ജനറല്‍ സെക്രട്ടറിയുടെ പേജ് -ഒക്ടോബര്‍ 2024
കേരളത്തിന്റെ ഊർജ്ജം എന്ന വിശേഷണത്തോടെ നിലകൊള്ളുന്ന കെ എസ് ഇ ബി എൽ പ്രവര്‍ത്തന കാര്യക്ഷമതയില്‍ ഇനിയും ഒട്ടേറെ മുന്നോട്ടുപോകേണ്ടതുണ്ട്. വൈദ്യുതി സേവനങ്ങള്‍ ജനങ്ങളുടെ അഭിലാഷത്തിനൊത്ത് മെച്ചപ്പെടുത്താൻ നല്ല ഇടപെടല്‍ ആവശ്യമാണ്. സ്ഥാപനം പ്രവര്‍ത്തിച്ചുവരുന്നത് റഗുലേറ്ററി സംവിധാനത്തിന് കീഴിലാണ് എന്നതിനാല്‍ത്തന്നെ അതിന്റെ ഭാഗമായ നിയന്ത്രണങ്ങള്‍ സ്ഥാപനത്തിന്റെ അടിസ്ഥാന ചുമതലകൾ നിർവ്വഹിക്കുന്നതിന് തടസ്സമാവാതെ സൂക്ഷിക്കണം. വൈദ്യുതി ബോര്‍ഡിന്റെ മാനവവിഭവശേഷി വിനിയോഗത്തിന്റെ കാര്യക്ഷമത സംബന്ധിച്ച് വലിയ വിമര്‍ശനങ്ങള്‍ നിലനില്‍ക്കുന്നുണ്ട്. ബോര്‍ഡിന്റെ ശമ്പളച്ചെലവുകള്‍ ഉയര്‍ന്നതാണെന്നും ആവശ്യത്തിലധികം ജീവനക്കാര്‍ സ്ഥാപനത്തില്‍ ജോലിചെയ്യുന്നുണ്ടെന്നുമുള്ള അഭിപ്രായം വിവിധ കേന്ദ്രങ്ങളില്‍ നിന്ന് ഉയര്‍ന്നുവരാറുണ്ട്. ഇത് അംഗീകരിക്കുന്ന നിലയിലുള്ള സമീപനമാണ് സംസ്ഥാന വൈദ്യുതി റഗുലേറ്ററി കമ്മീഷനും സ്വീകരിച്ചുപോരുന്നത്. വൈദ്യുതി ബോർഡില്‍ സ്ഥിരം ജീവനക്കാരും കരാർ തൊഴിലാളികളും ഉൾപ്പെടെ മുപ്പത്തിഅയ്യായിരത്തിലധികം ജീവനക്കാര്‍ ജോലിചെയ്യുന്നുണ്ടെങ്കിലും 2008-09-ലെ ജീവനക്കാരുടെ എണ്ണമായ 27175ല്‍ ഈ എണ്ണം പരിമിതപ്പെടുത്തിക്കൊണ്ടാണ് റഗുലേറ്ററി കമ്മീഷന്‍ സ്ഥാപനത്തിന്റെ കണക്കുകള്‍ ഇപ്പോഴും അനുവദിക്കുന്നത്. സ്ഥാപനം വിതരണം ചെയ്യുന്ന ആകെ വൈദ്യുതിയുടെ അളവ് അടിസ്ഥാനപ്പെടുത്തി പ്രതിയൂണിറ്റ് ശമ്പളച്ചെലവ് രാജ്യത്ത് ഏറ്റവും ഉയര്‍ന്നു നില്‍ക്കുന്നത് കെ.എസ്.ഇ.ബി.യിലാണെന്നതും ഇതോടൊപ്പം ചൂണ്ടിക്കാട്ടുന്നുണ്ട്. 2023-24 ലെ കണക്കുകള്‍ പ്രകാരം ഒരു യൂണിറ്റ് വൈദ്യുതി വിൽക്കുതിന് ശമ്പളച്ചെലവായി വരുന്ന ദേശീയ ശരാശരി 0.63 രൂപ/ യൂനിറ്റ് രൂപ മാത്രമാണ്. എന്നാല്‍ കേരളത്തില്‍ ഇത് 1.72 രൂപ/യൂനിറ്റ് ആണ്. കെ.എസ്.ഇ.ബി.യുടെ പ്രവര്‍ത്തനകാര്യക്ഷമതയുടെ പ്രധാനപ്രശ്നങ്ങളിലൊന്നായാണ് ഇക്കാര്യം അവതരിപ്പിക്കപ്പെടുന്നത്.
രാജ്യത്ത് മറ്റേതൊരു സംസ്ഥാനത്തേക്കാളും കാര്യക്ഷമമായ പ്രവര്‍ത്തനമാണ് കേരളത്തിലെ വൈദ്യുതിമേഖലയില്‍ നടക്കുന്നതെന്ന് 2018ലേയും 2019ലേയും മഹാപ്രളയങ്ങളിലും ഏറ്റവും ഒടുവിലായി വയനാട് പ്രകൃതി ദുരന്തത്തിലും നാം തെളിയിച്ചതാണ്. പ്രകൃതി ദുരന്തങ്ങളില്‍ നഷ്ടപ്പെടുന്ന വൈദ്യുതി ബന്ധങ്ങള്‍ പുന:സ്ഥാപിക്കുന്നതിന് മാസങ്ങള്‍ കഴിഞ്ഞിട്ടും സാധിക്കാത്ത നിരവധി അനുഭവങ്ങള്‍ രാജ്യത്ത് പലയിടത്തും ഉണ്ടായിട്ടുണ്ട്. എന്നാല്‍ കേരളത്തില്‍ ദിവസങ്ങള്‍ക്കുള്ളില്‍ വൈദ്യുതി ശൃംഖലയാകെ പുന:സ്ഥാപിച്ച് കണക്ഷനുകള്‍ തിരിച്ചുനല്‍കാന്‍ കഴിഞ്ഞത് ലോകശ്രദ്ധ നേടുകയുണ്ടായി. മോഡല്‍ സെക്ഷന്‍ പരിഷ്കരണത്തിന്റെ ഭാഗമായി പ്രത്യേക ടീമുകളായി പ്രവര്‍ത്തനരീതി പുന:സംഘടിപ്പിച്ചതടക്കം നിരവധി കാര്യക്ഷമതവർദ്ധനപദ്ധതികൾ സ്ഥാപനത്തില്‍ ഫലപ്രദമായി നടപ്പാക്കാനും നമുക്ക് കഴിഞ്ഞിട്ടുണ്ട്. ബോര്‍ഡിലെ ജീവനക്കാരുടെ എണ്ണം വില്‍ക്കപ്പെടുന്ന യൂണിറ്റിന്റെ മാത്രം അടിസ്ഥാനത്തില്‍ കണക്കാക്കി കാര്യക്ഷമത നിശ്ചയിക്കുന്ന രീതി കേരളത്തെ സംബന്ധിച്ചിടത്തോളം ശാസ്ത്രീയമായ സമീപനമല്ല. ദുര്‍ഘടമായ മലമടക്കുകളടക്കം സംസ്ഥാനത്തിന്റെ എല്ലാ മുക്കിലും മൂലയിലും എല്ലാ വീടുകളിലും വൈദ്യുതി എത്തിച്ചുള്ള വിപുലമായ വൈദ്യുതി ശൃംഖലയാണ് കേരളത്തിലുള്ളത്. മാത്രമല്ല ചിതറിക്കിടക്കുന്ന ആവാസ രീതി കേരളത്തിലെ എല്‍.ടി വൈദ്യുതിശൃംഖലയുടെ നീളം വലിയതോതില്‍ കൂടുന്നതിന് കാരണമായിട്ടുമുണ്ട്. എന്നാല്‍ ഇതേ സമയം കേരളത്തിലെ പ്രതിശീര്‍ഷ വൈദ്യുതി ഉപഭോഗവും ഓരോ ഉപഭോക്താവിനും വരുന്ന ശരാശരി വാര്‍ഷിക വൈദ്യുതി വില്‍പ്പനയും മറ്റിന്ത്യന്‍ ദേശീയ ശരാശരിയേക്കാള്‍ വളരെ കുറവാണ്. അതുകൊണ്ടുതന്നെ ആയിരം ഉപഭോക്താക്കള്‍ക്ക് വേണ്ടിവരുന്ന ജീവനക്കാരുടെ എണ്ണമടക്കം വൈദ്യുതി ആസ്തികളുടെ അടിസ്ഥാനത്തില്‍ ജീവനക്കാരുടെ കാര്യക്ഷമത കണക്കാക്കിയാല്‍ കേരളം മറ്റിന്ത്യന്‍ സംസ്ഥാനങ്ങളേക്കാളും മെച്ചപ്പെട്ട പ്രകടനം കാണിക്കുന്നുണ്ട് എന്ന് മനസ്സിലാക്കാൻ കഴിയും.
മേല്‍പ്പറയുന്ന നിരവധി വസ്തുതകള്‍ ചൂണ്ടിക്കാണിക്കുമ്പോഴും വൈദ്യുതി ശൃംഖലയിലും സ്ഥാപനത്തിന്റെ നടത്തിപ്പിലും വന്നിട്ടുള്ള മാറ്റങ്ങള്‍ക്കനുസൃതമായ ജീവനക്കാരുടെ പുനര്‍വിന്യാസത്തില്‍ കാര്യമായ ഇടപെടലൊന്നും കെ.എസ്.ഇ.ബിയില്‍ നടന്നിട്ടില്ല എന്നുകാണാം. മോഡല്‍ സെക്ഷന്‍ പരിഷ്കാരത്തിന് ശേഷം നിരവധി ആധുനികീകരണ നടപടികള്‍ സ്ഥാപനത്തില്‍ ഉണ്ടായിട്ടുണ്ട്. നഗരപ്രദേശങ്ങളില്‍ അണ്ടര്‍ഗ്രൗണ്ട് കേബിള്‍ വിന്യസിക്കപ്പെട്ടിട്ടുണ്ട്. തിരുവനന്തപുരം, കൊച്ചി, കോഴിക്കോട് നഗരങ്ങളില്‍ സ്കാഡ സംവിധാനം നടപ്പാക്കപ്പെട്ടിട്ടുണ്ട്. എ.പി.ഡി.ആര്‍.പി, ആര്‍.എ.പി.ഡി.ആര്‍.പി, ദ്യുതി തുടങ്ങിയ വിവിധ പദ്ധതികളിലൂടെ വിതരണശൃംഖലാനവീകരണപ്രവര്‍ത്തനങ്ങള്‍ നടന്നിട്ടുണ്ട്. ഇതോടൊപ്പം ഗ്രാമീണമേഖലയില്‍ സമ്പൂര്‍ണ്ണവൈദ്യുതീകരണമടക്കം ശൃംഖലാവ്യാപനവും നടന്നിട്ടുണ്ട്.
എന്നാല്‍ ആധുനികീകരണത്തിന്റെ ഭാഗമായി ജോലിഭാരം കുറഞ്ഞ പ്രദേശങ്ങളില്‍നിന്ന് ജീവനക്കാരെ ശൃംഖലാവ്യാപനത്തിന്റെ ഭാഗമായി ജോലിഭാരം വര്‍ദ്ധിച്ച പ്രദേശങ്ങളിലേക്ക് പുനര്‍വിന്യസിക്കുന്നതടക്കമുള്ള നടപടികളൊന്നും ഉണ്ടായിട്ടില്ല. കമ്പ്യൂട്ടറൈസേഷനും ഡിജിറ്റലൈസേഷനും, ഇ.ആർ.പി. യും നടപ്പാക്കിക്കൊണ്ടിരിക്കുന്നതും ഉൾപ്പെടെ ഉണ്ടാക്കിയിട്ടുള്ള മാറ്റങ്ങള്‍ക്കനുസൃതമായി ജീവനക്കാരുടെ പുനർ വിന്യാസം ഉണ്ടായിട്ടില്ല. വൈദ്യുതിത്തടസ്സങ്ങള്‍ പരിഹരിക്കുന്നതിലും മറ്റും വലിയ പുരോഗതി കൈവരിച്ചപ്പോഴും വൈദ്യുതിത്തടസ്സങ്ങള്‍ ഉണ്ടാകുന്നതിന്റെ ആവൃത്തി വര്‍ദ്ധിച്ചതായുള്ള പരാതി വ്യാപകമായി ഉയര്‍ന്നുവരുന്നുണ്ട്. വൈദ്യുതി ലൈനുകളുടെ പരിപാലനത്തില്‍ നെറ്റ്‌വര്‍ക്കിന്റെ അടിസ്ഥാനത്തില്‍ ആസൂത്രണം ചെയ്യുക എന്ന ലക്ഷ്യത്തോടെ നടപ്പാക്കിയ പി.എം.യു., സബ് പി.എംയു. സംവിധാനങ്ങള്‍ കാര്യക്ഷമമായി മുന്നോട്ടുപോകുന്നതിലും പലവിധ പരിമിതികള്‍ നില്‍ക്കുന്നുണ്ട്. വൈദ്യുതി ഉത്പാദന, പ്രസരണ മേഖലകളിലും നവീകരണ ആധുനികീകരണ നടപടികള്‍ ഉണ്ടായിട്ടുണ്ടെങ്കിലും അതിനനുസൃതമായ മാനവവിഭവശേഷി പുന:ക്രമീകരണം വേണ്ട നിലയില്‍ ഉണ്ടായിട്ടില്ല.
ഈ സാഹചര്യത്തിലാണ് ബോര്‍ഡിന്റെ പ്രവര്‍ത്തന പുന:ക്രമീകരണവും ജീവനക്കാരുടെ പുനര്‍വിന്യാസവും ലക്ഷ്യമിട്ടുകൊണ്ട് സ്ഥാപനത്തിനുള്ളിലെതന്നെ ഒരു വിഗദ്ധസമിതിയെ കൃത്യമായ നിര്‍ദ്ദേശങ്ങള്‍ രൂപപ്പെടുത്താന്‍ ചുമതലപ്പെടുത്തി റിപ്പോർട്ട് തയ്യാറാക്കിയത് . ഈ സമിതിയുടെ നിര്‍ദ്ദേശങ്ങള്‍ വിതരണം, പ്രസരണം, ഉദ്പാദനം, കോര്‍പ്പറേറ്റ് ഓഫീസ് എന്ന നിലയില്‍ തരം തിരിച്ച് പ്രത്യേകം കമ്മിറ്റികളെ ചുമതലപ്പെടുത്തി ഓരോ മേഖലയിലും പുന:സംഘടന നടത്തുന്നതിനുള്ള നിര്‍ദ്ദേശങ്ങളാക്കി സംഘടനകളുടെ അഭിപ്രായത്തിന് നല്‍കിയിട്ടുണ്ട്. കെ എസ് ഇ ബി ഓഫീസേഴ്സ് അസോസിയേഷൻ ഉൾപ്പെടെയുള്ള സംഘടനകൾ പ്രതികരണങ്ങൾ നൽകിയതുമാണ്. വൈദ്യുതി റഗുലേറ്ററി കമ്മീഷന്റെ വിമര്‍ശനങ്ങളുടേയും അപ്പലേറ്റ് ട്രിബ്യൂണല്‍ അടക്കമുള്ള നിയമസംവിധാനങ്ങള്‍ മുഖാന്തിരം ശമ്പളച്ചെലവുകള്‍ പുന:സ്ഥാപിച്ചെടുക്കുന്നതിന് കഴിയാത്ത സാഹചര്യങ്ങളുടേയും അടിസ്ഥാനത്തില്‍ പുന:സംഘടനാ നടപടികള്‍ കാലതാമസമില്ലാതെ നടപ്പാക്കേണ്ട സാഹചര്യം നിലവിലുണ്ട്.
വൈദ്യുതിബോര്‍ഡ് പുന:സംഘടന സംബന്ധിച്ച് സംഘടന മുഴുവന്‍ അംഗങ്ങളുടേയും അഭിപ്രായമാരാഞ്ഞുകൊണ്ട് വിപുലമായ ചര്‍ച്ചകള്‍ സംഘടിപ്പിക്കുകയുണ്ടായി. ബോര്‍ഡ് തയ്യാറാക്കി സമര്‍പ്പിച്ച റിപ്പോര്‍ട്ടുകളില്‍ പ്രായോഗികമായതും അല്ലാത്തതുമായ നിരവധി നിര്‍ദ്ദേശങ്ങളുണ്ട്. റിപ്പോര്‍ട്ടുകള്‍ തമ്മില്‍ ചിലകാര്യങ്ങളില്‍ വൈരുദ്ധ്യം നിലനില്‍ക്കുന്നുമുണ്ട്. പദ്ധതിപ്രവര്‍ത്തനങ്ങള്‍, മറ്റു മൂലധന നിര്‍മ്മിതികള്‍ എന്നിവയില്‍ ജോലിചെയ്യുന്നവരുടെ ചെലവുകള്‍ അത്തരം പ്രവര്‍ത്തനങ്ങളുടെ ചെലവിനത്തില്‍ പെടുത്തുക, സൗര, ഇ-വെഹിക്കിള്‍ തുടങ്ങി ബോര്‍ഡ് ഏറ്റെടുത്തു നടത്തുന്ന പ്രത്യേക ചുമതലകള്‍ അതിനായുള്ള പ്രത്യേക ഉദ്ദേശ സ്ഥാപനങ്ങളായി കണക്കാക്കി അത്തരം പ്രവര്‍ത്തനങ്ങള്‍ക്കുള്ള ചെലവുകള്‍ അതിലേക്ക് പ്രത്യേകം മാറ്റുക തുടങ്ങി പൊതുവായ ശമ്പളച്ചെലവ് കുറക്കാന്‍ കഴിയുന്ന നിരവധി മാറ്റങ്ങള്‍ പ്രായോഗികമായി കൊണ്ടുവരാന്‍ കഴിയുന്നതാണ്. ഇക്കാര്യങ്ങളൊക്കെ പരിഗണിച്ചുകൊണ്ട് ഓരോ മേഖലയിലും പ്രവര്‍ത്തനകാര്യക്ഷമത ഉയര്‍ത്തുന്ന നിലയില്‍ പുന:സംഘടനയും ജീവനക്കാരുടെ പുനര്‍ക്രമീകരണങ്ങളും താമസംവിനാ ഉണ്ടാകേണ്ടതുണ്ട്.
ഈ സാഹചര്യത്തില്‍ ബോര്‍ഡ് പുന:സംഘടനയും ജീവനക്കാരുടെ പുനര്‍ക്രമീകരണവും സംബന്ധിച്ച് തൊഴിലാളി ഓഫീസര്‍ സംഘടനകളുമായി ചര്‍ച്ചകള്‍ നടത്തി സ്ഥാപനത്തിന്റെ പ്രവര്‍ത്തന കാര്യക്ഷമത വര്‍ദ്ധിപ്പിക്കാനുതകുന്ന പുന:സംഘടനാ നടപടികള്‍ അടിയന്തരമായി പൂര്‍ത്തിയാക്കാനും കെ.എസ്.ഇ.ബി. ഓഫീസേര്‍സ് അസോസിയേഷന് വൈദ്യുതി ബോര്‍ഡിനോട് ആവശ്യപ്പെടുന്നു.
വൈദ്യുതി ബോര്‍ഡിലെ കരിയര്‍ സ്റ്റാഗ്നേഷൻ പരിഹരിക്കാൻ ടൈം സ്കെയിൽ പ്രമോഷൻ നടപ്പിലാക്കണം.
വൈദ്യുതി ബോര്‍ഡിലെ കരിയര്‍ സ്റ്റാഗ്നേഷനും ഏറെക്കാലമായി നിലനില്‍ക്കുന്ന ഒരു സര്‍വീസ് പ്രശ്നമാണ്. വർഷങ്ങളോളം പ്രമോഷൻ ലഭിക്കാതെ ഒരേ തസ്തികയിൽ തുടരുന്ന നിരവധി ഓഫീസർമാർ നമ്മുടെ സ്ഥാപനത്തിലുണ്ട്. സമയ ബന്ധിതമായി സ്ഥാനക്കയറ്റം ലഭ്യമാവാതിരിക്കുന്നത് ഓഫീസർമാരിൽ കടുത്ത അസംതൃപ്തിക്കും, ഉത്സാഹക്കുറവിനും കാരണമാകുന്നുണ്ട്. ഇതിന്റെ ഫലമായി സ്ഥാപനത്തിന്റെ ആകെ കാര്യക്ഷമതയിൽ കോട്ടവും ഉണ്ടാകുന്നുണ്ട്. സംഘടന ഈ വിഷയം പഠിക്കുകയും പ്രശ്ന പരിഹാരത്തിനായി സമയബന്ധിത (Time Scale) പ്രമോഷൻ എന്ന ആശയം ശമ്പള പരിഷ്ക്കരണ ഡിമാന്റിന്റെ ഭാഗമായി മാനേജ്മെന്റിന് നൽകുകയും ചെയ്തിട്ടുണ്ട്. എന്നാൽ ഈ വിഷയത്തിൽ യാതൊരു തീരുമാനവും മാനേജ്മെന്റിന്റെ ഭാഗത്ത് നിന്ന് നാളിതുവരെയുണ്ടായിട്ടില്ല.
നിലവിൽ സ്ഥാനക്കയറ്റം പൂർണ്ണമായും ഉയർന്ന തസ്തികകളിലെ ഒഴിവുകളുടെ ലഭ്യതയെ ആശ്രയിച്ചിരിക്കുന്നു. പൊതുസേവനം ഒരു കരിയർ എന്ന നിലയിൽ, പ്രത്യേകിച്ച് ഒരു പ്രൊഫഷണൽ കരിയർ ആയി തിരഞ്ഞെടുക്കുമ്പോൾ, ഒരാൾ അയാൾക്ക് വാഗ്ദാനം ചെയ്യുന്ന പ്രാരംഭ ശമ്പളവും വിരമിക്കുമ്പോൾ അയാൾക്ക് ഉറപ്പുനൽകുന്ന ആനുകൂല്യങ്ങളും മാത്രമല്ല, സ്ഥാനക്കയറ്റത്തിനുള്ള അവസരവും തൊഴിൽ സുരക്ഷയും കണക്കിലെടുക്കുന്നു. സ്ഥാനക്കയറ്റം നൽകുന്നതിന് എല്ലാവരും അംഗീകരിക്കുന്ന പൊതു ഫോർമുല സീനിയോറിറ്റി കം മെറിറ്റ് ആണ്. ഒരു പ്രത്യേക വിഭാഗത്തിലെ എല്ലാവരും സ്ഥാനക്കയറ്റത്തിന് തുല്യ യോഗ്യരാണെന്ന് സീനിയോറിറ്റിയുടെ തത്വം ഉറപ്പ് നൽകുന്നു. സ്വകാര്യ മേഖലകളെ അപേക്ഷിച്ച് തൊഴിൽ സുരക്ഷയും പ്രതീക്ഷിക്കപ്പെടുന്ന സ്ഥാനക്കയറ്റവുമാണ് പലരെയും പൊതുമേഖലയിലേക്ക് ആകർഷിക്കുന്നത്. ഇരുപത്തിയഞ്ച് വർഷമായി പ്രമോഷൻ ലഭിക്കാതെ ഒരേതസ്തികയിൽ തുടരുന്നവർ സ്ഥാപനത്തിൽ ഉണ്ട് . സ്ഥാപനത്തിന്റെ മുന്നോട്ടുപോക്കിന് തന്റെ കഴിവും അനുഭവസമ്പത്തും അറിവും പരിഗണിക്കുന്നില്ല എന്ന തോന്നൽ പ്രവർത്തനക്ഷമതയെ കാര്യമായി സ്വാധീനിക്കും. ലഭിക്കുന്ന സാമ്പത്തിക ആനുകൂല്യങ്ങൾക്കപ്പുറം, തങ്ങൾ അനുഭവപരിചയമുള്ളവരാണെന്നും സ്ഥാപനം അവരെ യഥാവിധി അംഗീകരിക്കുന്നുവെന്നും ഉദ്യോഗസ്ഥർക്ക് തോന്നണം. ഇത് സംഭവിക്കാത്തപ്പോൾ, ഇത് പലപ്പോഴും ജോലിയുടെ അതൃപ്തിയിലേക്കും ജീവനക്കാരുടെ കർമ്മശേഷി കുറയ്ക്കുന്നതിലേക്കും നയിക്കുന്നു. യാതൊരുവിധ സാമ്പത്തിക ബാദ്ധ്യതയും ഇല്ലാതെ മികച്ച തൊഴിൽ സംതൃപ്തി ഉണ്ടാക്കാൻ കഴിയുന്ന ടൈം സ്കെയിൽ പ്രമോഷൻ കാലവിളംബമില്ലാതെ നടപ്പിലാക്കാൻ മാനേജ്മെന്റ് തയ്യാറാവണം.
ജനറേഷൻ മൂലധന നിക്ഷേപ പദ്ധതി
ജനറേഷൻ മേഖലയിൽ 2022-27 കാലയളവിൽ KSEB നടപ്പിലാക്കാൻ ഉദ്ദേശിച്ച മൂലധന പദ്ധതികൾക്ക് അനുമതിക്കായി സമർപ്പിച്ച പെറ്റീഷനിൽ റഗുലേറ്ററി കമ്മീഷൻ ഉത്തരവിറക്കി.
5000 കോടി രൂപയുടെ 18 പദ്ധതികളിൽ നിലവിൽ കമ്മീഷൻ അംഗീകാരം നല്കിയത് 6 പദ്ധതികൾക്കാണ്. അപ്പർ സെങ്കുളം, ഒലിക്കൽ, പൂവാരം തോട്, മാങ്കുളം, പെരിങ്ങൽകുത്ത് മൈക്രോ, പെരിങ്ങൽ കുത്ത് സ്റ്റേജ് II എന്നീ പദ്ധതികൾക്കാണ് അനുമതി. ആകെ ശേഷി 96.036 MW. എന്നാൽ ഈ പദ്ധതിയുടെ ചെലവ് CERC നോംസിന് വിധേയമായാണ് അംഗീകരിച്ചത്. നിലവിൽ കമ്മിഷൻ 820.14 കോടി രൂപയുടെ അനുമതിയാണ് നല്കിയിരിക്കുന്നത്. ബാക്കി പദ്ധതികൾ നവംബർ മാസത്തോടെ കോസ്റ്റ് എഫക്ടീവായി റീഡിസൈൻ ചെയ്ത് കമ്മിഷൻ മുമ്പാകെ നല്കുന്ന പക്ഷം കമ്മിഷൻ പരിശോധിച്ച് പരിഗണിക്കും. കൂടാതെ റിസോഴ്സ് അഡിക്വസി പ്ലാൻ വഴി കോസ്റ്റ് എഫക്ടിവായി കണ്ടെത്തുന്ന ജനറേഷൻ പദ്ധതികൾ മാത്രമേ കമ്മീഷൻ ഭാവിയിൽ പരിഗണിക്കുകയുള്ളു എന്ന് ഉത്തരവിൽ പറയുന്നു. അനിയന്ത്രിതമായി പദ്ധതി നടത്തിപ്പിൽ നേരിടുന്ന കാലതാമസം മൂലം അധിക ചെലവ് അനുവദിക്കാൻ കഴിയില്ല എന്നും ഉത്തരവിൽ പറയുന്നു. കൂടാതെ പദ്ധതി നടത്തിപ്പിൽ കൃത്യമായ മോണിറ്ററിംഗ് സംവിധാനം വേണമെന്നും ഉത്തരവ് സൂചിപ്പിക്കുന്നുണ്ട്.
ആഭ്യന്തര ഉത്പാദനം ചെലവ് കുറച്ച് നടപ്പിലാക്കേണ്ടത്ത് വളരെ പ്രധാനമാണ്. സംഘടനാപരമായ ശക്തമായ ഇടപെടലുകൾ പദ്ധതി നിർവഹണത്തിന്റെ ഓരോ ഘട്ടത്തിലും നടത്തി പോകേണ്ടതുണ്ട്. കൂടാതെ നിലവിലെ ഡിസൈൻ രീതിയിൽ വരുത്തേണ്ട സാധ്യമായ മാറ്റങ്ങൾ വരുത്തുന്നുണ്ട് എന്നതും ഉറപ്പാക്കേണ്ടതാണ്.
പ്രസ്തുത ഉത്തരവിൽ KSEB ആവശ്യപ്പെട്ട 4 സോളാർ പദ്ധതികൾക്ക് MWന് 4 കോടി രൂപ നിരക്കിൽ റഗുലേറ്ററി കമ്മീഷൻ അനുമതി നല്കി. അതിനാൽ പദ്ധതികളുടെ നടത്തിപ്പിൽ കൃത്യമായി പ്ലാൻ ചെയ്ത് കമ്മീഷൻ അനുവദിച്ച തുകയ്ക്കുള്ളിൽ നിർത്തേണ്ടതുണ്ട്. അതുപോലെ പ്രധാനമാണ് പൂർത്തീകരിച്ച പദ്ധതികളിൽ നിന്ന് കൃത്യമായി വൈദ്യുതി ഉത്പാദനം നടക്കുന്നുണ്ടെന്ന് ഉറപ്പുവരുത്തേണ്ടതും.
