KSEBOA - KSEB Officers' Association

Saturday
Apr 29th
Text size
  • Increase font size
  • Default font size
  • Decrease font size
Home വാര്‍ത്തകള്‍ റഗുലേറ്ററി കമ്മിഷന്‍ ഉത്തരവ് ഉയര്‍ത്തുന്ന ചില ചോദ്യങ്ങള്‍

റഗുലേറ്ററി കമ്മിഷന്‍ ഉത്തരവ് ഉയര്‍ത്തുന്ന ചില ചോദ്യങ്ങള്‍

PDF
Hits smaller text tool iconmedium text tool iconlarger text tool icon
KSERC2006-07ലെ     ബോര്‍ഡിന്റെ യഥാര്‍ത്ഥ വരവും ചിലവും പരിശോധിച്ച് അവയില്‍ അനുവദിക്കാവുന്നവ സംബന്ധിച്ച് കമ്മിഷന്റെ ഉത്തരവ് ഇറങ്ങിയിരിക്കുകയാണല്ലോ? ബോര്‍ഡിന്റെ ആഡിറ്റ് ചെയ്ത കണക്കുകള്‍ പ്രകാരം വരവും ചിലവും തമ്മിലുള്ള അന്തരം 142.23 കോടി രൂപയായിരിക്കേ വിവിധ ഇനങ്ങളില്‍ കമ്മിഷന്‍ അനുവദിച്ച തുകയുടെ അടിസ്ഥാനത്തില്‍ കണക്കാക്കുമ്പോള്‍ ബോര്‍ഡിന് 1035.85 കോടി രൂപയുടെ അധിക വരുമാനം ലഭിച്ചതായാണ് ഉത്തരവില്‍ വ്യക്തമാക്കിയിരിക്കുന്നത്.

വരുന്ന ദിവസങ്ങളില്‍ 2010-11-ലെ ബോര്‍ഡിന്റെ വരവു ചെലവു കണക്കുകളുടെ എസ്റിമേറ്റ് (‍ARR & ERC) സംബന്ധിച്ച ഉത്തരവും പ്രതീക്ഷിക്കപ്പെടുന്നുണ്ട്. മാര്‍ച്ച് - ഏപ്രില്‍ മാസങ്ങളിലായി ഇറങ്ങേണ്ട പ്രസ്തുത ഉത്തരവ് ഇപ്പോള്‍ തന്നെ വൈകിയിരിക്കുന്നു. മേല്‍ സൂചിപ്പിച്ച അധിക വരുമാനം ഈ വര്‍ഷത്തെ വരവ് ചെലവ് കണക്കുകള്‍ അംഗീകരിക്കുമ്പോള്‍ വരുമെന്ന് പ്രതീക്ഷിക്കുന്ന കമ്മിയില്‍ തട്ടിക്കിഴിക്കുമെന്നാണ് കരുതപ്പെടുന്നത്. പൊതുമേഖലാ സ്ഥാപനമെന്ന നിലയില്‍ ഏതെങ്കിലും വര്‍ഷം ന്യായമായ നിരക്കിലും അധികമായി ലഭിക്കുന്ന ലാഭം വരും വര്‍ഷങ്ങളിലെ കമ്മിയില്‍ തട്ടിക്കിഴിച്ച് നിരക്കു വര്‍ദ്ധനവിന്റെ ഭാരം ജനങ്ങള്‍ക്ക് കഴിവതും കുറയ്ക്കാന്‍ ശ്രമിക്കുന്നത് തികച്ചും സ്വാഗതാര്‍ഹമാണ്.  എന്നാല്‍ സൂക്ഷ്മതയോടെയും യുക്തിസഹമായും ഇതു ചെയ്തില്ലെങ്കില്‍ വൈദ്യുതി മേഖല പ്രതിസന്ധിയിലാകുമെന്നതില്‍ തര്‍ക്കമില്ല.

ഈ നിലയ്ക്ക് പരിശോധിക്കുമ്പോള്‍ ബോര്‍ഡിന്റെയും കമ്മീഷന്റെയും സമീപനങ്ങളില്‍ സാരമായ പോരായ്മകളുണ്ട്. അവ എത്രയും വേഗം പരിഹരിക്കപ്പെടേണ്ടതുണ്ട്.
കമ്മീഷന്‍ വിവിധ ഉത്തരവുകളില്‍ തുടര്‍ച്ചയായി എടുക്കുന്ന സമീപനത്തിന്റെ അടിസ്ഥാനത്തില്‍ പരിശോധിച്ചാല്‍ ബോര്‍ഡ് ആവശ്യപ്പെട്ട ഏതാനും ചിലവുകള്‍ അതേപോലെ അംഗീകരിക്കപ്പെട്ടില്ല എന്ന് മുന്‍പേ തന്നെ വ്യക്തമായിരുന്നു. തേയ്മാനച്ചിലവുകള്‍, ഗവണ്‍മെന്റ് നല്‍കാനുള്ള തുക തട്ടിക്കിഴിക്കല്‍, യുക്തിസഹമല്ലാത്ത തോതില്‍ കുടിശ്ശിക എഴുതിത്തള്ളല്‍ തുടങ്ങിയവ ഈ നിലയ്ക്കുള്ളതാണ്. തേയ്മാന ചിലവിലെ 175 കോടിയും ഗവണ്‍മെന്റ് നല്‍കാനുള്ള തുക എഴുതിത്തള്ളിയ ഇനത്തിലുള്ള 524 കോടിയും കുടിശ്ശിക എഴുതിത്തള്ളിയതില്‍ 232 കോടിയും കമ്മീഷന്‍ അംഗീകരിച്ചിട്ടില്ല. ഈ തുക ചിലവായി അംഗീകരിക്കാത്ത സാഹചര്യത്തില്‍ ബോര്‍ഡ് ചൂണ്ടിക്കാട്ടിയ 142 കോടി കമ്മിയുടെ സ്ഥാനത്ത് 789 കോടി അധിക വരുമാനം ഉണ്ടാകുമെന്നത് വ്യക്തമായിരുന്നു. കൂടാതെ മറ്റ് ചിലവിനങ്ങളില്‍ കമ്മീഷന്‍ അനുവദിച്ചതിലും അധികമായി വന്ന തുകയുടെ ആവശ്യകത കമ്മീഷനെ ബോധ്യപ്പെടുത്തുന്നതിനനുസൃതമായേ അംഗീകരിക്കപ്പെടുകയുള്ളൂ. ഈ നിലയ്ക്ക് നോക്കുമ്പോള്‍ ഏകദേശം 800 കോടി രൂപയുടെ അധിക വരുമാനം ബോര്‍ഡിന് 2006-2007 ല്‍ ലഭിച്ചതായി കണക്കാക്കാം. ബോര്‍ഡിന്റെ വാര്‍ഷിക കണക്കുകളുടെ അടിസ്ഥാനത്തില്‍ ഈ വസ്തുത മുന്‍പ് തന്നെ ഈ പംക്തിയില്‍ ചൂണ്ടിക്കാട്ടിയിട്ടുള്ളതാണ്. മെച്ചപ്പെട്ട കാലവര്‍ഷത്തിന്റെയും മറ്റും അടിസ്ഥാനത്തില്‍ ലഭിച്ച അധിക വൈദ്യുതി സംസ്ഥാനത്തിന് പുറത്തേക്ക് ലാഭകരമായി വില്‍ക്കാന്‍ സാധിച്ചതാണ് ഈ അധിക വരുമാനത്തിന്റെ മുഖ്യ അടിസ്ഥാനം.

ഈ വസ്തുതകള്‍ നിലനില്‍ക്കേ വൈദ്യുതി മേഖലയ്ക്കാകെ ദോഷകരമാകുന്ന ചില പുതിയ സമീപനങ്ങള്‍ ഈ ഉത്തരവിലൂടെ കമ്മീഷന്‍ സ്വീകരിച്ചതായി കാണാം. രാജ്യത്ത് നിലവിലുള്ള  നിയമങ്ങളും ചട്ടങ്ങളും പ്രകാരം വൈദ്യുതി സ്ഥാപനങ്ങള്‍ നിയന്ത്രിതമായ ലാഭത്തിന്റെ അടിസ്ഥാനത്തിലാണ് പ്രവര്‍ത്തിക്കുന്നത്. 2009 വരെ ഉല്പാദന പ്രസരണ മേഖലയ്ക്ക് ഈ ലാഭത്തോത് 14 ശതമാനവും അതിനുശേഷം 15.5 ശതമാനവുമാണ്. കേന്ദ്ര താരിഫ് നയമനുസരിച്ച് വിതരണ മേഖലയ്ക്ക് ഇതിലുമധികമായ ലാഭത്തോത് അനുവദിക്കേണ്ടതുണ്ട്. പൊതുമേഖലാ സ്ഥാപനങ്ങള്‍ക്ക് ഈ നിലയ്ക്ക് ലഭിക്കുന്ന ലാഭം അവര്‍  വൈദ്യുതി മേഖലയുടെ തന്നെ വികാസത്തിനായി പുനര്‍ നിക്ഷേപിക്കുകയാണ് ചെയ്യുന്നത്. 2009-2010 വരെയുള്ള ഉത്തരവുകളില്‍ കമ്മീഷന്‍ 14 ശതമാനം തോതില്‍ ലാഭം അനുവദിച്ചു പോരുകയും ചെയ്തിരുന്നു. എന്നാല്‍ ഇപ്പോഴത്തെ ഉത്തരവിലൂടെ മുന്‍കാല പ്രാബല്യത്തോടെ ബോര്‍ഡിന് ലാഭം നിഷേധിച്ചിരിക്കുകയാണ്. കേരളത്തില്‍ വിവിധ സ്വകാര്യ ഉല്പാദക കമ്പനികള്‍ക്കും വിവിധ സ്വകാര്യ ലൈസന്‍സികള്‍ക്കും 14% ലാഭം അനുവദിക്കുന്ന കമ്മീഷന്‍ യുക്തിരഹിതമായ വാദങ്ങളുയര്‍ത്തി ബോര്‍ഡിന് അത് നിഷേധിക്കുന്നതില്‍ ദുരൂഹതയുണ്ട്. ഈ ലാഭം നിഷേധിക്കുന്നതു വഴി ബോര്‍ഡ് ഇപ്പോള്‍ ഏറ്റെടുത്തിട്ടുള്ള വികസന പരിപാടികളാകെ തെറ്റും. കേരളത്തിലെ വൈദ്യുതി വിതരണം കാര്യക്ഷമവും സുഗമവുമായി നടത്തുന്നതിന് ഉല്പാദന-പ്രസരണ-വിതരണ മേഖലകളിലാകെ വന്‍ മൂലധന നിക്ഷേപം ആവശ്യമുണ്ട്. പ്രതിവര്‍ഷം ചുരുങ്ങിയത് 1000 കോടി രൂപയുടെ മുതല്‍ മുടക്ക് ആണ് പ്രതീക്ഷിക്കപ്പെടുന്നത്. വായ്പാ-മൂലധന അനുപാതം 70:30 എന്ന നിലയ്ക്ക് കണക്കാക്കിയാല്‍ ഏകദേശം 300 കോടി രൂപ മൂലധനമായി വായ്പയ്ക്ക് പുറമെ പ്രതിവര്‍ഷം സമാഹരിക്കേണ്ടതുണ്ട്. 14 ശതമാനം ലാഭമെന്ന നിലയ്ക്ക് അനുവദിച്ചിരുന്ന 217 കോടി രൂപതന്നെ ഇതിന് മതിവരില്ലെന്ന സാഹചര്യത്തില്‍ ലാഭം തന്നെ അനുവദിക്കില്ലെന്ന കമ്മീഷന്‍ നിലപാട് ഗുരുതരമായ പ്രത്യാഘാതങ്ങള്‍ സൃഷ്ടിക്കും.

ഇതിനും പുറമേ ഇലക്ട്രിസ്റി ഡ്യൂട്ടിയിനത്തില്‍ പിരിച്ചെടുത്ത 208 കോടി രൂപ ഗവണ്‍മെന്റിലേക്ക് അടയ്ക്കാത്തത് വിശ്വാസ വഞ്ചനയാണെന്ന പരാമര്‍ശം കമ്മീഷന്‍ നടത്തിയിട്ടുണ്ട്. ഈ തുകയും അധിക വരുമാനത്തില്‍ പെടുത്തുമെന്നാണ് ഭീഷണി. ഗവണ്‍മെന്റ് വിവിധ ഇനങ്ങളില്‍ ബോര്‍ഡിന് നല്‍കാനുള്ള തുകയില്‍ ഇത് തട്ടിക്കിഴിക്കുകയാണ് കാലാകാലങ്ങളായുള്ള പതിവ്. ഡ്യൂട്ടി ലഭിക്കേണ്ട ഗവണ്‍മെന്റ് ഈ സംവിധാനത്തില്‍ എന്തെങ്കിലും അപാകതയുള്ളതായി ചൂണ്ടിക്കാട്ടിയിട്ടുമില്ല. ഈ തുകകള്‍ ഇപ്പോള്‍ തട്ടിക്കിഴിച്ചാല്‍ തന്നെയും 2000 കോടിയോളം രൂപ ബോര്‍ഡിന് ലഭിക്കാനുമുണ്ട്.  ഗവണ്‍മെന്റിന്റെയും ബോര്‍ഡിന്റെയും ഉന്നതങ്ങളില്‍ വിഹരിച്ചിരുന്ന കമ്മീഷനംഗങ്ങള്‍ക്ക് അറിവില്ലാത്തതുമല്ല ഈ വസ്തുതകള്‍. നിയമാനുസൃതമായി പ്രവര്‍ത്തിക്കേണ്ട കമ്മീഷനില്‍ നിന്നും വന്നിട്ടുള്ള ഈ പരാമര്‍ശങ്ങള്‍ അനുചിതമെന്നേ ഈ സന്ദര്‍ഭത്തില്‍ പ്രതികരിക്കുന്നുള്ളൂ.

1998 മുതല്‍ സംസ്ഥാന ഗവണ്‍മെന്റ് പുറപ്പെടുവിച്ചിട്ടുള്ള ഉത്തരവുകള്‍, വൈദ്യുതി നിയമത്തിലെ 108-ാം വകുപ്പനുസരിച്ച് സംസ്ഥാന ഗവണ്‍മെന്റു കമ്മീഷന് നല്കിയ നയപരമായ നിര്‍ദ്ദേശങ്ങള്‍ എന്നിവയാകെ തങ്ങള്‍ക്ക് ബാധകമേയല്ലാ എന്നാണ് ഉത്തരവില്‍ കമ്മീഷന്‍ വ്യക്തമാക്കിയിരിക്കുന്നത്. കമ്മീഷന്റെ ഒത്താശയോടെ സ്വകാര്യ വന്‍കിട കമ്പനികള്‍ നയപരമായ നിര്‍ദ്ദേശങ്ങള്‍ക്കെതിരെ ബഹു. ഹൈക്കോടതിയെ സമീപിച്ചിരുന്നുവെങ്കിലും കോടതി ഗവണ്‍മെന്റ് നിര്‍ദ്ദേശങ്ങള്‍ പൊതുവില്‍ ശരി വയ്ക്കുകയായിരുന്നു. രാജ്യത്തെ ജനാധിപത്യ സമ്പ്രദായത്തെയും നീതിന്യായ വ്യവസ്ഥയെയും വകവെയ്ക്കാത്ത ഈ സമീപനത്തെ അപക്വമെന്നേ ഇപ്പോള്‍ വിശേഷിപ്പിക്കുന്നുള്ളൂ.

കേരളത്തിലെ വൈദ്യുതി മേഖലയില്‍ കടുത്ത പ്രതിസന്ധിക്കിടയാക്കുന്ന ഈ ഉത്തരവ് സ്വയമേവ പുനഃപരിശോധിക്കാന്‍ കമ്മീഷന്‍ തയ്യാറാകണമെന്നാണ് അഭ്യര്‍ത്ഥിക്കാനുള്ളത്. അതിനാവശ്യമായ വിവേകവും ദീര്‍ഘവീക്ഷണവുമാണ് കമ്മീഷനില്‍ നിന്നും പ്രതീക്ഷിക്കുന്നത്.

ബോര്‍ഡിന്റെ ധനകാര്യ ആസൂത്രണത്തിലും മാനേജ്മെന്റിലും റഗുലേറ്ററി സംവിധാനത്തിനു കീഴില്‍ പ്രവര്‍ത്തിക്കുമ്പോള്‍ ആവശ്യമായി വരുന്ന മാറ്റങ്ങള്‍ ഇനിയും ഉണ്ടായിട്ടില്ല എന്നതുകൂടി ഇതോടൊപ്പം കാണേണ്ടതുണ്ട്. ബോര്‍ഡിന്റെ കണക്കുകളില്‍ സാധാരണക്കാര്‍ക്ക് അവിശ്വാസം ജനിപ്പിക്കുമാറ്  അക്കൌണ്ടിംഗ് രീതികളില്‍ യുക്തിസഹമല്ലാതെ അടിക്കടി വരുത്തുന്ന മാറ്റങ്ങള്‍ ഗുണത്തേക്കാളേറെ ദോഷമാണ് സൃഷ്ടിക്കുന്നത്. കമ്മീഷന്‍ അനുവദിക്കുന്ന തോതില്‍ നിന്നും ചിലവുകള്‍ മാറുന്നത് യഥാസമയം പരിശോധിക്കാനും അതിനിടയാക്കിയ സാഹചര്യങ്ങള്‍ ഡോക്യുമെന്റ്  ചെയ്യാനും യാതൊരു സംവിധാനവും നിലവിലുള്ളതായി കാണുന്നില്ല. വൈദ്യുതി വാങ്ങല്‍ച്ചിലവിലുണ്ടാകുന്ന മാറ്റങ്ങള്‍ മാത്രമാണ് ഇപ്പോള്‍ ഈ നിലയ്ക്ക് പരിശോധിച്ചു പോകുന്നത്. റഗുലേറ്ററി സംവിധാനവുമായി കൂടുതല്‍ കാര്യക്ഷമമായി ഇടപെടാന്‍ ധനകാര്യ വിഭാഗത്തെ പ്രാപ്തരാക്കേണ്ടതുണ്ട്.

കമ്മീഷന്‍ ഉത്തരവ് സൃഷ്ടിച്ച പ്രതിസന്ധി മറികടക്കാനുള്ള ശ്രമങ്ങളില്‍ പ്രാധാന്യത്തോടെ ഏറ്റെടുക്കേണ്ട ഒരു മേഖലയാണിത്.
 

Add comment


Security code
Refresh

Random Videos

You need Flash player 6+ and JavaScript enabled to view this video.
Title: Power Quiz 2015 Final - Part-1

Latest Comments

Banner

Reference Book

 

Reference Book on Power

Electrical Engineering-- D' 1/4 Size Hard bound-- 1424 Pages-- Just Rs.1000/- only &n...

Visitors Counter

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
mod_vvisit_counterToday4217
mod_vvisit_counterYesterday5168
mod_vvisit_counterThis Month147177
mod_vvisit_counterLast Month142377

Online Visitors: 65
IP: 54.80.54.2
,
Time: 21 : 01 : 30