KSEBOA - KSEB Officers' Association

Thursday
Oct 19th
Text size
  • Increase font size
  • Default font size
  • Decrease font size
Home വാര്‍ത്തകള്‍ രണ്ട് ദശാബ്ദത്തെ ഇന്ത്യന്‍ വൈദ്യുതി മേഖലാ പരിഷ്കരണങ്ങള്‍

രണ്ട് ദശാബ്ദത്തെ ഇന്ത്യന്‍ വൈദ്യുതി മേഖലാ പരിഷ്കരണങ്ങള്‍

PDF
Hits smaller text tool iconmedium text tool iconlarger text tool icon

World Bankതൊണ്ണൂറുകളുടെ തുടക്കത്തില്‍ രാജ്യത്തെ സാമ്പത്തിക നയങ്ങളുടെ അഴിച്ചുപണിയെ തുടര്‍ന്ന് വൈദ്യുതി മേഖലയില്‍ ആരംഭിച്ച പരിഷ്കരണങ്ങള്‍ രണ്ട് ദശാബ്ദം പിന്നിട്ടുകഴിഞ്ഞു. ഈ പശ്ചാത്തലത്തിലാണ് കേന്ദ്ര ധനമന്ത്രാലയവും പ്ലാനിംഗ് കമ്മീഷനും ആവശ്യപ്പെട്ട പ്രകാരം ഇന്ത്യന്‍ വൈദ്യുതി മേഖല സംബന്ധിച്ച പഠനം (പുനഃപരിശോധന) ലോകബാങ്ക് എറ്റെടുത്തത്. പുനഃപരിശോധനയുടെ അടിസ്ഥാനത്തില്‍ 2014 ജൂണില്‍ പ്രസിദ്ധീകരിച്ച റിപ്പോര്‍ട്ട് ലോകബാങ്ക് തയ്യാറാക്കിയത് വിവിധ കണ്‍സള്‍ട്ടിംഗ് സ്ഥാപനങ്ങളായ ഡിലോയിറ്റ്, മെര്‍ക്കഡോസ്, പ്രൈസ് വാട്ടര്‍ ഹൌസ് കൂപ്പേര്‍സ് എന്നിവയുടെ സഹായത്തോടെയാണ്. കേന്ദ്ര വൈദ്യുതി മന്ത്രാലയത്തിലെ ജോയിന്റ് സെക്രട്ടറിയുടെ നേതൃത്വത്തിലുള്ള സാങ്കേതിക ഉപദേശക സമിതിയുടെ മേല്‍നോട്ടത്തിലാണ് പഠന റിപ്പോര്‍ട്ട് തയ്യാറാക്കിയിരിക്കുന്നത്. മേല്‍നോട്ട സമിതിയില്‍ ദില്ലിയിലെ റ്റാറ്റ പവറിന്റെ മാനേജിംഗ് ഡയറക്ടര്‍ അനില്‍ സര്‍ദാന, പശ്ചിമബംഗാള്‍ ഊര്‍ജ്ജ സെക്രട്ടറിയായിരുന്ന സുനില്‍മിത്ര തുടങ്ങി നിരവധി പ്രമുഖര്‍ അംഗങ്ങളായിരുന്നു.

ലോകബാങ്ക് റിപ്പോര്‍ട്ടിന്റെ മേല്‍ പശ്ചാത്തലം ഇവിടെ സൂചി പ്പിച്ചത് അതിന്റെ ഉള്ളടക്കം സംബന്ധിച്ച് ചില മുന്‍വിധികള്‍ക്ക് ഇടയായെങ്കിലും, അതിലെ ശുപാര്‍ശകളും കണ്ടെത്തലുകളും ഭാവി നയ രൂപീകരണത്തെ എത്രത്തോളം സ്വാധീനിക്കും എന്ന തിരിച്ചറിവിന് സഹായകരമാവും എന്നതിനാലാണ്. പ്രത്യേകിച്ചും വൈദ്യുതി നിയമത്തില്‍ സാരമായ ഭേദഗതികള്‍ക്ക് കേന്ദ്ര ഗവണ്മെന്റ് തയ്യാറെടുക്കുന്ന സാഹചര്യത്തില്‍.

ഇന്ത്യന്‍ വൈദ്യുതി രംഗത്തെ ഗൌരവത്തോടെ സമീപിക്കുന്നവരാകെ കഴിഞ്ഞ രണ്ടു ദശാബ്ദത്തെ അനുഭവങ്ങളുടെ അടിസ്ഥാനത്തില്‍ പരിഷ്കരണങ്ങളുടെ പുനഃപരിശോധനയുടെ ആവശ്യകത അംഗീകരിക്കുന്നതാണ്. ഇത്തരമൊരു ഗൌരവമേറിയ പരിശോധന 2011ലെ നമ്മുടെ സംസ്ഥാന സമ്മേളനത്തോടനുബന്ധിച്ച സെമിനാറില്‍ നാം തുടങ്ങിവയ്ക്കുകയുണ്ടായി. കേന്ദ്ര ഗവണ്മെന്റും പ്ലാനിംഗ് കമ്മീഷനും ഇതിനകം തന്നെ വിശദമായ ചില പഠനങ്ങള്‍ പൂര്‍ത്തിയാക്കിയിട്ടുണ്ട്. മുന്‍ സി. എ. ജി ശ്രീ. വി.കെ ഷുങ്ങ്ളുവിന്റെ നേതൃത്വത്തിലുള്ള ഉന്നതതല സമിതിയുടെ റിപ്പോര്‍ട്ട് ഇതില്‍ ശ്രദ്ധേയമാണ്. ഈ നിലയ്ക്ക് നിരന്തരമായി ഇന്ത്യന്‍ വൈദ്യുതി മേഖലയിലെ ചലനങ്ങള്‍ ശ്രദ്ധിക്കുന്നവര്‍ക്ക് ഇപ്പോഴത്തെ റിപ്പോര്‍ട്ടില്‍ നിന്നും പുതിയ ഉള്‍ക്കാഴ്ചകളേറെ ലഭിക്കാനില്ല എന്നതാണ് വസ്തുത. എന്നാല്‍ ഇന്ത്യയിലെ വൈദ്യുതി സ്ഥാപനങ്ങളുടെയും റഗുലേറ്ററി കമ്മീഷനുകളുടേയും പ്രവര്‍ത്തനം സംബന്ധിച്ച് ശാസ്ത്രീയമായ നിരവധി മാനദണ്ഡ
ങ്ങളുപയോഗിച്ചു നടത്തിയ പരിശോധനകളിലൂടെ ശ്രദ്ധേയമായ ഒട്ടേറെ ഫലങ്ങള്‍ ഇവര്‍ ലഭ്യമാക്കുന്നുണ്ട്.

ഇതിനകം പരിഷ്കരണ ഫലങ്ങള്‍ സംബന്ധിച്ച് എത്തിച്ചേര്‍ന്നിട്ടുള്ള നിരവധി അനുമാനങ്ങള്‍ക്ക് ഈ പഠനങ്ങള്‍ ശാസ്ത്രീയമായ പിന്‍ബലം ഉറപ്പാക്കുന്നു.

പരിഷ്കരണങ്ങള്‍

പരിഷ്കരണങ്ങളുടെ ഇതുവരെയുള്ള നേട്ടങ്ങള്‍ റിപ്പോര്‍ട്ട് വിലയിരുത്തുന്നത് ഇപ്രകാരമാണ്; വൈദ്യുതി ഉല്പാദനശേഷി 1991നെ അപേക്ഷിച്ച് മൂന്നിരട്ടിയായി വര്‍ദ്ധിച്ചു, പാരമ്പര്യേതര ഊര്‍ജ്ജ ഉല്പാദനശേഷിയില്‍ ഗണ്യമായ വര്‍ദ്ധനവുണ്ടായി, ദേശീയ ഗ്രിഡ് നിലവില്‍ വന്നു, വൈദ്യുതി കമ്പോളം നിലവില്‍ വന്നു, ഗ്രാമങ്ങളിലെ വൈദ്യുതി ലഭ്യതയില്‍ വലിയ പുരോഗതി കൈവരിച്ചു, വിതരണരംഗത്ത് ഫ്രാഞ്ചൈസി പോലെയുള്ള സംരംഭങ്ങള്‍ വിജയകരമായി തുടക്കമിട്ടു. എന്നാല്‍ റിപ്പോര്‍ട്ടിലെ വിശദാംശങ്ങള്‍ സൂക്ഷ്മമായി പരിശോധിക്കുമ്പോള്‍ ഈ നേട്ടങ്ങള്‍ പലതും പരിഷ്കരണ പരിപാടിയുടെ ഫലമായല്ല എന്ന് വ്യക്തമാകും. വൈദ്യുതി ബോര്‍ഡുകളുടെ വിഭജനം, സ്വകാര്യവല്കരണം, റഗുലേറ്ററി കമ്മീഷനുകളുടെ രൂപീകരണം തുടങ്ങിയവയാണല്ലോ പ്രധാനപ്പെട്ട വൈദ്യുതി മേഖലാ പരിഷ്കരണ പരിപാടി. ഇവയൊന്നുമല്ല പാരമ്പര്യേതര ഊര്‍ജ്ജ ഉല്പാദന വര്‍ദ്ധനവിലേക്കും ദേശീയ ഗ്രിഡ് രൂപീകരണത്തിനും, ഗ്രാമ വൈദ്യുതീകരണത്തിനും വഴിവെച്ചതെന്നും പകല്‍പോലെ വ്യക്തമാണ്. റിപ്പോര്‍ട്ട് അങ്ങിനെ അവകാശപ്പെട്ടിട്ടുണ്ടെന്നും പറയാന്‍ കഴിയില്ല. ഈ കാലയളവിലെ പൊതു നേട്ടങ്ങളായി ഇവ രേഖപ്പെടുത്തിയിരിക്കയാണ്.

എന്നാല്‍ ഇക്കാലയളവില്‍ വൈദ്യുതി മേഖലയിലെ നഷ്ടം കുതിച്ചുയരുകയായിരുന്നു എന്നത് റിപ്പോര്‍ട്ട് ശരിവയ്ക്കുന്നു. 1991ലെ ആകെ നഷ്ടമായ 7000 കോടി രൂപ 2002 ആയതോടെ 24,000 കോടി രൂപയായും 2011 ആയതോടെ 1,14,600 കോടി രൂപയായും വര്‍ദ്ധിച്ചു. പ്രതിവര്‍ഷം ഏകദേശം 9 ശതമാനം നിരക്കിലാണ് യഥാര്‍ത്ഥ നഷ്ടം വര്‍ദ്ധിച്ചുവരുന്നത്. പുതിയ മൂലധന നിക്ഷേപത്തിനും നഷ്ടം നികത്തുന്നതിനും പൊതു സ്വകാര്യ സ്ഥാപനങ്ങള്‍ മുഖ്യമായും വായ്പയെ ആശ്രയിച്ചതു വഴി വൈദ്യുതി മേഖലയുടെ വായ്പാ ബാധ്യത 2011 ഓടെ 3.5 ലക്ഷം കോടി രൂപയായി വര്‍ദ്ധിച്ചിരിക്കുന്നു. വായ്പ തിരിച്ചടയ്ക്കുന്നതില്‍ നിരവധി ഉല്പാദന വിതരണ കമ്പനികള്‍ വീഴ്ച വരുത്തിയതോടെ വൈദ്യുതി മേഖലയിലെ പ്രതിസന്ധി ധനമേഖലയിലേക്കും വ്യാപിച്ചു. 2002ല്‍ പ്രഖ്യാപിച്ച സാമ്പത്തിക രക്ഷാപാക്കേജിന്റെ 4 മടങ്ങ് വലുപ്പമുള്ള രക്ഷാപാക്കേജാണ് പരിഷ്കരണശേഷം പ്രഖ്യാപിക്കേണ്ടി വന്നിരിക്കുന്നത്. പ്രസരണ വിതരണ നഷ്ടം കുറയ്ക്കുന്നതിന് കാര്യമായി നേട്ടമൊന്നും ഇക്കാലയളവില്‍ കൈവരിക്കാന്‍ കഴിഞ്ഞിട്ടില്ല; ചുരുക്കം ചില സംസ്ഥാനങ്ങള്‍ മാത്രമാണ് ഇക്കാര്യത്തില്‍ പുരോഗതി കാട്ടുന്നത്. പല സംസ്ഥാനങ്ങളിലും വാങ്ങുന്ന വൈദ്യുതിയുടെ പകുതിയിലധികവും വിതരണ-വാണിജ്യ നഷ്ടമായി ചോരുകയാണ്.
നഷ്ടം ഭാഗികമായി നികത്തുന്നതിനു വേണ്ടി സംസ്ഥാന ഗവണ്മെന്റുകള്‍ക്ക് വന്‍ സബ്സിഡി ഭാരം വഹിക്കേണ്ടി വരുന്നുണ്ട്. 2003നും 2011നും ഇടയില്‍ 1,75,000 കോടി രൂപയുടെ സബ്സിഡി തുകയാണ് സംസ്ഥാനങ്ങള്‍ വകയിരുത്തിയത്. ഇതില്‍ 1,30,000 കോടി രൂപ വിതരണ കമ്പനികള്‍ക്ക് ഗവണ്മെന്റ് പണമായി നല്കിയിട്ടുണ്ട്. രാജസ്ഥാന്‍, ആന്ധ്രാപ്രദേശ്, പഞ്ചാബ്, ഹര്യാന, കര്‍ണാടക, ഉത്തര്‍പ്രദേശ് എന്നീ സംസ്ഥാനങ്ങളിലാണ് ഏറ്റവുമധികം സബ്സിഡി അനുവദിക്കേണ്ടി വന്നിട്ടുള്ളത്. (ഇവയില്‍ പഞ്ചാബ് ഒഴികെയുള്ള സംസ്ഥാനങ്ങളെല്ലാം 2003ന് മുന്‍പ് തന്നെ വിഭജനം പൂര്‍ത്തിയാക്കിയവയാണ്). ഈ നിലയ്ക്ക് സബ്സിഡി അനുവദിക്കേണ്ട വരുന്ന 16 ഇന്ത്യന്‍ സംസ്ഥാനങ്ങളാണുള്ളത്. ഇവയുടെ ശരാശരി സബ്സിഡി ബാധ്യത സംസ്ഥാന ബജറ്റിന്റെ 2 ശതമാനമാണ്. എന്നാല്‍ ചില സംസ്ഥാനങ്ങളില്‍ സബ്സിഡി ഭാരം ബജറ്റിന്റെ 15 മുതല്‍ 22 ശതമാനം വരെയാണ്.

2003നും 2011നുമിടയില്‍ വൈദ്യുതി മേഖലയുടെ വായ്പാ സാധ്യത 23 ശതമാനം കണ്ടാണ് പ്രതിവര്‍ഷം വര്‍ദ്ധിച്ചുവരുന്നത്. 3.5 ലക്ഷം കോടി വരുന്ന ഈ വായ്പ GDPയുടെ 5 ശതമാനമായി വര്‍ദ്ധിച്ചിരിക്കുന്നു. എന്നാല്‍, ഇക്കാലയളവില്‍ കേരളത്തിലെ (കെ.എസ്.ഇ.ബി.യുടെ) വായ്പാബാധ്യത ഗണ്യമായി കുറയുകയാണ് ചെയ്തത്. വായ്പയില്‍ ഏറ്റവും കുറവ് അനുഭവപ്പെട്ടതും സ്റ്റേറ്റ് GDPയുടെ അനുപാതത്തില്‍ ഏറ്റവും കുറവ് വായ്പാ ബാധ്യതയുള്ളതും കേരളത്തിലാണ് (0.5%). മണിപ്പൂര്‍, നാഗാലാന്‍ഡ് എന്നീ ചെറു സംസ്ഥാനങ്ങളെ ഒഴിവാക്കിയാല്‍ 2011ല്‍ ഏറ്റവും ചുരുങ്ങിയ വായ്പാ ബാധ്യതയുള്ളതും കെ.എസ്.ഇ.ബി.യ്ക്കാണ്. വിവിധ സംസ്ഥാനങ്ങളിലെ വായ്പാ ബാധ്യത ചിത്രം 1-ല്‍ കാണിച്ചിരിക്കുന്നു.

നഷ്ടത്തിലേക്ക് നയിക്കുന്ന ഘടകങ്ങള്‍

നഷ്ടത്തിലേക്കും വര്‍ദ്ധിക്കുന്ന വായ്പാ ബാധ്യതയിലേക്കും നയിക്കുന്ന ഘടകങ്ങള്‍ ലോകബാങ്ക് വിശദമായി പരിശോധിക്കുന്നുണ്ട്. ചിലവിനനുസൃതമല്ലാത്ത വൈദ്യുതി നിക്കുകള്‍, ഉയര്‍ന്ന വിതരണ-വാണിജ്യ നഷ്ടം, അനിയന്ത്രിതമായി വര്‍ദ്ധിക്കുന്ന വൈദ്യുതി വാങ്ങല്‍ ചിലവ്, കാര്യക്ഷമതയില്ലാത്ത വൈദ്യുതി ഉല്പാദന നിലയങ്ങള്‍, റവന്യൂ പിരിവിലെ കാര്യക്ഷമതയില്ലായ്മ എന്നിവയാണ് നഷ്ടത്തിലേക്ക് നയിക്കുന്ന ഘടകങ്ങളായി റിപ്പോര്‍ട്ട് കണ്ടെത്തുന്നത്. വൈദ്യുതി വാങ്ങല്‍ ചിലവിലെ വര്‍ദ്ധനവിന്റെ കാരണങ്ങള്‍ വിശദമായിത്തന്നെ റിപ്പോര്‍ട്ട് പരിശോധിക്കുന്നുണ്ട്. ആഭ്യന്തര കല്ക്കരി ഉല്പാദനം ആസൂത്രണം ചെയ്ത നിലയില്‍ വര്‍ദ്ധിക്കാത്തതും അതുവഴി വിലകൂടിയ ഇറക്കുമതി കല്ക്കരിയെ ആശ്രയിക്കേണ്ടി വരുന്നതും പ്രധാന പ്രശ്നങ്ങളിലൊന്നാണ്. വൈദ്യുതി വിതരണ സ്ഥാപനങ്ങള്‍ കൃത്യമായ ആസൂത്രണമില്ലാതെ കമ്പോളത്തില്‍ നിന്നും വൈദ്യുതി വാങ്ങുന്നത് ചിലവ് വര്‍ദ്ധിക്കാന്‍ ഇടയാകുന്നുണ്ട്. ഒട്ടനവധി താപ വൈദ്യുതി നിലയങ്ങളുടെ കാര്യക്ഷമത കുറവാണെന്നതും ചിലവ് വര്‍ദ്ധിക്കുന്നതിന്റെ കാരണങ്ങളിലൊന്നാണ്.

വിവിധ വൈദ്യുതി വിതരണ സ്ഥാപനങ്ങള്‍ വൈദ്യുതി വാങ്ങുന്നതില്‍ കാഴ്ചവെക്കുന്ന കാര്യക്ഷമത വിശദമായി റിപ്പോര്‍ട്ടില്‍ പരിശോധിക്കുന്നുണ്ട്. കേരളത്തിന്റെ കാര്യക്ഷമത ഇക്കാര്യത്തില്‍ കുറവാണെന്നാണ് വിലയിരുത്തിയിട്ടുള്ളത്. ആകെ വൈദ്യുതി ആവശ്യകതയില്‍ സംസ്ഥാനത്തിനുള്ളിലെ പദ്ധതികളില്‍ നിന്നുള്ള വൈദ്യുതിയുടെ പങ്ക്, ജലവൈദ്യുതിയുടെ പങ്ക്, വിവിധ സ്രോതസ്സുകളില്‍ നിന്നും വാങ്ങുന്ന വൈദ്യുതിയുടെ വിലയിലുള്ള അന്തരം എന്നിവ കാര്യക്ഷമതയുടെ അളവുകോലുകളാണ്. ഇറക്കുമതി വൈദ്യുതിയെ ആശ്രയിക്കുന്നതും കാലവര്‍ഷത്തിന്റെ ഏറ്റിറക്കങ്ങളാല്‍ ഉല്പാദനം ക്രമീകരിക്കേണ്ട ജലവൈദ്യുതിയെ ആശ്രയിക്കുന്നതും വിതരണ സ്ഥാപനത്തിന്റെ റിസ്ക് വര്‍ദ്ധിപ്പിക്കുന്നതിനാല്‍ കാര്യക്ഷമത കുറഞ്ഞ വൈദ്യുതി വാങ്ങല്‍ രീതികളായിട്ടാണ് വിലയിരുത്തിയിട്ടുള്ളത്.

ഇന്ത്യയിലെ അറുപതോളം പൊതു സ്വകാര്യ വൈദ്യുത വിതരണ സ്ഥാപനങ്ങളുടെ പ്രവര്‍ത്തനപരവും സാമ്പത്തികവുമായ കാര്യക്ഷമത ലോകബാങ്ക് വിശദമായിത്തന്നെ പരിശോധിക്കുന്നുണ്ട്. അന്തര്‍ദ്ദേശീയമായി അംഗീകരിക്കപ്പെട്ട വിവിധ അളവുകോലുകളുടെ (Benchmarks) അടിസ്ഥാനത്തിലുള്ള പരിശോധനയില്‍ ഏറ്റവും മികച്ച സ്ഥാപനങ്ങളെയും മോശം സ്ഥാപനങ്ങളെയും തരംതിരിക്കുകയും ചെയ്തിട്ടുണ്ട്. 2003 മുതല്‍ 2011 വരെയുള്ള ഓരോ വര്‍ഷത്തെയും പ്രവര്‍ത്തനം ഈ നിലയില്‍ റിപ്പോര്‍ട്ട് പരിശോധിക്കുന്നു. ഓരോ അളവുകോലുകളുടേയും അടിസ്ഥാനത്തില്‍ മികവ് രേഖപ്പെടുത്തിയ ആദ്യ 5 സ്ഥാപനങ്ങളും അവസാന 5 സ്ഥാപനങ്ങളും സംബന്ധിച്ച വിവരങ്ങള്‍ പ്രത്യേകമായി ലഭ്യമാക്കിയിട്ടുണ്ട്. ചില അളവുകോലുകളില്‍ ആദ്യ 5 സ്ഥാനങ്ങളില്‍ വരുന്ന സംസ്ഥാനങ്ങള്‍ മറ്റ് ചില അളവുകോലുകളില്‍ വളരെ പിന്നോക്കം പോകുന്നതായി കാണാം. അതേപോലെ ചില വര്‍ഷങ്ങളില്‍ മികവ് കാട്ടുന്ന സംസ്ഥാനങ്ങള്‍ തുടര്‍ന്നുള്ള വര്‍ഷങ്ങളില്‍ പിന്നോക്കം പോകുന്നതായും കാണാന്‍ കഴിയും. വിശദമായ ഈ പരിശോധനയുടെ അടിസ്ഥാനത്തില്‍ പ്രത്യേക പരാമര്‍ശത്തോടെ കേരളത്തിന്റെ മികവ് ലോകബാങ്ക് എടുത്തുപറഞ്ഞ് പ്രകീര്‍ത്തിച്ചിട്ടുണ്ട്.

പരിഷ്കരണങ്ങളുടെ നടപ്പാക്കല്‍

പ്രത്യേകം തയ്യാറാക്കിയ മാനദണ്ഡങ്ങളുടെ അടിസ്ഥാനത്തില്‍ വിവിധ സംസ്ഥാനങ്ങള്‍ പരിഷ്കരണം എത്രത്തോളം നടപ്പാക്കിയെന്ന് റിപ്പോര്‍ട്ട് പരിശോധിക്കുന്നു. ഉല്പാദന വിതരണ രംഗത്ത് മത്സരം സാധ്യമാക്കിയത്, സുതാര്യമായ നടപടിക്രമങ്ങള്‍, ചിലവ് പൂര്‍ണ്ണമായി ഈടാക്കാന്‍ കഴിയുന്ന താരിഫ് നിര്‍ണ്ണയം, ഗ്രാമ വൈദ്യുതീകരണം, വൈദ്യുതി വിതരണത്തിന്റെ ഗുണനിലവാരം, പാരമ്പര്യേതര ഊര്‍ജ്ജ ഉല്പാദനം എന്നിവയാണ് മികവിന്റെ മാനദണ്ഡങ്ങളായി കണക്കാക്കിയിട്ടുള്ളത്. ഈ ലക്ഷ്യങ്ങള്‍ കൈവരിക്കാന്‍ നടപ്പാക്കേണ്ട പരിഷ്കരണ പരിപാടികളായി റിപ്പോര്‍ട്ട് കണക്കാക്കിയിട്ടുള്ളത് ബോര്‍ഡുകളുടെ വിഭജനം, ഓപ്പണ്‍ അക്സസ് സംവിധാനം, റഗുലേറ്ററി കമ്മീഷനുകളുടെ താരിഫ് നിര്‍ണ്ണയം, RGGVY പദ്ധതിയുടെ നടത്തിപ്പ്, പ്രസരണവിതരണ നഷ്ടം കുറയ്ക്കല്‍, പാരമ്പര്യേതര ഊര്‍ജ്ജ ഉല്പാദനത്തെ പ്രോത്സാഹിപ്പിക്കുന്ന ചട്ടങ്ങള്‍ രൂപീകരിക്കല്‍ എന്നിവയാണ്.

ഈ പരിശോധനയുടെ അടിസ്ഥാനത്തില്‍ ഇന്ത്യന്‍ സംസ്ഥാനങ്ങള്‍ പരിഷ്കരണങ്ങള്‍ ഏറ്റിറക്കത്തോടെയാണ് നടപ്പാക്കിയതെന്ന് റിപ്പോര്‍ട്ട് ചൂട്ടിക്കാട്ടുന്നു. മഹാരാഷ്ട്ര, മദ്ധ്യപ്രദേശ്, ഒറീസ്സ, ഗുജറാത്ത്, ദില്ലി എന്നിവയാണ് പരിഷ്കരണങ്ങള്‍ നടപ്പാക്കാന്‍ മികവ് കാട്ടിയവ. എന്നാല്‍ ഈ സംസ്ഥാനങ്ങളില്‍ ഗുജറാത്തും ദില്ലിയുമൊഴികെ മറ്റുള്ളവ പ്രവര്‍ത്തന മികവിന്റെയും സാമ്പത്തിക ഭദ്രതയുടെയും കാര്യത്തില്‍ പിന്നോക്കമാണ്. ചില പരിഷ്കരണ പരിപാടികള്‍ നടപ്പാക്കുന്നതില്‍ കേരളം ഏറെ പിന്നിലുമാണ്.

വിശദമായ പരിശോധനയില്‍ കാണാന്‍ കഴിയുന്നത് ഒട്ടനവധി സംസ്ഥാനങ്ങളില്‍ പരിഷ്കരണ പരിപാടി നടപ്പാക്കിയതിലെ നേട്ടത്തിനാനുപാതികമായി പ്രവര്‍ത്തനത്തില്‍ മികവുണ്ടാക്കാനായിട്ടില്ലെന്നാണ്. ആസ്സം, പശ്ചിമബംഗാള്‍, മദ്ധ്യപ്രദേശ്, ഒറീസ്സ, ദില്ലി, ഉത്തര്‍പ്രദേശ്, ആന്ധ്രപ്രദേശ്, ബീഹാര്‍, മേഘാലയ തുടങ്ങിയ സംസ്ഥാനങ്ങളുടെ കാര്യത്തില്‍ ഇത് വ്യക്തമാണ്. മറിച്ച് പരിഷ്കരണ പരിപാടി നടപ്പാക്കിയതിലുള്ള നേട്ടത്തേക്കാള്‍ ഉയര്‍ന്ന നേട്ടം പ്രവര്‍ത്തന മികവില്‍ കൈവരിക്കാന്‍ ചില സംസ്ഥാനങ്ങള്‍ക്കെങ്കിലും കഴിഞ്ഞിട്ടുമുണ്ട്. കേരളം, തമിഴ്‍നാട്, ഗോവ, കര്‍ണാടക, പഞ്ചാബ്, ഛത്തിസ്ഢ് എന്നിവ ഇതിനുദാഹരണങ്ങളാണ്.

ഭരണപരമായ ഘടകങ്ങള്‍

പ്രവര്‍ത്തന മികവിന് സഹായകരമായ ഭരണപരമായ ഘടകങ്ങള്‍ വിവിധ സംസ്ഥാനങ്ങള്‍ എത്രത്തോളം നടപ്പാക്കിയെന്ന് റിപ്പോര്‍ട്ട് പരിശോധിക്കുന്നുണ്ട്. ബോര്‍ഡുകളുടെ വിഭജനം, കോര്‍പ്പറേറ്റ് ഭരണക്രമം നടപ്പാക്കല്‍, റഗുലേറ്ററി കമ്മീഷനുകളുടെ പ്രവര്‍ത്തന മികവ് എന്നിവ ഇതിന്റെ ഭാഗമായി പരിശോധനാ വിധേയമാകുന്നുണ്ട്. ഇക്കാര്യങ്ങള്‍ പരിശോധിക്കുമ്പോള്‍ ഗുജറാത്തിലെയും പശ്ചിമബംഗാളിലെയും നേട്ടങ്ങളെ റിപ്പോര്‍ട്ട് പ്രത്യേകമായി പരാമര്‍ശിച്ച് പ്രശംസിക്കുന്നുണ്ട്. കേരളത്തിലെ റഗുലേറ്ററി കമ്മീഷന്റെ സുതാര്യത പര്യാപ്തമല്ലെന്നാണ് റിപ്പോര്‍ട്ട് ചൂണ്ടിക്കാട്ടുന്നത്.

പ്രധാനപ്പെട്ട ശുപാര്‍ശകള്‍

1) വിതരണരംഗത്ത് ഓപ്പണ്‍ അക്സസ്, ചിലവിനനുസൃതമായ താരിഫ്, സ്റ്റാന്‍ഡേര്‍ഡ് ഓഫ് പെര്‍ഫോര്‍മന്‍സ് എന്നിവ ഉറപ്പുവരുത്തുക
2) റഗുലേറ്ററി കമ്മീഷനുകളുടെ പ്രവര്‍ത്തനം ഫലപ്രദമാക്കുക. അവയെ സംസ്ഥാന ഗവണ്മെന്റുകളുടെ നിയന്ത്രണത്തില്‍ നിന്നും വിമുക്തമാക്കുക. സംസ്ഥാന റഗുലേറ്ററി കമ്മീഷനുകള്‍ക്ക് പകരം ഒന്നിലധികം സംസ്ഥാനങ്ങള്‍ക്കായി പ്രാദേശിക റഗുലേറ്ററി കമ്മീഷനുകള്‍. റഗുലേറ്ററി കമ്മീഷനുകളുടെ പ്രവര്‍ത്തനം പാര്‍ലമെന്ററി സ്റ്റാന്‍ഡിങ്ങ് കമ്മറ്റിയുടെ പരിശോധനയ്ക്ക് നിരന്തരമായി വിധേയമാക്കുക.
3) സംസ്ഥാന വിതരണ യൂട്ടിലിട്ടികളുടെ പ്രവര്‍ത്തനത്തിലുള്ള ഗവണ്മെന്റ് ഇടപെടല്‍ പരിമിതപ്പെടുത്തുക. മികച്ച കോര്‍പ്പറേറ്റ് ഭരണ മാതൃകകള്‍ നടപ്പാക്കുക. സ്വതന്ത്ര ഡയറക്ടര്‍മാരെ നിയോഗിക്കുക. NTPC, PGCIL തുടങ്ങിയ സ്ഥാപനങ്ങള്‍ക്ക് വിതരണ സ്ഥാപനങ്ങളില്‍ ഓഹരി പങ്കാളിത്തവും ഭരണപങ്കാളിത്തവും അനുവദിക്കുക, വിതരണ യൂട്ടിലിറ്റികളും സംസ്ഥാന ഗവണ്മെന്റുകളും പ്രവര്‍ത്തന മികവ് ഉറപ്പാക്കാനാവശ്യമായ MoUവില്‍ ഏര്‍പ്പെടുക.
4) കേന്ദ്ര പദ്ധതികള്‍ അനുവദിക്കുന്നതും, PFC, REC വായ്പകള്‍ അനുവദിക്കുന്നതും വിതരണ യൂട്ടിലിറ്റികളുടെ പ്രവര്‍ത്തന മികവിന്റെ അടിസ്ഥാനത്തിലാക്കുക. മികച്ച കോര്‍പ്പറേറ്റ് ഭരണ മാതൃകകള്‍ സ്വീകരിക്കാന്‍ ഇവ പ്രേരകമായി ഉപയോഗിക്കണം.
5) ഫ്രാഞ്ചൈസി അടക്കമുള്ള സ്വകാര്യ പങ്കാളിത്ത മാതൃകകള്‍ യുക്തമായ നിലയില്‍ ഉപയോഗപ്പെടുത്തുക. സ്വകാര്യ പങ്കാളിത്തം പട്ടണപ്രദേശങ്ങളില്‍ മാത്രം തുടക്കത്തില്‍ ഏര്‍പ്പെടുത്തുക. നിലവിലുള്ള വിതരണ യൂട്ടിലിറ്റികള്‍ക്ക് കുറഞ്ഞ നിരക്കിലുള്ള വൈദ്യുതി അനുവദിച്ച് അവയെ ഗ്രാമീണ മേഖലയുടെ മാത്രം വിതരണ ചുമതലയിലേക്ക് മാറ്റുക. പട്ടണങ്ങളിലെ സ്വകാര്യ ഏജന്‍സികള്‍ സ്വന്തം നിലയ്ക്ക് വൈദ്യുതി കണ്ടെത്തണം. ക്രമേണ ഇവയെ ഗ്രാമീണ മേഖലയിലേക്കും വ്യാപിപ്പിക്കാന്‍ അനുവദിക്കണം.
6) ഗ്രാമീണ വൈദ്യുതീകരണം ഉത്തരവാദിത്തത്തോടെ നടപ്പാക്കുക. RGGVY പദ്ധതി കൃത്യമായി രൂപകല്പന ചെയ്യാത്തതു വഴി ഗ്രാമ വൈദ്യുതി വിതരണം യൂട്ടിലിറ്റികള്‍ക്ക് അധിക നഷ്ടം വരുത്തുകയാണ്. ഗ്രാമങ്ങളില്‍ ഉല്പാദനക്ഷമമായ വൈദ്യുത ആവശ്യകത പ്രോത്സാഹിപ്പിക്കുന്ന നടപടികള്‍ വഴി ഉയര്‍ന്ന വൈദ്യുതാവശ്യകത ഗ്രാമപ്രദേശങ്ങളില്‍ ഉറപ്പുവരുത്തേണ്ടതുണ്ട്.
7) ഗാര്‍ഹിക വൈദ്യുതി നിരക്കുകള്‍ യുക്തിസഹമാക്കുക
8) കേന്ദ്ര വൈദ്യുതി അതോറിറ്റിയുടെ പങ്ക് വിപുലപ്പെടുത്തണം. ആസൂത്രണം മെച്ചപ്പെടുത്തണം.

വിതരണ മേഖലയുടെ വിഭജനം

വിപുലമായ ശുപാര്‍ശകളുടെ ഒരു ക്രോഡീകരണം മാത്രമാണ് മുകളില്‍ നല്കിയിട്ടുള്ളത്. അവയുടെ യുക്തിപരതയിലേക്കും ശരിതെറ്റുകളിലേക്കും ഇപ്പോള്‍ കടക്കുന്നില്ല. എന്നാല്‍ ഏറ്റവും പ്രസക്തമായ കാര്യം വിതരണരംഗം വീണ്ടും വിഭജിച്ച് സപ്ലൈ ലൈസന്‍സി, വിതരണ ലൈസന്‍സി എന്നിങ്ങനെ വേര്‍തിരിക്കണമെന്ന നിയമഭേദഗതി നിര്‍ദ്ദേശം (seperation of wires and content) വിശദമായ പരിശോധനയ്ക്ക് ശേഷം റിപ്പോര്‍ട്ട് തള്ളിക്കളയുന്നു എന്നതാണ്. വിവിധ ലോകരാജ്യങ്ങളിലെ ഇക്കാര്യത്തിലുള്ള അനുഭവം ലോകബാങ്ക് വിശദമായി തന്നെ റിപ്പോര്‍ട്ടില്‍ പരിശോധിക്കുന്നുണ്ട്. അമേരിക്കയിലടക്കം വികസിത രാജ്യങ്ങളില്‍ പോലും പൊതുവേ ഈ മാതൃക വിജയിച്ചിട്ടില്ല എന്ന് റിപ്പോര്‍ട്ട് ചൂണ്ടിക്കാട്ടുന്നു. ഇപ്പോഴത്തെ സാഹചര്യത്തില്‍ പരീക്ഷണാടിസ്ഥാനത്തില്‍ ഏതെങ്കിലും പ്രദേശത്ത് നടപ്പാക്കി അനുഭവം വിലയിരുത്തി മാത്രമേ തുടര്‍ നടപടികളേക്കുറിച്ച് ചിന്തിക്കേണ്ടതുള്ളൂ എന്നാണ് ശുപാര്‍ശ

ഉപസംഹാരം

ലോകബാങ്കിന്റെ കാര്‍മ്മികത്വത്തില്‍ ഒറീസ്സയില്‍ 1995ല്‍ ആരംഭിച്ച വൈദ്യുതി മേഖലയിലെ വിഭജനത്തിന്റെയും സ്വകാര്യവല്കരണത്തിന്റെയും അനുഭവം ലോകബാങ്ക് തന്നെ പുനഃപരിശോധിക്കുമ്പോള്‍ നിഷ്പക്ഷത നമുക്ക് പ്രതീക്ഷിക്കാനാവില്ല. എന്നാല്‍ പ്രത്യയശാസ്ത്രത്തിന്റെ മുന്‍വിധികള്‍ നിലനില്‍ക്കേത്തന്നെ ഇന്ത്യന്‍ വൈദ്യുതി മേഖലയിലെ വസ്തുതകള്‍ ഒട്ടൊക്കെ സത്യസന്ധതയോടെ അവതരിപ്പിക്കാന്‍ ശ്രമിച്ചിട്ടുണ്ടെന്നത് പ്രസ്താവ്യമാണ്. ലോകബാങ്ക് മാതൃക തള്ളിക്കളഞ്ഞ് ബദല്‍ നയത്തിന്റെ അടിസ്ഥാനത്തില്‍ ലോകോത്തര മാതൃകയായി കേരളത്തിന്റെ വൈദ്യുതിമേഖലയെ വളര്‍ത്തിയെടുക്കാനുള്ള ശ്രമങ്ങള്‍ ഒട്ടൊക്കെ വിജയിച്ചിട്ടുണ്ടെന്ന് നമുക്ക് അഭിമാനത്തോടെ തിരിച്ചറിയാനുള്ള അവസരം കൂടി റിപ്പോര്‍ട്ടൊരുക്കുന്നു. വൈദ്യുതി ഉല്പാദനത്തിലെ വീഴ്ചകളും 2011ന് ശേഷം കടന്നുകൂടിയ ലക്ഷ്യബോധമില്ലായ്മയും പരിഹരിച്ചാല്‍ കേരള മാതൃകയ്ക്ക് ഇനിയും ശക്തമായി മുന്നോട്ട് കുതിക്കാന്‍ കഴിയുമെന്ന് നിശ്ചയം.

 

Add comment


Security code
Refresh


 

Random Videos

You need Flash player 6+ and JavaScript enabled to view this video.
Title: Power Quiz 2015 Final - Part-1

Latest Comments

Banner

Reference Book

 

Reference Book on Power

Electrical Engineering-- D' 1/4 Size Hard bound-- 1424 Pages-- Just Rs.1000/- only &n...

Visitors Counter

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
mod_vvisit_counterToday895
mod_vvisit_counterYesterday3990
mod_vvisit_counterThis Month86403
mod_vvisit_counterLast Month134230

Online Visitors: 72
IP: 54.224.197.251
,
Time: 05 : 04 : 54