KSEBOA - KSEB Officers' Association

Tuesday
May 23rd
Text size
  • Increase font size
  • Default font size
  • Decrease font size
Home വാര്‍ത്തകള്‍ എ.ആര്‍ .ആര്‍ . & ഇ.ആര്‍ .സി. ഉത്തരവും റഗുലേറ്ററി കമ്മീഷന്റെ സമീപനങ്ങളും

എ.ആര്‍ .ആര്‍ . & ഇ.ആര്‍ .സി. ഉത്തരവും റഗുലേറ്ററി കമ്മീഷന്റെ സമീപനങ്ങളും

PDF
Hits smaller text tool iconmedium text tool iconlarger text tool icon
ARR&ERCകേരള സംസ്ഥാന ഇലക്ട്രിസിറ്റി റഗുലേറ്ററി കമ്മീഷന്‍ ജൂണ്‍ ഒന്നിന് പുറപ്പെടുവിച്ച വൈദ്യുതി ബോര്‍ഡിന്റെ 2011-12 വര്‍ഷത്തെ എ.ആര്‍ .ആര്‍ . & ഇ.ആര്‍ .സി ഉത്തരവു പ്രകാരം ബോര്‍ഡിന് ഈ സാമ്പത്തിക വര്‍ഷം 887.81 കോടി രൂപ റവന്യൂ ഗ്യാപ്പ് ഉണ്ടാകുമെന്നാണ് തിട്ടപ്പെടുത്തിയിട്ടുള്ളത്. വൈദ്യുതി ബോര്‍ഡ് സമര്‍പ്പിച്ച കണക്കു പ്രകാരം 2208.31 കോടി രൂപ റവന്യൂ ഗ്യാപ്പ് പ്രതീക്ഷിച്ചിരുന്നുവെങ്കിലും വിവിധ ചെലവിനങ്ങളില്‍ കാര്യമായ വെട്ടിക്കുറവാണ് റഗുലേറ്ററി കമ്മീഷന്‍ വരുത്തിയത്. ഈ ഉത്തരവനുസരിച്ച് വില്‍ക്കപ്പെടുന്ന ഓരോ യൂണിറ്റ് വൈദ്യുതിക്കും 57 പൈസയുടെ റവന്യൂ വിടവാണ് റഗുലേറ്ററി കമ്മീഷന്‍ കാണുന്നത്. ഇത് നികത്താന്‍ ആവശ്യമായ മാര്‍ഗ്ഗങ്ങള്‍ നിര്‍ദ്ദേശിച്ചുകൊണ്ട് താരീഫ് പെറ്റീഷന്‍ സമര്‍പ്പിക്കാന്‍ റഗുലേറ്ററി കമ്മീഷന്‍ ബോര്‍ഡിനോട് ആവശ്യപ്പെട്ടിട്ടുണ്ട്.

റഗുലേറ്ററി കമ്മീഷന്റെ ഒമ്പതാമത്തെ എ.ആര്‍ .ആര്‍ . & ഇ.ആര്‍ .സി ഉത്തരവാണ് ഇത്തവണത്തേത്. 2003-04 മുതലുള്ള എല്ലാ ഉത്തരവിലും വൈദ്യുതിബോര്‍ഡ് നല്‍കുന്ന കണക്കുകളില്‍ നിന്ന് വ്യത്യസ്ഥമായ റവന്യൂ ഗ്യാപ്പാണ് അംഗീകരിക്കപ്പെടാറുള്ളത് (പട്ടിക കാണുക). ഈ നിലയില്‍ ഇത്തവണത്തെ ഉത്തരവിലും വൈദ്യുതിബോര്‍ഡ് സമര്‍പ്പിച്ച കണക്കുപ്രകാരമുള്ള റവന്യൂ ഗ്യാപ്പ് അംഗീകരിക്കാത്തത് അത്ഭുതപ്പെടുത്തുന്നതല്ല. എന്നാല്‍ വൈദ്യുതിബോര്‍ഡിന്റെ സാമ്പത്തിക പ്രവര്‍ത്തനങ്ങളെ റഗുലേറ്ററി കമ്മീഷന്റെ ഉത്തരവ് ഗുരുതരമായി ബാധിക്കാനിടയുണ്ട് എന്നതിനാല്‍ ഇതിന്റെ വിശദാംശങ്ങള്‍ പരിശോധിച്ചു പോകേണ്ടതുണ്ട്.
വർഷം 03-04 04-05 05-06 06-07 07-08 08-09 09-10 10-11
കെ.എസ്.ഇ.ബി സമർപ്പിച്ച ഗ്യാപ്പ് (കോടി) 926 655 492 303 430 755 1099 2220
അംഗീകരിച്ച ഗ്യാപ്പ് കോടി (ലാഭം) 556 296 51 (185) (330) 4 335 457

 

 

 

 

7815 കോടി രൂപ റവന്യൂ ആവശ്യകതയും 5607 കോടി വരുമാനവുമാണ് വൈദ്യുതി ബോര്‍ഡ് നല്‍കിയ കണക്കില്‍ ഉണ്ടായിരുന്നത്. റവന്യൂ ആവശ്യകതയില്‍ ഏറ്റവും പ്രധാന ഇനമായി പെടുത്തിയിരുന്നത് വൈദ്യുതി വാങ്ങല്‍ ചെലവാണ്. ഈ ഇനത്തില്‍ 4031.8 കോടി രൂപ ചെലവ് വരുമെന്നാണ് കണ്ടത്. എന്നാല്‍ 3660.67 കോടി രൂപ മാത്രമാണ് ഈയിനത്തില്‍ കമ്മീഷന്‍ അംഗീകരിച്ചിട്ടുള്ളത്. ജലവൈദ്യുതി ലഭ്യത സംബന്ധിച്ച് കമ്മീഷന്‍ തയ്യാറാക്കിയ കണക്കിലെ പ്രധാനപ്പെട്ട ഒരു പിശകാണ് ഇത്രവലിയ ഒരു വ്യത്യാസത്തിന് കാരണമായത്.

1.4.2011 ന് നമ്മുടെ ഡാമുകളില്‍ ആകെ ഉണ്ടായിരുന്ന സ്റോറേജ് 1981 മില്ല്യണ്‍ യൂണിറ്റ് വൈദ്യുതിക്കുള്ള വെള്ളമായിരുന്നു. ഇതിനോട് ഏപ്രില്‍, മെയ് മാസങ്ങളിലെ നീരൊഴുക്കില്‍ നിന്നും വാര്‍ഷിക നീരൊഴുക്കില്‍ നിന്നും 6353 മില്ല്യണ്‍ യൂണിറ്റ് വൈദ്യുതിയും ചെറുകിട ജലനിലയങ്ങളില്‍ നിന്ന് ലഭിക്കുന്ന 147 മില്ല്യണ്‍ യൂണിറ്റും കൂട്ടി ആകെ 2011-12 വര്‍ഷത്തേക്ക് 8808 മില്ല്യണ്‍ യൂണിറ്റ് വൈദ്യുതിക്കുള്ള ആകെ ജലലഭ്യതയാണ് കമ്മീഷന്‍ കണക്കാക്കിയിട്ടുള്ളത്. ഇതില്‍ ജൂണ്‍ ഒന്നിന് വേണ്ട നിയമാനുസൃത റിസര്‍വായ 550 മില്ല്യണ്‍ യൂണിറ്റിനുള്ള ജലം ഒഴിവാക്കി ബാക്കി ലഭ്യമായ ജലം കൊണ്ട് 8258 മില്ല്യണ്‍ യൂണിറ്റ് വൈദ്യുതി 2011-12-ല്‍ ഉല്‍പാദിപ്പിക്കാനാകുമെന്നാണ് കമ്മീഷന്‍ തിട്ടപ്പെടുത്തിയിട്ടുള്ളത്. വാര്‍ഷിക നീരൊഴുക്ക് കണക്കാക്കുന്നത് ജൂണ്‍ ഒന്നു മുതല്‍ മെയ് 31 വരെയാണല്ലോ. മേല്‍ കണക്കനുസരിച്ച് 2011 ഏപ്രില്‍ 1 മുതല്‍ 2012 മെയ് 31 വരെ കിട്ടുന്ന വെള്ളം 2012 ഏപ്രില്‍ 30നുള്ളില്‍ ഉല്‍പാദിപ്പിക്കണം. 2012 ഏപ്രില്‍, മെയ് മാസങ്ങളില്‍ വൈദ്യുതി ഉല്‍പാദനത്തിന് വെള്ളം വേണ്ടിവരുമെന്നത് കമ്മീഷന്‍ വിട്ടുപോയി. ഇത് പരിഗണിച്ച് ജലലഭ്യതയില്‍ മാറ്റം വരുത്തിയാല്‍ 1800-1900 മില്ല്യണ്‍ യൂണിറ്റ് വൈദ്യുതി കൂടി പുറത്തുനിന്ന് അധികമായി കണ്ടെത്തേണ്ടിവരും. ഇതിനാവശ്യമായ തുക കൂടി വൈദ്യുതി വാങ്ങല്‍ച്ചെലവില്‍ ഉള്‍പ്പെടുത്തേണ്ടതുണ്ട്.

വൈദ്യുതി വാങ്ങല്‍ കഴിഞ്ഞാല്‍ ബോര്‍ഡിന്റെ പ്രധാന റവന്യൂ ആവശ്യകത ജീവനക്കാര്‍ക്കുള്ള ചിലവുകളാണ്. ഇതിലും വലിയൊരു വെട്ടിക്കുറവാണ് കമ്മീഷന്‍ വരുത്തിയിട്ടുള്ളത്. എംപ്ളോയീ കോസ്റില്‍ 1910.62 കോടി രൂപ ചെലവുവരുമെന്ന ബോര്‍ഡിന്റെ കണക്ക് അംഗീകരിക്കാത്ത കമ്മീഷന്‍ 1541.30 കോടി രൂപ മാത്രമാണ് അനുവദിച്ചിട്ടുള്ളത്. വൈദ്യുതി ബോര്‍ഡിന്റെ ശമ്പളച്ചെലവുകള്‍ വന്‍തോതില്‍ വര്‍ദ്ധിച്ചുവരുന്നുവെന്നും 2003-04-ല്‍ ആകെ ചെലവിന്റെ 19.6% മാത്രമായിരുന്ന എംപ്ളോയീ കോസ്റ് 2010-11ല്‍ 24% ആയി മാറിയെന്നും ഇതു തന്നെ റവന്യൂ വരുമാനത്തിന്റെ ശതമാനക്കണക്കില്‍ 26.6%-ത്തില്‍ നിന്നും 32.9% ആയാണ് മാറിയതെന്നും കമ്മീഷന്‍ ഉത്തരവില്‍ ചൂണ്ടിക്കാട്ടുന്നു. ഒരു യൂണിറ്റ് വൈദ്യുതിയുടെ വിലയില്‍ എംപ്ളോയീ കോസ്റ് വഹിക്കുന്ന പങ്ക് 2004-05-ല്‍ 84 പൈസ ആയിരുന്നെങ്കില്‍ 2009-10-ല്‍ 94 പൈസയായി വര്‍ദ്ധിച്ചിരിക്കുന്നുവെന്നും ഉത്തരവില്‍ വ്യക്തമാക്കുന്നു. 2011-12 ലേക്ക് വൈദ്യുതി ബോര്‍ഡ് നല്‍കിയ കണക്കനുസരിച്ച് ഇത് 1.22 രൂപയായി ഉയരുമെന്നും ഇത് അംഗീകരിക്കാനാവില്ലെന്നുമാണ് കമ്മീഷന്‍ കണ്ടെത്തിയിട്ടുള്ളത്.

ശമ്പള പരിഷ്കരണത്തിന്റെ അധികബാദ്ധ്യത കാര്യക്ഷമത വര്‍ദ്ധിപ്പിക്കുന്നതിലൂടെ കണ്ടെത്തണമെന്നും അത് താരിഫില്‍ പ്രതിഫലിപ്പിക്കാന്‍ കഴിയില്ലെന്നുമാണ് കമ്മീഷന്റെ ഉത്തരവില്‍ പറയുന്നത്. പണപ്പെരുപ്പം മാത്രമേ എംപ്ളോയീ കോസ്റിന്റെ വര്‍ദ്ധനവിന് കാരണമാകാന്‍ പാടുള്ളൂ എന്ന് നിര്‍ദ്ദേശിക്കുന്ന ഉത്തരവ് മൊത്തവില സൂചികയും ഉപഭോക്തൃവില സൂചികയും 70:30 അനുപാതത്തില്‍ കണക്കിലെടുത്ത് നിലവില്‍ പ്രതിവര്‍ഷം 10.18% വര്‍ദ്ധനവാണ് അടിസ്ഥാന ശമ്പളമൊഴികെയുള്ള വേതനത്തില്‍ അനുവദിക്കുന്നത്. ജീവനക്കാര്‍ വിരമിക്കുന്നതു പോലെ പുതുതായി ജോലിയില്‍ പ്രവേശിക്കുകയും ചെയ്തുകൊണ്ടേയിരിക്കും എന്നതിനാല്‍ അടിസ്ഥാന ശമ്പളത്തില്‍ വര്‍ദ്ധനവൊന്നും വരില്ലെന്ന് കണ്ടെത്തുന്ന കമ്മീഷന്‍ ആ ഇനത്തില്‍ 3% വര്‍ദ്ധനവ് അനുവദിക്കുന്നു. ഈ രണ്ട് വര്‍ദ്ധനവും കൂടി ഒന്നിച്ചുചേര്‍ത്ത് ശരാശരി 8.21% വര്‍ദ്ധനവാണ് എംപ്ളോയീകോസ്റില്‍ 2011-12 വര്‍ഷത്തേക്ക് കമ്മീഷന്‍ അംഗീകരിച്ചത്. ഇതു തന്നെ 2010-11 ലെ യഥാര്‍ത്ഥ ചെലവുവെച്ച് കണക്കാക്കാതെ 2008-09 മുതല്‍ റീ വര്‍ക്ക് ചെയ്താണ് 1562.11 കോടി രൂപയെന്ന സംഖ്യയിലേക്ക് എത്തിയിരിക്കുന്നത്.

എംപ്ളോയീ കോസ്റ് സംബന്ധിച്ച് സ്വീകരിച്ച സമീപനം തന്നെയാണ് റിപ്പയര്‍ ആന്റ് മെയിന്റനന്‍സ്, അഡ്മിനിസ്ട്രേഷന്‍ ആന്റ് ജനറല്‍ എക്സ്പെന്‍സസ് എന്നിവയിലും സ്വീകരിച്ചിരിക്കുന്നത്. ബേസ് ഇയറില്‍ വന്ന ചെലവിനോട് പണപ്പെരുപ്പത്തിന്റെ നിരക്ക് വെച്ച് കൂട്ടിക്കിട്ടുന്ന സംഖ്യ അംഗീകരിക്കുക എന്ന ഈ സമീപനത്തില്‍ ഉപഭോക്താക്കള്‍, ലൈനുകള്‍, സബ്സ്റേഷനുകള്‍ എന്നിവയെല്ലാം വര്‍ദ്ധിക്കുന്നതും ഉയര്‍ന്ന സേവന മാനദണ്ഢങ്ങള്‍ ഉറപ്പുവരുത്തുന്നതിന് അധികച്ചെലവുകള്‍ വരുന്നതുമൊന്നും ഉള്‍പ്പെടുത്താനാവില്ലെന്ന നിലപാടാണുള്ളത്. ഈ രണ്ട് ഇനങ്ങളിലുമായി 170 കോടിയോളം രൂപയുടെ വെട്ടിക്കുറവാണ് കമ്മീഷന്‍ വരുത്തിയിരിക്കുന്നത്.

വൈദ്യുതി ബോര്‍ഡിന്റെ കടബാദ്ധ്യത കുറച്ചുകൊണ്ടുവരുന്നതില്‍ കഴിഞ്ഞ അഞ്ചുവര്‍ഷം വലിയ പുരോഗതിയാണ് കൈവരിച്ചത്. 2006-ല്‍ 4500 കോടിയിലധികമായിരുന്ന കടബാദ്ധ്യത 1500 കോടി രൂപയിലേക്ക് കുറച്ചുകൊണ്ടു വരാന്‍ ഇക്കാലയളവില്‍ കഴിഞ്ഞു. ഇത് പലിശച്ചെലവിലും നല്ല കുറവുണ്ടാക്കി. വിവിധ ഇനത്തില്‍ സര്‍ക്കാരില്‍ നിന്ന് കിട്ടാനുള്ള തുകയിലേക്ക് വകയിരുത്തുന്നതിനായി ബോര്‍ഡ് കൈവശംവെച്ച വൈദ്യുതി ഡ്യൂട്ടിയടക്കമുള്ള ആഭ്യന്തരവരുമാനം ഉപയോഗിച്ചുകൂടിയാണ് ഇങ്ങിനെ കടബാദ്ധ്യത കുറച്ചുകൊണ്ടുവന്നത്. എന്നാല്‍ സര്‍ക്കാരിലേക്ക് നല്‍കേണ്ട തുക നല്‍കിയില്ല എന്ന കാരണത്താല്‍ ഡ്യൂട്ടി അടക്കമുള്ള സംഖ്യകള്‍ റവന്യൂ ഗ്യാപ്പില്‍ അഡ്ജസ്റ് ചെയ്യുന്ന സമീപനമാണ് മുന്‍ഉത്തരവില്‍ കമ്മീഷന്‍ സ്വീകരിച്ചത്. ഇത് ബോര്‍ഡിന്റെ സാമ്പത്തിക പ്രവര്‍ത്തനങ്ങളെ ഗുരുതരമായി ബാധിക്കുകയുണ്ടായി. വലിയ വില നല്‍കി പുറത്തുനിന്ന് വന്‍തോതില്‍ വൈദ്യുതി വാങ്ങേണ്ടിവന്നതടക്കമുള്ള സാഹചര്യങ്ങള്‍ മൂലധനച്ചെലവിന് പുറമെ ദൈനംദിനച്ചെലവിന് കടമെടുക്കേണ്ട സ്ഥിതിയിലേക്കാണ് നയിക്കുന്നത്. ഇക്കാര്യങ്ങളെല്ലാം ചൂണ്ടിക്കാട്ടി 385.05 കോടി രൂപയുടെ പലിശയും മറ്റു ഫിനാന്‍സ് ചാര്‍ജ്ജുകളും അനുവദിക്കണമെന്നാണ് ബോര്‍ഡ് പെറ്റീഷനില്‍ ആവശ്യപ്പെട്ടത്. എന്നാല്‍ 265.26 കോടി രൂപ മാത്രമാണ് കമ്മീഷന്‍ ഈയിനത്തില്‍ അനുവദിച്ചത്.

തേയ്മാനച്ചെലവ് പൂര്‍ണ്ണമായും അനുവദിക്കാന്‍ കമ്മീഷന്‍ തയ്യാറായി. പക്ഷേ തേയ്മാനച്ചെലവ് കണക്കാക്കുന്നതില്‍ നിന്ന് ഡിപ്പോസിറ്റ് സ്വീകരിച്ച് നിര്‍മ്മിക്കുന്ന ആസ്തികള്‍ ഒഴിവാക്കണമെന്ന് കമ്മീഷന്‍ നിര്‍ദ്ദേശിച്ചിട്ടുണ്ട്. ഇതനുസരിച്ച് പുതുക്കുമ്പോള്‍ തേയ്മാനച്ചെലവ് കുറയും. ഉത്തരവില്‍ ഇത് പരിഗണിച്ചിട്ടില്ല. അതുപോലെ റിട്ടേണ്‍ ഓണ്‍ ഇക്വിറ്റിയുടെ കാര്യത്തില്‍ ബോര്‍ഡിന് ഓഹരി മൂലധനമില്ല എന്ന സങ്കല്‍പ്പത്തില്‍ ടോക്കണ്‍ ആയി 100 കോടി രൂപ അനുവദിച്ച കഴിഞ്ഞ വര്‍ഷത്തെ അതേ സമീപനമാണ്ഈ വര്‍ഷവും തുടര്‍ന്നത്. എന്നാല്‍ ബോര്‍ഡിന്റെ ഓഹരി സംബന്ധിച്ച് കൃത്യമായ സര്‍ക്കാര്‍ ഉത്തരവ് ഉണ്ടാകുകയും ഇക്കാര്യം അപ്പലേറ്റ് ട്രിബ്യൂണലിന്റെ പരിഗണനയിലുമാണെന്നത് കണക്കിലെടുത്ത് ഇക്കാര്യം ഓപ്പണ്‍ ആയി നിലനിര്‍ത്താന്‍ കമ്മീഷന്‍ തയ്യാറായി. അതായത് തേയ്മാനച്ചെലവും റിട്ടേണ്‍ ഓണ്‍ ഇക്വിറ്റിയും പിന്നീട് മാറ്റം വരും. ഇതില്‍ ഒന്നില്‍ വരുന്ന കുറവ് മറ്റേതില്‍ വരുന്ന അധികത്തില്‍ അഡ്ജസ്റ് ചെയ്യപ്പെടാനാണ് സാദ്ധ്യത.

മൊത്തത്തില്‍ 7726.24 കോടി രൂപ റവന്യൂ ആവശ്യകതയാണ് ബോര്‍ഡ് പെറ്റീഷനില്‍ നല്‍കിയതെങ്കിലും കമ്മീഷന്‍ അംഗീകരിച്ചത് 6562.92 കോടി രൂപ മാത്രമാണ്.
കുടിവെള്ള പദ്ധതികള്‍ക്ക് വൈദ്യുതി നിയന്ത്രണത്തിന്റെ ഭാഗമായി ഏര്‍പ്പെടുത്തിയ മാര്‍ജിനല്‍ കോസ്റ് വാങ്ങുന്നതില്‍ ഇളവ് നല്‍കിയ ബോര്‍ഡിന്റെ നടപടി കമ്മീഷന്‍ അംഗീകരിച്ചില്ല. ഇത് റദ്ദുചെയ്യുന്നതിലൂടെ പതിനേഴരക്കോടി രൂപ ജല അതോറിറ്റിയില്‍ നിന്ന് ലഭ്യമാകും എന്നാണ് കമ്മീഷന്‍ കാണുന്നത്. അങ്ങിനെ ബോര്‍ഡിന്റെ പെറ്റീഷനില്‍ പറയുന്ന 5607.46 കോടിക്ക് പകരം 5624.92 കോടി രൂപയുടെ വരുമാനമാണ് ഉത്തരവ് പ്രകാരം പ്രതീക്ഷിക്കുന്നത്.

ബോര്‍ഡിന്റെ പ്രവര്‍ത്തനങ്ങളെ രൂക്ഷമായി കുറ്റപ്പെടുത്തുന്ന കമ്മീഷന്റെ മുന്‍കാല സമീപനങ്ങളില്‍ നിന്നും വ്യത്യസ്തമായി ബോര്‍ഡ് കൈവരിച്ച കാര്യക്ഷമതയെ അംഗീകരിക്കാന്‍ ഇക്കുറി കമ്മീഷന്‍ തയ്യാറായിട്ടുണ്ട്. സേവന മാനദണ്ഡങ്ങള്‍ നടപ്പാക്കുന്നതില്‍ പുരോഗതി കൈവരിച്ച ബോര്‍ഡിനെ അഭിനന്ദിക്കാനും കമ്മീഷന്‍ തയ്യാറായെങ്കിലും ബോര്‍ഡിന്റ ചെലവുകളെ യാഥാര്‍ത്ഥ്യബോധത്തോടെ സമീപിക്കുന്നതില്‍ കമ്മീഷന്‍ വലിയ വീഴ്ചയാണ് വരുത്തിയിട്ടുള്ളത്. പ്രത്യേകിച്ചും ശമ്പളച്ചെലവുകളുടെ കാര്യത്തില്‍ തികച്ചും നിഷേധാത്മക നിലപാടാണ് കമ്മീഷന്‍ സ്വീകരിച്ചിട്ടുള്ളതെന്ന് പറയാതെ വയ്യ.

ബോര്‍ഡിലെ ശമ്പളച്ചെലവുകള്‍ വളരെ കൂടുതലാണെന്നും അതുമൂലം വൈദ്യുതി താരിഫ് വര്‍ദ്ധിക്കുന്നുവെന്നും ഒരു പൊതുധാരണ സൃഷ്ടിക്കാന്‍ പത്രമാദ്ധ്യമങ്ങളും മറ്റും വലിയ ശ്രമം നടത്തുന്നുണ്ട്. ഈ വികാരത്തോടൊപ്പം നിന്ന് കയ്യടി വാങ്ങുക എന്നതിനപ്പുറം വസ്തുനിഷ്ടമായി കാര്യങ്ങളെ കാണാന്‍ കമ്മീഷന്‍ തയ്യാറാകുന്നില്ല.

വിലക്കയറ്റത്തിന്റെയും മറ്റും സാഹചര്യത്തില്‍ ജീവിതച്ചെലവുകള്‍ കൂടുന്നതനുസരിച്ച് കാലാകാലങ്ങളില്‍ സര്‍ക്കാര്‍ പ്രഖ്യാപിക്കുന്ന ഡി.എ. പോലും വൈദ്യുതി ബോര്‍ഡ് ജീവനക്കാര്‍ക്ക് ലഭ്യമാകില്ല എന്നതാണ് ഇക്കാര്യത്തില്‍ കമ്മീഷന്‍ സ്വീകരിച്ച സൂത്രവാക്യത്തിന്റെ കാതല്‍. വിഭജിക്കാതെ ഒറ്റ സ്ഥാപനമായി നില്‍ക്കുന്ന കേരളത്തിലെ വൈദ്യുതി മേഖലയില്‍ വിതരണത്തോടൊപ്പം ഉല്‍പാദന, പ്രസരണ മേഖലകളിലെ ശമ്പളച്ചെലവു കൂടി പ്രതിഫലിക്കുന്നുണ്ട്. മറ്റിടങ്ങളില്‍ ഉല്‍പാദന, പ്രസരണ മേഖലകളിലെ ശമ്പളം വിതരണമേഖലക്ക് കിട്ടുന്ന വൈദ്യുതിവിലയില്‍ ഉള്‍പ്പെട്ടുപോകുമെന്നതിനാല്‍ വിതരണമേഖലയിലെ ശമ്പളച്ചെലവുമാത്രമാണ് എംപ്ളോയീ കോസ്റില്‍ ഉണ്ടാകുക.

മാത്രമല്ല മറ്റു സംസ്ഥാനങ്ങളില്‍ നിന്ന് വ്യത്യസ്തമായ ഉപഭോക്തൃ അനുപാതമാണ് കേരളത്തിലുള്ളത്. മീറ്ററിങ്ങുപോലുമില്ലാത്ത കാര്‍ഷിക കണക്ഷനുകള്‍ ധാരാളമുള്ള ആന്ധ്രയേയും പഞ്ചാബിനേയുമൊക്കെ കേരളവുമായി താരതമ്യപ്പെടുത്താന്‍ പോലുമാവില്ല. നമ്മുടെ ഉപഭോക്താക്കളില്‍ ഭീമഭാഗവും എല്‍.ടി. വിഭാഗത്തിലാണ് പെടുന്നത്. അതില്‍ തന്നെ ഭൂരിപക്ഷവും ഗാര്‍ഹിക കണക്ഷനുകളാണ്. മറ്റിടങ്ങളിലേതുപോലെ വീടുകള്‍ ഒന്നിച്ച് ഒരിടത്ത് കേന്ദ്രീകരിച്ച് വെക്കുന്ന രീതിയല്ല കേരളത്തിലുള്ളത്. ഓരോ പുരയിടത്തിലും ഒരു വീട് എന്ന നമ്മുടെ രീതി എല്‍.ടി. ലൈനിന്റെ നീളവും അറ്റകുറ്റപ്പണികളും വര്‍ദ്ധിപ്പിക്കുന്നതാണ്. ധാരാളം മരങ്ങളും മറ്റുമുള്ള നമ്മുടെ ഭൂപ്രകൃതിയുടെ പ്രത്യേകതകളും കൂട്ടത്തില്‍ പരിഗണിക്കേണ്ടതുണ്ട്. ഉപഭോക്താക്കളുടെ എണ്ണവും ലൈനുകളുടെ ദൈര്‍ഘ്യവും സബ്സ്റേഷനുകളുടെയും ട്രാന്‍സ്ഫോര്‍മറുകളുടെയും എണ്ണവുമൊക്കെയാണ് ജീവനക്കാരുടെ എണ്ണത്തിനും ശമ്പളച്ചെലവുകള്‍ക്കും മാനദണ്ഡമാകേണ്ടത്. എന്നാല്‍ ഇത്തരം വസ്തുതകളൊന്നും കണക്കിലെടുക്കാന്‍ കമ്മീഷന്‍ തയ്യാറാകുന്നില്ല.

ബോര്‍ഡിന്റെ പ്രവര്‍ത്തനങ്ങളില്‍ പൊതുവെ കാര്യക്ഷമത കൈവരിച്ചുവെന്ന് അംഗീകരിക്കുന്ന കമ്മീഷന്‍ സേവന മാനദണ്ഡങ്ങള്‍ പാലിക്കുന്നതില്‍ ബോര്‍ഡ് നേടിയ നേട്ടവും കാണുന്നുണ്ട്. എല്‍.ടി. ലൈനുകളുടെ ആധിക്യമുണ്ടായിട്ടും കേരളത്തിലെ പ്രസരണ വിതരണ നഷ്ടം ഇന്ത്യയിലെ ഏറ്റവും കുറഞ്ഞ നിരക്കിലെത്തിയിരിക്കുന്നത് ബോര്‍ഡിന്റെ കാര്യക്ഷമതയുടെ മറ്റൊരു ദൃഷ്ടാന്തമാണ്. പതിനാറര ശതമാനം മാത്രമാണ് നമ്മുടെ ഇപ്പോഴത്തെ പ്രസരണ വിതരണ നഷ്ടം. ലൈനുകളും മറ്റും മെച്ചപ്പെട്ട നിലയില്‍ സംരക്ഷിക്കുന്നതിലും മോഷണമടക്കമുള്ള ഊര്‍ജ്ജനഷ്ട സാദ്ധ്യതകള്‍ അടയ്ക്കുന്നതിലും ഊര്‍ജ്ജ സംരക്ഷണ പ്രവര്‍ത്തനങ്ങള്‍ ത്വരിതപ്പെടുത്തിയതിലൂടെയുമൊക്കെ നല്ല പുരോഗതി നേടാന്‍ നമുക്കു കഴിഞ്ഞു എന്നാണ് ഇത് കാണിക്കുന്നത്.

ജീവനക്കാരുടെ മെച്ചപ്പെട്ട പ്രവര്‍ത്തനങ്ങളല്ലാതെ ഈ നേട്ടത്തിന് മറ്റെന്ത് കാരണമാണാവോ ഉണ്ടാകുക? എന്നാല്‍ ശമ്പള പരിഷ്കരണത്തിന് ഇതിലൊന്നും പെടാത്ത കാര്യക്ഷമത കൈവരിക്കണമെന്നാണ് കമ്മീഷന്‍ പറയുന്നത്. ശമ്പളപരിഷ്കരണചര്‍ച്ചകള്‍ കമ്മീഷന്റെ അറിവോടെയും കമ്മീഷന്‍ നിശ്ചയിക്കുന്ന നിബന്ധനകള്‍ പാലിച്ചുമാണ് നടത്തേണ്ടതെന്ന് കമ്മീഷന്‍ ആവശ്യപ്പെടുന്നു. ബോര്‍ഡില്‍ നടന്നുവരുന്ന ജനാധിപത്യപരമായ ശമ്പളപരിഷ്കരണ നടപടികളെ അട്ടിമറിക്കാനുള്ള ഇത്തരം നീക്കങ്ങള്‍ അംഗീകരിക്കാവുന്നതല്ല. തൊഴിലാളികളുടെ ന്യായമായ സേവനവേതന അവകാശങ്ങള്‍ ആരുടെയും ഔദാര്യത്തിന്റെ ഭാഗമായി സിദ്ധിച്ചതുമല്ല.

വിവരസാങ്കേതിക വിദ്യയടക്കമുള്ള ആധുനിക സങ്കേതങ്ങള്‍ ഫലപ്രദമായി ഉപയോഗപ്പെടുത്തി ഉപഭോക്തൃസേവനം ഇനിയും മെച്ചപ്പെടുത്തേണ്ടതുണ്ട്. ഇതിലൂടെ ഇന്ന് നിലവിലുള്ള തസ്തികകളിലും ജോലികളിലും മാറ്റങ്ങളുണ്ടാകുകയും ചെയ്യും. ഇത്തരം മാറ്റങ്ങള്‍ ഇതിനകം തന്നെ ഉണ്ടായിട്ടുമുണ്ട്. ഇതോടൊപ്പം ഉപഭോക്താക്കള്‍ വര്‍ദ്ധിക്കുന്നതും കൂടുതല്‍ മെച്ചപ്പെട്ട സേവനത്തിനുവേണ്ടിയുള്ള ജനങ്ങളുടെ പ്രതീക്ഷ നിറവേറ്റുന്നതും ബോര്‍ഡിന് പുതിയ വെല്ലുവിളികളാകുകയും ചെയ്യും. അതായത് ആധുനിക സൌകര്യങ്ങളിലൂടെ എംപ്ളോയീ കോസ്റ് വലിയതോതില്‍ വെട്ടിക്കുറക്കാന്‍ കഴിയുമെന്ന കമ്മീഷന്റെ നിലപാടുകള്‍ വസ്തുതാപരമല്ല.

ബോര്‍ഡിന്റെ പ്രവര്‍ത്തനങ്ങളെ ജനപക്ഷത്തു നിന്ന് വിലയിരുത്തുന്നതിനും അനാവശ്യച്ചെലവുകള്‍ നിയന്ത്രിക്കുന്നതിനും റഗുലേറ്ററി കമ്മീഷന് ബാദ്ധ്യതയുണ്ട്. ബോര്‍ഡിന്റെ സാമ്പത്തിക ഭദ്രത ഉറപ്പുവരുത്തേണ്ട ബാദ്ധ്യതയും റഗുലേറ്ററി കമ്മീഷനുണ്ട്. ഈ ഉത്തരവാദിത്തങ്ങള്‍ ഫലപ്രദമായി നിറവേറ്റുന്നതല്ല കമ്മീഷന്റെ സമീപനമെന്ന് ഇത്തവണത്തെ എ.ആര്‍.ആര്‍. & ഇ.ആര്‍.സി ഉത്തരവും വ്യക്തമാക്കുന്നു.

ഒടുവില്‍ കിട്ടിയത്: കണക്ക് ശരിപ്പെടുത്തലിന്റെ ഭാഗമായി 2007-08, 08-09 വര്‍ഷങ്ങളിലെ റവന്യൂ ഗ്യാപ്പ് പുതുക്കി നിശ്ചയിച്ച് കമ്മീഷന്റെ ഉത്തരവ് വന്നതായി അറിയുന്നു. 07-08-ല്‍ 1338 കോടി രൂപ മിച്ചവും 08-09-ല്‍ 429 കോടി രൂപ വിടവുമായി ആകെ 909 കോടി രൂപയുടെ മിച്ചം ഈ രണ്ടു വര്‍ഷങ്ങളിലുമായി ഉണ്ടെന്നാണ് കമ്മീഷന്റെ കണ്ടെത്തല്‍. ഈ വര്‍ഷത്തേക്ക് വിധിച്ച 872 കോടിയുടെ വിടവ് നികത്താനും വരും വര്‍ഷത്തേയ്ക്ക് മിച്ചമായി 37 കോടി രൂപ ബാക്കി പിടിക്കാനും ഇതിലൂടെ കഴിഞ്ഞെന്നാണ് പുതിയ കണ്ടെത്തല്‍ (2009-10, 10-11 എന്നീ വര്‍ഷങ്ങളിലെ കണക്ക് ശരിപ്പെടുത്തലിന്റെ ഉത്തരവുകള്‍ ഇനി വരാനിരിക്കുന്നതേയുള്ളൂ).

ഏട്ടിലെ പശു പുല്ലു മാത്രമല്ല പിണ്ണാക്കും തിന്നുമെന്ന് പ്രതീക്ഷിക്കാം.

 

Add comment


Security code
Refresh

20-conference
 

Random Videos

You need Flash player 6+ and JavaScript enabled to view this video.
Title: Power Quiz 2015 Final - Part-1

Latest Comments

Banner

Reference Book

 

Reference Book on Power

Electrical Engineering-- D' 1/4 Size Hard bound-- 1424 Pages-- Just Rs.1000/- only &n...

Visitors Counter

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
mod_vvisit_counterToday1092
mod_vvisit_counterYesterday4559
mod_vvisit_counterThis Month105670
mod_vvisit_counterLast Month152890

Online Visitors: 68
IP: 54.224.200.104
,
Time: 06 : 34 : 09