങ്ങള്‍ ഇവയുടെ പ്രവര്‍ത്തനത്തില്‍ വലിയ ഏറ്റിറക്കങ്ങള്‍ക്ക് ഇടയാക്കുന്നു.

 
സമിതി ഒട്ടനവധി ശുപാര്‍ശകള്‍ മുന്നോട്ട് വച്ചിട്ടുണ്ട്. ഏറെ ചര്‍ച്ചചെയ്യപ്പെടുന്നത് താഴെ കൊടുക്കുന്നു.

 

  • ചിട്ടയായ കമ്പ്യൂട്ടര്‍വല്‍ക്കരണത്തിലൂടെ മാത്രമേ കൃത്യതയുള്ള കണക്കുകള്‍ തയ്യാറാക്കാന്‍ കഴിയൂ.
  • നിര്‍ദ്ദിഷ്ട R-APDRP പദ്ധതി കമ്പ്യൂട്ടര്‍ വല്‍ക്കരണത്തിന് ഒട്ടേറെ ഊന്നല്‍ നല്‍കുന്നുണ്ടെങ്കിലും ശരിയായ വിധം സാമ്പത്തിക നിലയെകുറിച്ചുള്ള വിവരങ്ങള്‍ ലഭ്യമാക്കുന്നതിന് അത് പ്രയോജനപ്രദമല്ല.
  • സുപ്രധാന മേഖലകളുടെ (വിവര സാങ്കേതിക വിദ്യയുടെ ഉപയോഗം ഇതില്‍ത്തന്നെ പ്രാധാന്യമേറിയതാണ്.) ഔട്ട്സോഴ്സിംഗ് ഗുരുതരമായ പ്രത്യാഘാതങ്ങള്‍ക്ക് വഴി വെയ്ക്കും. അത് ഒഴിവാക്കേണ്ടതാണ്.
  • റെഗുലേറ്ററി കമ്മീഷനുകളുടെ നിയമനം അവരുടെ സ്വതന്ത്ര പ്രവര്‍ത്തനം ഉറപ്പുവരുത്തുന്ന രീതിയിലാകണം. അംഗങ്ങളുടെ തിരഞ്ഞെടുപ്പ് രീതി മാറ്റണം. 5 വര്‍ഷത്തിനുള്ളില്‍ ഗവണ്‍മെന്റ് പദവി വഹിച്ചിരുന്നവരെ നിയമനത്തിന് അയോഗ്യരാക്കണം.
  • റെഗുലേറ്ററി കമ്മീഷനുകളുടെ പ്രവര്‍ത്തനം നിരന്തരം നിരീക്ഷിക്കാന്‍ കേന്ദ്ര ഗവണ്‍മെന്റിനു കീഴില്‍ സംവിധാനങ്ങള്‍ ഒരുക്കണം. പ്രവര്‍ത്തിക്കാത്ത കമ്മീഷന്‍ അംഗങ്ങളെ പുറത്താക്കാന്‍ വ്യവസ്ഥ ഉണ്ടാക്കണം.
  • AT&C Loss ഉയര്‍ന്നു നില്ക്കുന്ന പ്രദേശങ്ങളില്‍ ഉപഭോക്താക്കള്‍ക്ക് സര്‍ച്ചാര്‍ജ് ഏര്‍പ്പെടുത്തണം.
  •  സ്വകാര്യ ഉടമസ്ഥത മാത്രമേ മികച്ച പ്രവര്‍ത്തന ക്ഷമത ലഭ്യമാക്കുന്നുള്ളു. ഇതില്‍ തന്നെ ഫ്രാഞ്ചൈസി സംവിധാനമാണ് മികച്ചത്.
  • നിശ്ചിതകാലയളവിലേക്ക് മാത്രമായി ( ഉദാ. 15 വര്‍ഷം) ഫ്രാഞ്ചൈസി സംവിധാനം ഏര്‍പ്പെടുത്തുന്നത് തുടക്കത്തില്‍ ഏറെ പ്രയോജനം നല്കുമെങ്കിലും ദീര്‍ഘകാലാടിസ്ഥാനത്തില്‍ നേട്ടം നിലനിര്‍ത്താന്‍ കഴിയില്ല. അതിനാല്‍ നിശ്ചിത കാലയളവിന് ശേഷം ഫ്രാഞ്ചൈസികളെ അതാത് പ്രദേശത്തെ സ്ഥിരം ലൈസന്‍സികള്‍ ആക്കും എന്ന് വ്യവസ്ഥ ചെയ്യണം.
  • ഇന്ത്യയിലെ ഊര്‍ജ്ജ ഉപയോഗത്തിന്റെ 40 ശതമാനവും കൈകാര്യം ചെയ്യുന്നു എന്ന് കണക്കാക്കുന്ന 255 പട്ടണങ്ങള്‍ ഇപ്രകാരം ഫ്രാഞ്ചൈസികള്‍ക്ക് കൈമാറണം. (ഇപ്രകാരം കണ്ടെത്തിയിട്ടുള്ള ഇന്ത്യന്‍ പട്ടണങ്ങളില്‍ കേരളത്തില്‍ നിന്നുള്ള തിരുവനന്തപുരം, കോഴിക്കോട്, എറണാകുളം, കൊല്ലം, തൃശൂര്‍, പാലക്കാട് കോട്ടയം, ആലപ്പുഴ, അരൂര്‍, കണ്ണൂര്‍ എന്നീ R-APDRP പട്ടണങ്ങളും ഉള്‍പ്പെടും)
  • നിലവിലുള്ള വായ്പകള്‍ തിരിച്ചടയ്ക്കുന്നതിനുള്ള സമയം ദീര്‍ഘിപ്പിക്കണം. ഈ ദീര്‍ഘിപ്പിച്ച സമയക്രമമനുസരിച്ചും വായ്പ തിരിച്ചടവിന് കഴിയുന്നില്ലെങ്കില്‍ റിസര്‍വ്വ് ബാങ്കിന്റെ നിയന്ത്രണത്തിലുള്ള  SPV (Special Purpose Vehicle) രൂപീകരിച്ച് അത്തരം വായ്പകള്‍ ഏറ്റെടുക്കണം.
  • വായ്പകള്‍ പുനഃസംഘടിപ്പിക്കുന്നതിനും ഏറ്റെടുക്കുന്നതിനുമുള്ള പ്രധാനപ്പെട്ട വ്യവസ്ഥ മേല്‍ തിരഞ്ഞെടുത്ത പട്ടണങ്ങള്‍ ഫ്രാഞ്ചൈസികള്‍ക്ക് കൈമാറുക എന്നതാണ്.


വൈദ്യുതി മേഖലയുടെ സാമ്പത്തിക സ്ഥിതി സംബന്ധിച്ച് ഞെട്ടിക്കുന്ന ഒട്ടനവധി വിശദാംശങ്ങളും വിശകലനങ്ങളുമാണ് സമിതി റിപ്പോര്‍ട്ടില്‍ ഉള്ളത്. 2006 ല്‍ നിന്നും 2010 ആയപ്പോഴേക്ക് 15 സംസ്ഥാനങ്ങളിലെ മാത്രം വൈദ്യുതി വിതരണ സ്ഥാപനങ്ങളുടെ സഞ്ചിത നഷ്ടം 19,000 കോടി രൂപയില്‍ നിന്നും 1.07 ലക്ഷം കോടി രൂപയായി ഉയര്‍ന്നിരിക്കുന്നു. 88,000 കോടി രൂപയുടെ വര്‍ദ്ധനവ് ഗവണ്‍മെന്റില്‍ നിന്നും ലഭിക്കാനുള്ള ഭീമമായ സബ്സിഡി തുക കറന്റ് അസറ്റ് ആയി രേഖപ്പെടുത്തിയിരിക്കുന്നത് കൃത്യമായി കണക്കാക്കി വേര്‍തിരിച്ചാല്‍ നഷ്ടം ഇനിയും ഉയരുമെന്നും സമിതി കണ്ടെത്തിയിട്ടുണ്ട്. 2009-10-ലെ മാത്രം സാമ്പത്തിക നഷ്ടം ഈ സ്ഥാപനങ്ങളില്‍ 27,000 കോടി രൂപ വരും. സബ്സിഡി തുക ഒഴിവാക്കിയാല്‍ ഈ നഷ്ടം 57,000 കോടി രൂപയായി ഉയരും. 2006-ല്‍ നിന്നും 2010 ആകുമ്പോഴേക്കും ഗവണ്‍മെന്റ് സബ്സിഡി തുക ആകെ വരുമാനത്തിന്റെ 14 ശതമാനത്തില്‍ നിന്നും 20 ശതമാനമായി ഉയര്‍ന്നിരിക്കയാണ്. ഇക്കാലയളവില്‍ 15 സംസ്ഥാനങ്ങളിലെ ഗവണ്‍മെന്റുകള്‍ വഹിക്കേണ്ടി വന്ന സബ്സിഡി ഭാരം 97,000 കോടി രൂപയാണ്. ഭീമമായ ഈ സബ്സിഡി ലഭ്യമാക്കിയ ശേഷമുള്ള സഞ്ചിത നഷ്ടമാണ് മുകളില്‍ സൂചിപ്പിച്ച 1.07 ലക്ഷം കോടി രൂപ.
അതെ, പൂതിയ ബഡ്ജറ്റും അപ്പാടെ പൊളിഞ്ഞിരിക്കുന്നു, ഖജനാവ് അപ്പാടെ ചോരുകയും ചെയ്യുന്നു.

ഈ സ്ഥിതിയില്‍ ഉടനടി എന്തെങ്കിലും മാറ്റം സമിതി പ്രതീക്ഷിക്കുന്നുമില്ല. പ്രസരണ വിതരണ നഷ്ടം 2016-17 ഓടെ 19 ശതമാനമായി താഴ്ത്തിക്കൊണ്ടുവരികയും വൈദ്യുതി വാങ്ങല്‍ വില ഉള്‍പ്പെടെയുള്ള ചിലവിനങ്ങളില്‍ യൂണിറ്റ് അടിസ്ഥാനത്തില്‍ വര്‍ദ്ധനവ് കണക്കാക്കാതെയും ഉള്ള പ്രതിവര്‍ഷ നഷ്ടം 22,000 കോടിയായി 2016-17-ല്‍ കുറയ്ക്കാന്‍ കഴിയുമെന്നാണ് സമിതിയുടെ വിലയിരുത്തല്‍. ഇത് 2009-10-ലെ 27,000 കോടിയില്‍ നിന്നും അല്‍പം കുറവാണ്. പക്ഷേ ഈ കുറവ് സാധ്യമാകണമെങ്കില്‍ 2009-10-ലെ സബ്സിഡി തുകയായ 29,691 കോടി 2016-17-ല്‍ 55,780 കോടി രൂപയായി ഉയരണം. അഥവാ 2010-17 കാലയളവിലെ സബ്സിഡിയായി ആകെ 3.05 ലക്ഷം കോടി രൂപ കണ്ടെത്തണം. സബ്സിഡി തുക ഈ നിലയ്ക്കെങ്കിലും നിര്‍ത്തണമെങ്കില്‍ വൈദ്യുതി വാങ്ങല്‍ നിരക്കില്‍ ഉള്‍പ്പെടെയുണ്ടാകുന്ന വര്‍ദ്ധനവ് അതത് വര്‍ഷം താരിഫ് വര്‍ദ്ധനവായി ഈടാക്കുക കൂടി വേണമെന്ന് സാരം. വൈദ്യുതി വാങ്ങല്‍ നിരക്കില്‍ ഇപ്പോള്‍തന്നെ വന്‍ വര്‍ദ്ധനവ് അനുഭവപ്പെടുകയാണ്. രൂക്ഷമാകുന്ന കല്‍ക്കരി പ്രശ്നം, രൂപയുടെ മൂല്യമോഷണം, സ്വകാര്യ വൈദ്യുതി ഉല്‍പാദകരുടെ ഭൂമികയ്യേറ്റം, കേന്ദ്ര റഗുലേറ്ററി കമ്മീഷന്‍ താരിഫ് ചട്ടങ്ങളില്‍ വരുത്തിയ ഭേദഗതി എന്നിവയെല്ലാം നിരക്കുകള്‍ വന്‍തോതില്‍ വര്‍ദ്ധിക്കാനിടയാക്കുമെന്ന് വ്യക്തമാണ്.

സമിതിയുടെ വിശകലനങ്ങളില്‍ പ്രധാനമായും രണ്ട് വൈകല്യങ്ങള്‍ കടന്നുകൂടിയതായാണ് കാണുന്നത്. ഇത് അവരുടെ ശുപാര്‍ശകളെയും സ്വാധീനിച്ചിരിക്കുന്നു.

പ്രവര്‍ത്തന ക്ഷമതയെ ഉടമസ്ഥതയുമായി ബന്ധപ്പെടുത്തുന്നതിലേയ്ക്ക് കണ്‍സള്‍ട്ടന്റിനെ വച്ച് നടത്തിയ പഠനമാണ് ഇതിലൊരു വൈകല്യം. പഠനത്തിനായി തിരഞ്ഞടുത്ത സ്ഥാപനങ്ങള്‍ ഏതൊക്കെയെന്നത് പരിശോധിക്കുമ്പോള്‍ പഠനത്തിന്റെ ഉദ്ദേശശുദ്ധി തന്നെ ചോദ്യം ചെയ്യേണ്ട നിലയാണ്. വിഭജനം നടപ്പാക്കാതെ തന്നെ ബദല്‍ നയത്തിന്റെ അടിസ്ഥാനത്തില്‍ ഗണ്യമായ നേട്ടങ്ങള്‍ കൈവരിച്ച കേരളം ഇവരുടെ പഠനത്തില്‍ ഇടം കണ്ടതേയില്ല. പൊതുമേഖലാ സ്ഥാപനമെന്ന നിലയില്‍ രാജസ്ഥാനിലെ ജയ്പൂര്‍ വിതരണ കമ്പനിയെയാണ് കണ്‍സള്‍ട്ടന്റ് തിരഞ്ഞെടുത്തത്. (ഇന്ത്യയില്‍ തന്നെ ഏറ്റവും ഉയര്‍ന്ന പ്രസരണ വിതരണ നഷ്ടവും സാമ്പത്തിക നഷ്ടവും രേഖപ്പെടുത്തുന്ന സ്ഥാപനമാണ് രാജസ്ഥാന്‍). സ്വകാര്യ മേഖലയില്‍ നിന്നും മുംബൈ ബിഎസ്ഇഎസ് കമ്പനിയെയാണ് തിരഞ്ഞെടുത്തത്. പൊതു സ്വകാര്യ ഉടമസ്ഥതയില്‍ കൃത്യമായി ഒറീസ്സയെ പരിഗണിച്ചെങ്കിലും, ഒട്ടേറെ പ്രശ്നങ്ങളുള്ള മാതൃകയായി അറിയപ്പെടുന്നതിനാല്‍ അവയെ ഒഴിവാക്കി ദില്ലിയിലെ ടാറ്റയുടെ വിതരണ കമ്പനിയെ തിരഞ്ഞെടുത്തു. (ദില്ലിയിലെ വിതരണ കമ്പനികളില്‍ റിലയന്‍സിന്റെ 2 കമ്പനികള്‍ മോശം പ്രകടനവും ടാറ്റായുടെ കമ്പനി താരതമ്യേന മെച്ചപ്പെട്ട പ്രകടനവും കാഴ്ച വയ്ക്കുന്നു എന്ന് പൊതുവില്‍ അറിയപ്പെടുന്നതാണ്). ഫ്രാഞ്ചൈസി മാതൃകയായി മഹാരാഷ്ടയിലെ ഭിവണ്ടി പഠനത്തിനായി തിരഞ്ഞെടുത്തു.

ആവശ്യമായ ഉത്തരം ആദ്യംതന്നെ എഴുതി വച്ചശേഷമുള്ള പഠനമാണ് നടന്നതെന്ന് മേല്‍ തിരഞ്ഞെടുപ്പില്‍ നിന്നു തന്നെ വ്യക്തമാണ്. അപാകതകള്‍ നിറഞ്ഞ ഈയൊരു പഠനത്തിന്റെ അടിസ്ഥാനത്തിലാണ് സ്വകാര്യ ഉടമസ്ഥത മെച്ചപ്പെട്ട കാര്യക്ഷമതയ്ക്ക് അനിവാര്യമാണെന്നും അതില്‍ തന്നെ ഫ്രാഞ്ചൈസി സംവിധാനം ഉദാത്തമാണെന്നുമുള്ള നിഗമനത്തില്‍ (?) സമിതി എത്തിച്ചേര്‍ന്നത്.

സാമ്പത്തിക നഷ്ടത്തിന്റെ അടിസ്ഥാനം പൊതുമേഖലയുടെ പ്രവര്‍ത്തന വൈകല്യം മൂലമുള്ള ഉയര്‍ന്ന എറ്റി ആന്റ് സി നഷ്ടമാണ് എന്ന നിഗമനത്തില്‍ ആണ്ടുപോയ സമിതി സാമ്പത്തിക നഷ്ടത്തിന് ഇടയാക്കുന്ന യഥാര്‍ത്ഥ വസ്തുത കാണാതെ പോയിരിക്കുന്നു എന്നതാണ് രണ്ടാമത്തെ വൈകല്യം. എറ്റി ആന്റ് സി നഷ്ടമാണ് പ്രധാന പ്രശ്നമെങ്കില്‍ അത് ഗണ്യമായി കുറച്ചുകൊണ്ട് വന്ന് കഴിഞ്ഞിട്ടുള്ള കേരളം, ഹിമാചല്‍, തമിഴ്നാട്, പഞ്ചാബ്, ആന്ധ്ര, കര്‍ണാടക തുടങ്ങിയ സംസ്ഥാനങ്ങളുടെ സാമ്പത്തിക നഷ്ടത്തിന്റെ കാരണമെന്തെന്ന് സമിതി വിശദീകരിക്കേണ്ടതുണ്ട്. റഗുലേറ്ററി സംവിധാനത്തിന്റെ അപര്യാപ്തതയെന്ന സമിതി നിഗമനത്തില്‍ ഏറെ കഴമ്പുണ്ടെങ്കിലും മുഖ്യമായ പ്രശ്നം 'മഞ്ഞക്കണ്ണട' വച്ചുള്ള പരിശോധനയില്‍ മറഞ്ഞു പോയിരിക്കുന്നു.

വിശകലനത്തിന് വിധേയമാക്കിയ 15 സംസ്ഥാനങ്ങളുടെ വൈദ്യുതി വാങ്ങല്‍ ചിലവിലുണ്ടായ ക്രമാതീതമായ വര്‍ദ്ധനവാണ് സമിതിയുടെ കണ്ണില്‍പെടാതെ പോയ വലിയ വസ്തുത. ഈ സ്ഥാപനങ്ങള്‍ 2005-2006-ല്‍ 4,34,880 ദശലക്ഷം യൂണിറ്റ് വൈദ്യുതി വാങ്ങിയ സ്ഥാനത്ത് 2009-10-ല്‍ 5,86,350 ദശലക്ഷം യൂണിറ്റ് വൈദ്യുതിയാണ് വാങ്ങിയത്. (സ്വയം ഉല്‍പ്പാദിപ്പിച്ച വൈദ്യുതി വാങ്ങിയതായും, അതിനുള്ള ഉല്‍പാദനചിലവ് വൈദ്യുതി വാങ്ങല്‍ ചിലവുമായാണ് കണക്കുകളില്‍ വിശകലനത്തിനായി ഉള്‍പ്പെടുത്തിയിട്ടുള്ളത്). ഏകദേശം 34 ശതമാനത്തിന്റെ വര്‍ദ്ധനവ്. എന്നാല്‍ വൈദ്യുതി വാങ്ങല്‍ചിലവ് 85,444 കോടിയില്‍ നിന്നും 1,64,347 കോടി രൂപയായി വര്‍ദ്ധിച്ചിരിക്കുന്നു, 92% വര്‍ദ്ധനവ്. 2005-06-ല്‍ വൈദ്യുതി വാങ്ങല്‍ നിരക്ക് 1.96 രൂപ ആയിരുന്നു. എന്നാല്‍ തുടര്‍ന്നുള്ള വര്‍ഷങ്ങളില്‍ അധികമായി വാങ്ങിയ വൈദ്യുതിയ്ക്ക് നല്‍കേണ്ടി വന്ന ശരാശരി വില 5 രൂപയ്ക്ക് മുകളിലാണ്. വിവിധ സംസ്ഥാനങ്ങളില്‍ ഇത് 3രൂപ മുതല്‍ 12 രൂപ വരെ ഉയര്‍ന്നു നില്‍ക്കുന്നു.

ഈ വര്‍ഷങ്ങളില്‍ ഇന്ത്യയില്‍ രേഖപ്പെടുത്തിയിട്ടുള്ള വിലക്കയറ്റത്തിന്റെ തോത് 3.98% മുതല്‍ 12.37% വരെയാണ്. 2005-06 നെ അപേക്ഷിച്ച് തുടര്‍ന്നുള്ള ഓരോ വര്‍ഷവും അധികമായി വാങ്ങിയ വൈദ്യുതിക്ക് വിലക്കയറ്റത്തിന്റെ അടിസ്ഥാനത്തിലുള്ള ഉയര്‍ന്ന വില നല്‍കേണ്ടതുണ്ട് എന്ന് കണക്കാക്കാവുന്നതാണ്. ഈ പരിഗണന വച്ചുള്ള ഉയര്‍ന്ന നിരക്കിലും അധികമായി വൈദ്യുതി വാങ്ങല്‍ ഇനത്തില്‍ ചിലവഴിക്കേണ്ടിവന്ന തുക 2006-07-ല്‍ 8,377 കോടി, 2007-08-ല്‍ 16,878 കോടി, 2008-09-ല്‍ 37,827 കോടി 2009-10-ല്‍ 38,613 കോടി എന്നീ തോതിലാണ്. അഥവാ ഊഹക്കച്ചവടക്കാരും സ്വകാര്യ നിലയ ഉടമകളും കമ്പോളത്തിലെ ഇടനിലക്കാരും ഒക്കെച്ചേര്‍ന്ന് വൈദ്യുതി കമ്പോളത്തില്‍ നടത്തിയ ഇടപെടലുകളുടെ ഫലമായി വൈദ്യുതി വിതരണ സ്ഥാപനങ്ങള്‍ക്കുണ്ടായ ഇക്കാലയളവിലെ ആകെ അധിക ചിലവ് 1.01 ലക്ഷം കോടി രൂപയാണ്.
ഇക്കാലയളവിലെ വിതരണ യൂട്ടിലിറ്റികളുടെ സബ്സിഡി ഒഴിവാക്കിയുള്ള ആകെ നഷ്ടവും സമാനമായ തുകയാണ് എന്നത് യാദൃശ്ചികമല്ല. കമ്പോള പരിഷ്ക്കരണങ്ങളെ തുടര്‍ന്ന് നഷ്ടം എന്തുകൊണ്ട് നിയന്ത്രണാതീതമായി വര്‍ദ്ധിക്കുന്നു എന്നതിന് കമ്പോള പ്രവര്‍ത്തനം സജീവമാകുന്ന മുറയ്ക്ക് വൈദ്യുതി വാങ്ങല്‍ ചിലവിലുണ്ടായ മേല്‍ വര്‍ധനവ് ഉത്തരം നല്‍കുന്നുണ്ട്.

ബക്കറ്റ് ചോരുന്നത് എങ്ങനെയെന്നും ഖജനാവിലെ പണം ആരുടെ പോക്കറ്റിലേക്കാണ് ഒഴുകുന്നതെന്നും ഈ കണക്കുകള്‍ വ്യക്തമാക്കുന്നുണ്ട്. നിര്‍ഭാഗ്യവശാല്‍ (അതോ മന:പൂര്‍വ്വമോ ?) രാജ്യം ഭരിക്കുന്നവരുടേയും അവരുടെ ഉപഭോക്താക്കളുടെയും കണ്ണുകള്‍ ആ ഭാഗത്തേയ്ക്ക് പായുന്നതേയില്ല.

 

Add comment


Security code
Refresh

Random Videos

You need Flash player 6+ and JavaScript enabled to view this video.
Title: Power Quiz 2015 Final - Part-1

Latest Comments

Banner

Reference Book

 

Reference Book on Power

Electrical Engineering-- D' 1/4 Size Hard bound-- 1424 Pages-- Just Rs.1000/- only &n...

Visitors Counter

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
mod_vvisit_counterToday1856
mod_vvisit_counterYesterday5851
mod_vvisit_counterThis Month110271
mod_vvisit_counterLast Month153396

Online Visitors: 62
IP: 23.20.193.33
,
Time: 08 : 24 : 35