KSEBOA - KSEB Officers' Association

Sunday
Jun 25th
Text size
  • Increase font size
  • Default font size
  • Decrease font size
Home വാര്‍ത്തകള്‍ ബ്ലാക്ക് ഔട്ട് നമ്മെ ഓര്‍മ്മപ്പെടുത്തുന്നത്...

ബ്ലാക്ക് ഔട്ട് നമ്മെ ഓര്‍മ്മപ്പെടുത്തുന്നത്...

PDF
Hits smaller text tool iconmedium text tool iconlarger text tool icon
Black Out60കോടിയോളം ജനങ്ങളെ ബാധിച്ച ലോകത്തെ തന്നെ ഏറ്റവും രൂക്ഷമായ വൈദ്യുതി തടസ്സമാണ് ജൂലൈ 30, 31 തീയതികളില്‍ ഇന്ത്യയിലുണ്ടായത്. ജൂലൈ 30ന് വടക്കേ ഇന്ത്യയില്‍ 8 സംസ്ഥാനങ്ങളാണ് വൈദ്യുതി ഗ്രിഡ് തകര്‍ച്ചയെ തുടര്‍ന്ന് ഇരുട്ടിലായതെങ്കില്‍ പിറ്റേന്ന് വടക്ക്, വടക്ക്-കിഴക്ക്, കിഴക്ക് സംസ്ഥാനങ്ങളാകെ ഇരുട്ടിലായി. 22 സംസ്ഥാനങ്ങളെയാണ് ഇത് ബാധിച്ചത്. മെട്രോ റെയിലുകള്‍ ഉള്‍പ്പെടെയുള്ള ട്രെയിന്‍ ഗതാഗതമാകെ താറുമാറായി. ആശുപത്രി സംവിധാനങ്ങള്‍ നിലച്ചു. ബംഗാളിലും ബീഹാറിലുമൊക്കെ ഖനികളില്‍ തൊഴിലാളികള്‍ കുടുങ്ങിപ്പോയത് വലിയ ദുരന്തങ്ങള്‍ക്ക് കാരണമാകുമോ എന്ന ഭീതി സൃഷ്ടിച്ചു. പൂര്‍ണ്ണ ഇരുട്ടിലേക്ക് പോയില്ലെങ്കിലും പടിഞ്ഞാറന്‍, തെക്കന്‍ ഗ്രിഡുകളിലെ വൈദ്യുതി ലഭ്യതയില്‍ വലിയ കുറവുണ്ടായത് ഈ പ്രദേശങ്ങളിലും കടുത്ത നിയന്ത്രണങ്ങള്‍ അനിവാര്യമാക്കിത്തീര്‍ത്തു. ഗ്രിഡ് തകര്‍ച്ച പരിഹരിക്കാന്‍ പന്ത്രണ്ട് മണിക്കൂറോളം വേണ്ടിവന്നു. ഇതുമൂലമുണ്ടായ നാശനഷ്ടങ്ങള്‍ ഇപ്പോഴും പൂര്‍ണ്ണതോതില്‍ പരിഹരിക്കപ്പെട്ടു കഴിഞ്ഞിട്ടുമില്ല.

 

വൈദ്യുതി ഗ്രിഡ്

വൈദ്യുതി ഉല്‍പാദന നിലയങ്ങളും പ്രസരണ ലൈനുകളും, സബ്സ്റ്റേഷനുകളും വിതരണ സംവിധാനങ്ങളും ഒക്കെച്ചേര്‍ന്ന വലക്കെട്ടാണ് വൈദ്യുതി ഗ്രിഡ്. തലങ്ങും വിലങ്ങുമായി പരസ്പരബന്ധിതമായിക്കിടക്കുന്ന ഈ വലക്കണ്ണിയില്‍ ഓരോ ഘടകവും, അതായത് ഉല്‍പാദന നിലയങ്ങള്‍, പ്രസരണ സബ്സ്റ്റേഷനുകള്‍, ഉപഭോക്താക്കള്‍ എന്നിവയെല്ലാം ഒരു പൊതു സംതുലനത്തിന്റെ അടിസ്ഥാനത്തില്‍ പ്രവര്‍ത്തിക്കുന്നില്ലെങ്കില്‍ ഗ്രിഡിന് സ്ഥിരത നിലനിര്‍ത്താന്‍ കഴിയില്ല. ഉല്‍പാദനവും ഉപഭോഗവും ഒരേ സമയം നടക്കുന്ന ഒരുല്‍പ്പന്നമാണ് വൈദ്യുതി. ബാറ്ററിയിലും മറ്റുമായി ചെറിയ അളവിലുള്ള വൈദ്യുതി സംഭരണം സാദ്ധ്യമാണ് എന്നിരിക്കിലും സംഭരിച്ചുവെച്ച് ആവശ്യാനുസരണം ഉപയോഗിക്കുക എന്ന രീതി വൈദ്യുതി ശൃംഖലയില്‍ പ്രായോഗികമല്ല. അതുകൊണ്ടുതന്നെ വൈദ്യുതി ജനറേഷനും ഡിമാണ്ടും ഒത്തുപോകാതെ നിവൃത്തിയില്ല.
ഉല്‍പാദനത്തിനനുസരിച്ച് ഡിമാണ്ട് ഉണ്ടാകുന്നില്ലെങ്കില്‍ ജനറേറ്റററുകളുടെ വേഗത വര്‍ദ്ധിക്കുകയും വൈദ്യുതി തരംഗത്തിന്റെ ആവൃത്തി ( frequency) വര്‍ദ്ധിക്കാനിടയാകുകയും ചെയ്യും. അതേപോലെ ഡിമാണ്ട് അധികമായാല്‍ ജനറേറ്ററുകളിലെ സമ്മര്‍ദ്ദം വര്‍ദ്ധിച്ച് അവയുടെ വേഗത കുറഞ്ഞ് ആവൃത്തിയും കുറയുന്നതിനിടയാക്കും. ഒരു പരിധിക്കപ്പുറം ആവൃത്തി മാറുന്നത് മൊത്തം സംവിധാനത്തിന് കേടുപാടുകളുണ്ടാക്കുമെന്നതിനാല്‍ ഇക്കാര്യത്തില്‍ നല്ല നിയന്ത്രണം അനിവാര്യമാണ്.

സംസ്ഥാനങ്ങളില്‍ വൈദ്യുതി ഗ്രിഡുകളുടെ മേല്‍നോട്ടവും നിയന്ത്രണവും സംസ്ഥാന ലോഡ് ഡെസ്പാച്ച് സെന്ററുകളാണ് നിര്‍വ്വഹിക്കുന്നത്. അന്തര്‍സംസ്ഥാന ലൈനുകളും വൈദ്യുതി കൈമാറ്റങ്ങളും പരിശോധിക്കാനും നിയന്ത്രിക്കാനുമുള്ള അധികാരം റീജിനല്‍ ലോഡ് ഡെസ്പാച്ച് സെന്ററുകള്‍ കള്‍ക്കാണ്. വടക്ക്, വടക്കുകിഴക്ക്, കിഴക്ക്, പടിഞ്ഞാറ്, തെക്ക് എന്നിങ്ങനെ അഞ്ച് റീജിനല്‍ ഗ്രിഡുകളും ലോഡ് ഡെസ്പാച്ച് സെന്ററുകളുമാണ് ഇന്ത്യയിലുള്ളത്. ഇതെല്ലാം ചേര്‍ന്ന ഒരു നാഷണല്‍ ഗ്രിഡ് എന്ന സങ്കല്‍പ്പം ഉണ്ടെങ്കിലും അത് യാഥാര്‍ത്ഥ്യമായിട്ടില്ല. തെക്കന്‍ ഗ്രിഡിലേക്ക് കിഴക്കന്‍ ഗ്രിഡില്‍ നിന്നും നേര്‍ധാരാ (ഡി.സി.) സര്‍ക്യൂട്ട് മുഖാന്തിരം വൈദ്യുതി എത്തിക്കുന്നുണ്ടെങ്കിലും തെക്കന്‍ ഗ്രിഡ് ഇപ്പോഴും മറ്റ് ഗ്രിഡുകളുമായി ആവൃത്തി പങ്കു വെക്കുന്ന നിലയില്‍ ബന്ധിപ്പിക്കപ്പെട്ടില്ല. എന്നാല്‍ മറ്റ് ഗ്രിഡുകളെല്ലാം ഈ നിലയില്‍ പരസ്പരബന്ധിതമാണ്.

ബ്ലാക്ക് ഔട്ട് അഥവാ ഇരുട്ടു വീഴ്ച്ച

ഇന്ത്യയിലുണ്ടായ ബ്ലാക്ക് ഔട്ടിന്റെ യഥാര്‍ത്ഥ സാങ്കേതികകാരണം ഇപ്പോഴും വ്യക്തമായിക്കഴിഞ്ഞിട്ടില്ല. എങ്കിലും ചില ഉത്തരേന്ത്യന്‍ സംസ്ഥാനങ്ങള്‍ അവര്‍ക്ക് അര്‍ഹതപ്പെട്ടതിലധികം വൈദ്യുതി ഊറ്റാന്‍ ശ്രമിച്ചതാണ് ഈ സാഹചര്യമുണ്ടാക്കിയതെന്ന് കരുതപ്പെടുന്നു. ദല്‍ഹി, പഞ്ചാബ്, ഹരിയാന, ഉത്തര്‍പ്രദേശ് എന്നീ സംസ്ഥാനങ്ങളാണ് സംശയത്തിന്റെ നിഴലിലുള്ളത്.

വലിയ വൈദ്യുതിക്ഷാമം നിലനില്‍ക്കുന്ന സാഹചര്യത്തില്‍ നമ്മുടെ ഗ്രിഡുകള്‍ ഭൂരിഭാഗം സമയവും താരതമ്യേന താഴ്ന്ന ആവൃത്തിയിലാണ് പ്രവര്‍ത്തിച്ചുവരുന്നത്. ഈ സമയത്ത് നിശ്ചയിക്കപ്പെട്ട വൈദ്യുതിക്കപ്പുറം ഉപയോഗപ്പെടുത്താന്‍ ശ്രമിക്കുന്നത്, അഥവാ, ഡിമാണ്ട് വീണ്ടും കൂട്ടുന്നത് ആവൃത്തി വീണ്ടും കുറയുന്നതിന് കാരണമാകുന്നു. ഗ്രിഡ് പ്രവര്‍ത്തിക്കാന്‍ കഴിയുന്ന കുറഞ്ഞ ആവൃത്തിയായ47ഹെര്‍ട്ട്സിനും താഴേക്ക് ആവൃത്തിപോകുന്നത് പ്രസരണ ലൈനുകള്‍ സ്വയമേവ ഓഫ് ആകുന്നതിന് കാരണമാകുന്നു. ഇത്തരം ഓട്ടോമാറ്റിക് സംവിധാനം ഓരോ സംസ്ഥാനത്തും സ്ഥാപിക്കുകയും സംസ്ഥാനത്തിനുള്ളിലെ പ്രസരണ ലൈനുകള്‍ ഓഫാക്കി അമിത ഉപഭോഗം നിയന്ത്രിക്കുകയും ചെയ്യേണ്ടതുണ്ട്. അങ്ങിനെ ചെയ്യുന്നുവെങ്കില്‍ അതത് സംസ്ഥാനത്ത് മാത്രമായി പ്രശ്നങ്ങള്‍ ഒതുക്കാന്‍ കഴിയും. എന്നാല്‍ സംസ്ഥാനങ്ങളിലെ അഭ്യന്തര ഉപഭോഗ നിയന്ത്രണം സാദ്ധ്യമകാതെ വന്നാല്‍ അന്തര്‍ സംസ്ഥാന ലൈനുകള്‍ ഓഫാകും. സംഗതി അതിലും രൂക്ഷമാണെങ്കില്‍ അന്തര്‍ റീജിനല്‍ പ്രസരണ ലൈനുകളും ഓഫാകും.

ഏതെങ്കിലും ഒരു ലൈന്‍ ഓഫാകുമ്പോള്‍ അതിലൂടെ ഒഴുകിയിരുന്ന വൈദ്യുതി മറ്റ് ലൈനുകളിലൂടെ ഒഴുകാന്‍ ശ്രമിക്കും. ഇത് താങ്ങാന്‍ മറ്റു ലൈനുകള്‍ക്ക് ശേഷിയില്ലെങ്കില്‍ അവയും ഓഫാകും. ആ വൈദ്യുതി കൂടി ബാക്കി ശേഷിക്കുന്ന ലൈനുകളിലേക്ക് മാറി ഒഴുകും. അടുത്തഘട്ടത്തില്‍ അവയും ഓവര്‍ലോഡില്‍ നിലക്കും. അങ്ങിനെ ഒരു ചെയിന്‍ റിയാക്ഷന്‍ പോലെ ഒന്നൊന്നായി എല്ലാ ലൈനുകളും നിലക്കുന്നു. ഇതാണ് കാസ്കേഡിങ്ങ്. ഇന്ത്യയില്‍ ഉണ്ടായതും ഇത്തരത്തില്‍ ഒരു കാസ്കേഡിങ്ങാണ്. നോര്‍ത്ത്, നോര്‍ത്ത്-ഈസ്റ്റേണ്‍ റീജിയനുകളെ ബന്ധിപ്പിച്ച ലൈനില്‍ ഉണ്ടായ താഴ്ന്ന ആവൃത്തിയുടെ ഭാഗമായ ഓഫാകല്‍ (ലോ ഫ്രീക്വെന്‍സി ട്രിപ്പിങ്ങ്) ആണ് ജൂലൈ 30ന്റെ എട്ടു സംസ്ഥാനങ്ങളിലെ വൈദ്യുതി തകര്‍ച്ചക്കിടയാക്കിയതെന്ന് കണ്ടിട്ടുണ്ട്. ഇതിന്റെ മൂലഹേതു ആണ് ഇപ്പോള്‍ തേടുന്നത്. ജൂലൈ 31ന് ഇത് 22 സംസ്ഥാനങ്ങളെ ബാധിക്കുന്ന നിലയില്‍ വലിയൊരു കാസ്കേഡിങ്ങ് ആയി മാറി.

പ്രസരണ ശേഷി

വൈദ്യുതി പ്രസരണ ലൈനുകളുടെ ശേഷിക്കുറവ് ഇത്തരമൊരു സ്ഥിതിക്ക് കാരണമായിട്ടുണ്ട്. അതോടൊപ്പം കടുത്ത വൈദ്യുതി പ്രതിസന്ധി പലസംസ്ഥാനങ്ങളേയും അമിതമായ ഓവര്‍ഡ്രായലിന് പ്രേരിപ്പിക്കുന്നുമുണ്ട്. രാജ്യത്ത് നിലനില്‍ക്കുന്ന വരള്‍ച്ചയുടെ സാഹചര്യം വൈദ്യുതി ക്ഷാമം രൂക്ഷമാക്കിയിട്ടുണ്ട്. കാര്‍ഷികാവശ്യത്തിന് കൂടുതല്‍ വൈദ്യുതി ആവശ്യമായി വരുന്നു എന്നതും വരള്‍ച്ചയുടെ മറ്റൊരു പ്രത്യാഘാതമാണ്. രാജ്യത്തിന്റെ വര്‍ദ്ധിച്ചുവരുന്ന വൈദ്യുതി ആവശ്യകത നിറ്വേറ്റാനാവശ്യമായ പദ്ധതികള്‍ ഏറ്റെടുക്കാനോ സമയബന്ധിതമായി പൂര്‍ത്തീകരിക്കാനോ കഴിയുന്നില്ല എന്നതുതന്നെയാണ് ആത്യന്തികമായി ഈ തകര്‍ച്ചക്ക് പിന്നിലുള്ളത്. വൈദ്യുതി മേഖലയില്‍ നടപ്പാക്കിവരുന്ന നവ ഉദാരവല്‍ക്കരണ നയങ്ങള്‍ തന്നെയാണ് ഈ പുറകോട്ട് പോക്കിനു പിന്നിലുള്ള യഥാര്‍ത്ഥ പ്രതി.

അന്തര്‍ സംസ്ഥാന പ്രസരണ ലൈനുകളുടെ നിര്‍മ്മാണവും സംരക്ഷണവും നിര്‍വഹിക്കുന്ന രാജ്യത്തെ പ്രാധാനപ്പെട്ട ഒരു പൊതുമേഖലാസ്ഥാപനമാണ് പവര്‍ഗ്രിഡ് കോര്‍പ്പറേഷന്‍ ഓഫ് ഇന്ത്യ ലിമിറ്റഡ് അഥവാ പി.ജി.സി.ഐ.എല്‍. രാജ്യത്തിന്റെ തന്ത്രപ്രധാനമായ ആസ്തിയാണ് പി.ജി.സി.ഐ.എല്‍ കൈകാര്യം ചെയ്യുന്നത്. പ്രസരണ ലൈനുകളില്‍ റിഡന്റന്‍സി നിലനിര്‍ത്തുന്നത് കാസ്കേഡിങ്ങ് ഒഴിവാക്കുന്നതിന് അനിവാര്യമാണ്. എന്നാല്‍ ഈ മേഖലകൂടി സ്വകാര്യ മൂലധനത്തിന് തുറന്നു കൊടുക്കാന്‍ തീരുമാനിച്ചതും ആവശ്യത്തിന് ബജറ്റ് പിന്തുണ കിട്ടാതെ വരുന്നതും ലൈനുകളിലെ അധികശേഷി കുറക്കുന്നതിനും പരാമാവധി ശേഷി ഉപയോഗപ്പെടുത്തി പ്രസരണ ശൃംഖലയുടെ സാമ്പത്തിക വരുമാനം വര്‍ദ്ധിപ്പിക്കുന്നതിനും പി.ജി.സി.ഐ.എല്‍.നെ നിര്‍ബന്ധിതമാക്കി. എന്നാല്‍ മറ്റു മേഖലകളിലേതുപോലെ വന്‍ ലാഭം പ്രതീക്ഷിക്കാനാകാത്തത് ഈ രംഗത്തേക്ക് വലിയ തോതില്‍ സ്വകാര്യമേഖലാ നിക്ഷേപം ആകര്‍ഷിക്കുന്നതിന് തടസ്സവുമായി. പൊതുമേഖലയുടെ പിന്‍മാറ്റവും പകരം സ്വകാര്യമേഖല വരാത്തതും ഈ രംഗത്ത് കടുത്ത ശേഷിക്കുറവാണ് സൃഷ്ടിച്ചത്. മൊത്തത്തില്‍ ഏതെങ്കിലും ലൈനുകളില്‍ തകരാര്‍ സംഭവിച്ചാല്‍ ആ ലൈനിലുള്ള വൈദ്യുതി മറ്റു ലൈനുകള്‍ക്ക് പങ്കുവെക്കാനാകാത്ത സ്ഥിതിയാണ് ഇത് സംജാതമാക്കിയത്. കാസ്കേഡിങ്ങിനുള്ള സാദ്ധ്യത വര്‍ദ്ധിച്ചു എന്നതാണ് ഇതിന്റെ ഫലം.

ഉല്‍പാദന മുരടിപ്പ്

വൈദ്യുതി ഉല്‍പാദന രംഗത്തും നവ ഉദാരവല്‍ക്കരണ നയം കടുത്ത പ്രതിസന്ധിയാണ് സൃഷ്ടിച്ചുകൊണ്ടിരിക്കുന്നത്. 1991ല്‍ ഇലക്ട്രിസിറ്റി സപ്ലൈ ആക്ടില്‍ ഭേദഗതി വരുത്തിയാണ് സ്വകാര്യസംരഭകരെ വൈദ്യുതി ഉല്‍പാദന മേഖലയിലേക്ക് ആകര്‍ഷിച്ചത്. മുതല്‍മുടക്കിന് 16%ത്തോളം ലാഭം ഉറപ്പുവരുത്തിക്കൊണ്ട് കോസ്റ്റ് പ്ലസ് താരീഫ് ഘടന അംഗീകരിക്കുകയും ചെയ്തുകൊണ്ടാണ് മൂലധന ശക്തികളെ ഈ രംഗത്തേക്ക് വിളിച്ചുവരുത്തിയത്. 95 ലെ ലിക്വിഡ് ഫ്യുവല്‍ പോളിസി കൂടിയായപ്പോള്‍ സ്വകാര്യ സംരംഭകരുടെ ഒരു കുത്തൊഴുക്കുതന്നെ ഈ രംഗത്തുണ്ടായി. വരുന്നവരോടെല്ലാം ധാരണാ പത്രം വെക്കുക എന്ന സമീപനത്തിന്റെ ഭാഗമായി തൊണ്ണൂറുകളുടെ ആദ്യപാദത്തില്‍ തന്നെ നൂറുകണക്കിന് ധാരണാപത്രങ്ങളാണ് ഒപ്പുവെക്കപ്പെട്ടത്. വലിയ വിവാദമായ മഹാരഷ്ട്രയിലെ എന്‍റോണ്‍ കരാരും ഇങ്ങിനെ ഉണ്ടായതാണ്.

സര്‍ക്കാര്‍ നല്‍കിയ സൗകര്യങ്ങള്‍ ഉപയോഗപ്പെടുത്തി എന്നതൊഴികെ ധാരണാപത്രങ്ങള്‍ പ്രകാരമുള്ള വൈദ്യുതിയൊന്നും ഉല്‍പാദിപ്പിക്കപ്പെട്ടില്ല. സ്ഥാപിക്കപ്പെട്ട നിലയങ്ങളാകട്ടെ പ്രധാനമായും നാഫ്ത അടക്കമുള്ള ദ്രവ ഇന്ധനങ്ങളെ ആശ്രയിക്കുന്നവയായിരുന്നു. ഇത് വൈദ്യുതി വില താങ്ങനാകാത്ത സ്ഥിതിയാണ് ഉണ്ടാക്കിയത്. പൊതുമേഖലാ നിക്ഷേപം വലിയ രൂപത്തില്‍ കുറഞ്ഞത് പഞ്ച വല്‍സര പദ്ധതികളുടെ വൈദ്യുതി ഉല്‍പാദന ലക്ഷ്യവും നേട്ടവും തമ്മിലുള്ള വിടവ് വര്‍ദ്ധിച്ചുവരുന്നതിനും രാജ്യത്തെ കടുത്ത വൈദ്യുതിക്കമ്മിയിലേക്ക് തള്ളിവിടുന്നതിനും കാരണമായി. ഒമ്പതാം പദ്ധതിയിലും പത്താം പദ്ധതിയിലും 70%ത്തോളം നേട്ടം മാത്രമാണ് വൈദ്യുതി ഉല്‍പാദന രംഗത്ത് കൈവരിക്കാനായത്. പതിനൊന്നാം പദ്ധതിയിലാകട്ടെ 78500 മെഗവാട്ട് ഉല്‍പാദനം ലക്ഷ്യമിട്ടതില്‍ 54800 മെഗാവാട്ടോളം മാത്രമാണ് നേടാനായത്. പന്ത്രണ്ടാം പദ്ധതിയിലെ ലക്ഷ്യം പതിനൊന്നാം പദ്ധതിയില്‍ നിന്ന് 3500മെഗാവാട്ടോളം കുറവാണ്. 75000മെഗാവാട്ട് മാത്രം. ഇതില്‍ത്തന്നെ 42400മെഗാവട്ടോളം സ്വകാര്യമേഖലക്ക് മാറ്റി വെച്ചിരിക്കുകയുമാണ്. ഇങ്ങിനെ കേന്ദ്ര സര്‍ക്കാര്‍ പിന്തുടരുന്ന തലതിരിഞ്ഞ നയങ്ങള്‍ രാജ്യത്താകെ കടുത്ത വൈദ്യുതിക്ഷാമമാണ് വരുത്തിവെച്ചിരിക്കുന്നത്.

സ്വകാര്യ കമ്പനികളുടെ ലാഭതാല്‍പ്പര്യത്തിന്റെ ഭാഗമായി വൈദ്യുതിക്കമ്മിയോടൊപ്പം വൈദ്യുതി വിലയില്‍ വലിയ വര്‍ദ്ധനവും ഉണ്ടാകുന്നു. വൈദ്യുതിയുടെ സ്പോട്ട് മാര്‍ക്കറ്റ് എന്ന നിലയില്‍ രൂപം കൊണ്ട പവര്‍ എക്സ്ചേഞ്ചുകള്‍ വൈദ്യുതിയുടെ ഊഹക്കച്ചവടകേന്ദ്രമായി മാറുകയും പലപ്പോഴും ഉല്‍പാദനച്ചെലവിന്റെ അഞ്ചും ആറും മടങ്ങായി വൈദ്യുതിയുടെ കമ്പോള വില വര്‍ദ്ധിക്കുന്നതിന് കാരണമാകുകയും ചെയ്യുന്നു.

വൈദ്യുതിയുടെ അധിക ഉപഭോഗവും യു.ഐ. താരീഫും

ഒരു സംസ്ഥാനത്തിനും നിശ്ചയിക്കപ്പെട്ട ഓഹരി കൃത്യമായി ഉപയോഗപ്പെടുത്തുന്ന നിലയില്‍ വൈദ്യുതി ഉപഭോഗം നിയന്ത്രിക്കാനാകില്ല. ഓരോ സമയത്തും നേരിയ ഏറ്റക്കുറച്ചിലുകള്‍ ഓരോ സംസ്ഥാനവും സ്വീകരിക്കുന്ന വൈദ്യുതിക്ക് ഉണ്ടാകും. ഇത് ബാലന്‍സ് ചെയ്യുന്നതിനുള്ള വാണിജ്യ രീതിയാണ് അണ്‍ ഷെഡ്യൂള്‍ഡ് ഇന്റര്‍ചേഞ്ച് (യു.ഐ.) താരീഫുകള്‍. ഓരോ സംസ്ഥാനവും അവര്‍ക്ക് ഷെഡ്യൂള്‍ ചെയ്തിട്ടുള്ള വൈദ്യുതിക്ക് പുറത്ത് ഉപയോഗിക്കുന്ന വൈദ്യുതിക്ക് ആ സമയത്തെ ആവൃത്തിക്ക് അനുസരിച്ച് വില നല്‍കണം. ആവൃത്തി കൂടുമ്പോള്‍, അതയത് ഉല്‍പാദനം കൂടുതലും ഉപഭോഗം കുറവുമുള്ളപ്പോള്‍, തരീഫ് സാധാരണയില്‍ നിന്നും കുറയും. ഇത്തരം ഘട്ടത്തില്‍ കൂടുതലായി വലിച്ചെടുക്കുന്നതിന് പ്രോത്സാഹനം നല്‍കുന്നതിനാണിത്. ഇപ്പോഴത്തെ നിരക്കനുസരിച്ച് ആവൃത്തി 50.2ഹെര്‍ട്സിന് മുകളിലായാല്‍ വൈദ്യുതി വില പൂജ്യമാകും എന്നാണ് നിശ്ചയിച്ചിട്ടുള്ളത്.

ആവൃത്തി നിശ്ചിത ആവൃത്തിയായ 50 ഹെര്‍ട്സിനും കുറവായിരിക്കുമ്പോള്‍ വൈദ്യുതി വില കൂടുന്നു. അങ്ങിനെ ആവൃത്തി 49.5 ഹെര്‍ട്സില്‍ കുറവായാല്‍ യൂണിറ്റിന് 9.00 രൂപയായി താരീഫ് കൂടും. ഇങ്ങിനെ പൂജ്യത്തിനും 9.00 രൂപക്കുമിടയിലായിരിക്കും വൈദ്യുതിയുടെ യു.ഐ. നിരക്കുകള്‍. എന്നാല്‍ പവര്‍മാര്‍ക്കറ്റിലെ വൈദ്യുതി വില പലപ്പോഴും 9.00 രൂപക്കും മുകളിലാകുന്നത് ആവൃത്തി കുറഞ്ഞ് അപകടാവസ്ഥയിലായാലും അധികമായി വൈദ്യുതി ഊറ്റിയെടുക്കുന്നതാണ് ലാഭകരം എന്ന അവസ്ഥയാണ് സൃഷ്ടിക്കുന്നത്. പല ഉത്തരേന്ത്യന്‍ സംസ്ഥാനങ്ങളും അവരുടെ പവര്‍ താരീഫ് അടക്കാറില്ല എന്നതുകൂടി ഇതോടൊപ്പം കണക്കിലെടുക്കേണ്ടതുണ്ട്. ഇതും കമ്പോലത്തില്‍ നിന്ന് വൈദ്യുതി വാങ്ങുന്നതിന് പകരം അണ്‍ ഷെഡ്യൂള്‍ഡ് ഊറ്റലിനെ പ്രോത്സാഹിപ്പിക്കുന്നുണ്ട്. മൊത്തത്തില്‍ വൈദ്യുതി ക്ഷാമത്തിന്റെ അനന്തരഫലമാണ് ജൂലൈ ഒടുക്കമുണ്ടായ ബ്ലാക്ക് ഔട്ട് എന്നു പറഞ്ഞാല്‍ തെറ്റില്ല.

എന്തു പാഠം പഠിക്കും

തുടര്‍ച്ചയായ രണ്ട് "ഇരുട്ടുവീഴ്ചകള്‍" സംഭവിച്ചിരിക്കുന്നു എന്നതില്‍ നിന്ന് പാഠം ഉള്‍ക്കൊണ്ട് ഇത് ആവര്‍ത്തിക്കതിരിക്കാന്‍ മുന്‍കരുതലുകള്‍ സ്വീകരിക്കാനാകുമോ? സംസ്ഥാനങ്ങളെ ഗ്രിഡ് അച്ചടക്കം പഠിപ്പിക്കുക എന്നതാണ് ഇതിന് പരിഹാരമായി നിര്‍ദ്ദേശിക്കപ്പെട്ടിരിക്കുന്നത്. വിശന്നു വലഞ്ഞവന്‍ ഒരു കഷണം ബ്രഡ് മോഷ്ടിച്ചു. അവനെ പിടികൂടി ശിക്ഷിച്ചതുകൊണ്ട് ഇനി അവന് മോഷ്ടിക്കാതിരിക്കാന്‍ ആകുമോ? വിശപ്പ് മാറാത്തിടത്തോളം ,ശിക്ഷയുടെ ഭയം കൊണ്ട് മാത്രം, മോഷണം നടത്താതിരിക്കാന്‍ സാദ്ധ്യമാകുകയില്ല. അതു തന്നെയാണ് സംസ്ഥാനങ്ങളുടെയും സ്ഥിതി. വൈദ്യുതി ആവശ്യകത വര്‍ദ്ധിക്കുന്നു. ആവശ്യത്തിന് ലഭിക്കുന്നില്ല. ഏത് ശിക്ഷ ലഭിച്ചാലും ഇനിയും വലിച്ചെടുക്കാന്‍ അവസരമുണ്ടായാല്‍ അതിന്റെ സാദ്ധ്യത ഉപയോഗപ്പെടുത്താതിരിക്കാന്‍ ഒരു സംസ്ഥാനത്തിനും കഴിയില്ല. ഗ്രിഡ് തകര്‍ച്ചകള്‍ ഇനിയും പ്രതീക്ഷിക്കാം എന്നുതന്നെയാണ് ഇത് നല്‍കുന്ന സൂചന. അതിന്റെ വിശദാംശങ്ങള്‍ മാറിയേക്കാം എന്നുമാത്രം. ഇരുട്ടു കൊണ്ട് ഓട്ടയടക്കാനാകില്ല എന്നുതന്നെ സാരം.

മറ്റൊരു പരിഹാരമില്ല

പ്രസരണ ശൃംഖലകള്‍ ശക്തിപ്പെടുത്താനുതകും വിധം പൊതുമേഖലാനിക്ഷേപം വര്‍ദ്ധിപ്പിക്കുക, തന്ത്രപ്രധാന മേഖലയായ വൈദ്യുതി രംഗം കമ്പോല ശക്തികള്‍ക്ക് വിട്ടുകൊടുക്കാതെ സാമൂഹ്യ നിയന്ത്രണം ഉറപ്പുവരുത്തുക, ഉല്‍പാദനപദ്ധതികള്‍ക്കും ഊര്‍ജ്ജ സംരക്ഷണ പ്രവര്‍ത്തനങ്ങള്‍ക്കും പ്രാധാന്യം നല്‍കുക എന്നിങ്ങനെ ദേശീയ വൈദ്യുതി നയത്തില്‍ കാതലായ മാറ്റങ്ങള്‍ വരുത്തിക്കൊണ്ടല്ലാതെ വൈദ്യ്തി രംഗത്തെ പ്രശ്നങ്ങള്‍ക്ക് പരിഹാരമുണ്ടാകില്ല. വോള്‍ട്ടേജ് കൂടിയിടത്തുനിന്ന് കുറഞ്ഞിടത്തേക്ക് പ്രവഹിക്കുക എന്നതിന് പകരം ലാഭം കുറഞ്ഞിടത്തുനിന്ന് കൂടിയിടത്തേക്ക് വൈദ്യുതിയെ പ്രവഹിപ്പിക്കാന്‍ ശ്രമിച്ചാല്‍ വൈദ്യുതി അതിന്റെ സഹജസ്വഭാവം കാണിക്കും. അതാണ് ഇന്ത്യന്‍ ബ്ലാക്ക് ഔട്ട് നമ്മെ വീണ്ടും ഓര്‍മ്മപ്പെടുത്തുന്നത്.

 

Add comment


Security code
Refresh

Random Videos

You need Flash player 6+ and JavaScript enabled to view this video.
Title: Power Quiz 2015 Final - Part-1

Latest Comments

Banner

Reference Book

 

Reference Book on Power

Electrical Engineering-- D' 1/4 Size Hard bound-- 1424 Pages-- Just Rs.1000/- only &n...

Visitors Counter

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
mod_vvisit_counterToday2340
mod_vvisit_counterYesterday5953
mod_vvisit_counterThis Month122464
mod_vvisit_counterLast Month149108

Online Visitors: 90
IP: 54.80.42.144
,
Time: 09 : 05 : 46