|
Share this
Twitter
Digg
Del.icio.us
Slashdot
Furl
Yahoo
Technorati
Newsvine
Googlize this
Blinklist
Facebook
Wikio
Print
E-mail
അതിരപ്പിള്ളി ജലവൈദ്യുത പദ്ധതിക്ക് അനുമതി നല്‍കണമെന്നും കാരണംകാണിക്കല്‍നോട്ടീസ് പിന്‍വലിക്കണമെന്നും ആവശ്യപ്പെട്ട് കെ. എസ്.ഇ.ബി പരിസ്ഥിതിമന്ത്രാലയത്തിന് കത്തയച്ചു. പദ്ധതിയില്ലെങ്കില്‍ കുറഞ്ഞനിരക്കില്‍ വൈദ്യുതി നല്‍കണമെന്ന് ബോര്‍ഡ് ആവശ്യപ്പെട്ടിട്ടുണ്ട്. പദ്ധതിക്കു നല്‍കിയ പാരിസ്ഥിതിക അനുമതി റദ്ദാക്കാതിരിക്കാന്‍ കാരണംകാണിക്കണമെന്ന് ആവശ്യപ്പെട്ട് 2010 ജനുവരിയില്‍ കേന്ദ്ര വനം-പരിസ്ഥിതി മന്ത്രാലയം കെ.എസ്.ഇ.ബിക്ക് നോട്ടീസ് നല്‍കിയിരുന്നു. ഇതിനു വിശദമായ മറുപടി നല്‍കി ഒരു വര്‍ഷം പിന്നിട്ടിട്ടും തുടര്‍നടപടിയുണ്ടാവാത്ത സാഹചര്യത്തിലാണ് കെ.എസ്.ഇ.ബി വീണ്ടും കത്തയച്ചത്. ഇനിയും തീരുമാനം വൈകരുതെന്ന് അഞ്ചു പേജുള്ള കത്തില്‍ ചൂണ്ടിക്കാട്ടുന്നു. 1998, 2005, 2007 വര്‍ഷങ്ങളില്‍ മൂന്നുതവണ പാരിസ്ഥിതിക അനുമതി ലഭിച്ച പദ്ധതി വീണ്ടും തഴയുന്നതു നീതീകരിക്കാനാവില്ല.
എല്ലാ അനുമതിയും ലഭിച്ച് പദ്ധതി തുടങ്ങാനിരിക്കെയാണ് കഴിഞ്ഞ ഏപ്രില്‍ ഒന്നിന് പരിസ്ഥിതി അംഗീകാരം പിന്‍വലിക്കാതിരിക്കുന്നതിന് കാരണം ചോദിച്ച് നോട്ടീസ് ലഭിക്കുന്നതെന്ന് ബോര്‍ഡിന്റെ കോര്‍പ്പറേറ്റ് പ്ലാനിങ് ചീഫ് എന്‍ജിനീയര്‍ പരിസ്ഥിതിമന്ത്രാലയത്തിലെ ഉപദേശക ഡോ. നളിനി ഭട്ടിനയച്ച കത്തില്‍ പറയുന്നു. അഞ്ച് വിദഗ്ധ സമിതികളും പരിസ്ഥിതിമന്ത്രാലയത്തിലെ വിദഗ്ധരും കേന്ദ്രസര്‍ക്കാരിലെ വിവിധ സമിതികളും കേരള ഹൈക്കോടതിയും ഉന്നയിച്ച സംശയങ്ങള്‍ക്ക് വിശദീകരണം നല്‍കിക്കഴിഞ്ഞതായും കത്തില്‍ ചൂണ്ടിക്കാട്ടുന്നു.
മഹാരാഷ്ട്രയിലെ ബീചാപൂര്‍ ആണവനിലയത്തിനെതിരേ ജനകീയപ്രക്ഷോഭവും വെടിവയ്പും ഉണ്ടായിട്ടും അനുമതി പിന്‍വലിക്കാന്‍ കേന്ദ്രം തയ്യാറായിട്ടില്ല. ഒരിക്കല്‍ നല്‍കിയ അനുമതി പുനപ്പരിശോധിക്കാനാവില്ലെന്ന നിലപാടാണു മന്ത്രാലയം സ്വീകരിച്ചത്. ആതിരപ്പിള്ളിയുടെ കാര്യത്തിലും ഇതേ നിലപാട് സ്വീകരിക്കണമെന്നാണു കെ.എസ്.ഇ.ബിയുടെ ആവശ്യം.
കേന്ദ്ര-സംസ്ഥാനസര്‍ക്കാറുകള്‍ രൂപവത്കരിച്ച സമിതികളെല്ലാം പദ്ധതി പരിസ്ഥിതിസൗഹൃദവും സാമ്പത്തികമായി ലാഭകരവുമായിരിക്കുമെന്ന് വിലയിരുത്തിയിട്ടുണ്ട്. ജലലഭ്യതയെക്കുറിച്ച് സമര്‍പ്പിച്ച കണക്കുകള്‍ ജലകമ്മീഷനും അംഗീകരിച്ചിട്ടുണ്ട്. മാധവ് ഗാഡ്ഗിലിന്റെ നേതൃത്വത്തിലുള്ള പശ്ചിമഘട്ട പരിസ്ഥിതിവിദഗ്ധപാനല്‍ പദ്ധതിപ്രദേശം സന്ദര്‍ശിച്ചിട്ടുമുണ്ട്. കേരളത്തിന്റെ ജലസമ്പത്തിന്റെ 46 ശതമാനംമാത്രമാണ് ജലവൈദ്യുത പദ്ധതികള്‍ക്കായി വിനിയോഗിച്ചിട്ടുള്ളത്. ബാക്കിയുള്ളവ പാഴായി പ്പോവുകയാണ്.
6000 മെഗാവാട്ട് വരെ ഉത്പ്പാദിപ്പിക്കാന്‍ കഴിയുന്നിടത്ത് 1952 മെഗാവാട്ട് വൈദ്യുതി മാത്രമാണ് ഉത്പ്പാദിപ്പിച്ചത്. പരിസ്ഥിതിയും ജൈവവൈവിധ്യവും സംരക്ഷിച്ചുകൊണ്ടുതന്നെ കൂടുതല്‍ ജലവൈദ്യുതപദ്ധതികള്‍ക്കുള്ള സാധ്യതയുണ്ട്. ജൈവവൈവിധ്യത്തിന്റെ പേരില്‍ കേരളത്തിന്റെ വൈദ്യുതി ഉല്‍പ്പാദനസാധ്യതകള്‍ തടസ്സപ്പെട്ടാല്‍ ചെലവുകുറഞ്ഞ ഊര്‍ജംനല്‍കാന്‍ കേന്ദ്രം തയ്യാറാകണം. ജലവൈദ്യുതപദ്ധതികള്‍ക്ക് രൂപംനല്‍കുമ്പോള്‍ ത്തന്നെ പരിസ്ഥിതിയുടെ പേരില്‍ തടസ്സങ്ങള്‍ ഉന്നയിക്കപ്പെടുന്നു.
പദ്ധതി നടപ്പാക്കുന്നതുമൂലം ജൈവവൈവിധ്യത്തിനും പരിസ്ഥിതിക്കും കോട്ടം സംഭവിക്കില്ലെന്നു വിവിധ പഠന റിപോര്‍ട്ടുകള്‍ വ്യക്തമാക്കുന്നുണ്ട്. കേന്ദ്രസര്‍ക്കാര്‍ ഇത് അംഗീകരിക്കാന്‍ തയ്യാറാവണമെന്നും കത്തില്‍ ചൂണ്ടിക്കാട്ടുന്നു.
